Sentyabrın 27-də Azərbaycan Dövlət Pedaqoji Universitetinin (ADPU) Kitabxana-İnformasiya Mərkəzində kitab sərgisinin açılış mərasimi keçirilib.
ADPU-nun İctimaiyyətlə əlaqələr və marketinq şöbəsindən “Bakı Xəbər”ə verilən məlumata görə, açılış mərasimində ADPU-nun rəhbərliyi, fakültə dekanları, kafedra müdirləri, Kitabxana-İnformasiya Mərkəzinin əməkdaşları iştirak edib.
Məlumat üçün bildirək ki, Təhsil Nazirliyi tərəfindən ADPU-nun Kitabxana-İnformasiya Mərkəzinə 2019-2020-ci tədris ili üçün I-XI-ci siniflər üçün nəşr edilmiş 233 adda 527 nüsxəorta məktəb dərsliyi hədiyyə olunub. Qeyd edilməlidir ki, Təhsil Nazirliyi tərəfindən 2018-2019-cu tədris ilində də ADPU-ya 184 adda 916 nüsxə orta məktəb dərsliyi hədiyyə edilib.
Tədbirdə çıxış edən ADPU-nun rektoru, professor Cəfər Cəfərov bildirib ki, bu kitab sərgisinin keçirilməsi təqdirəlayiq hadisədir. ADPU müəllimlərinin dərsliklərin hazırlanmasında fəal iştirak etməli olduqlarını deyən rektor çıxışında universitetin Kitabxana-İnformasiya Mərkəzinə yeni orta məktəb dərsliklərinin hədiyyə edilməsinə görə Təhsil Nazirliyinin rəhbərliyinə təşəkkür edib, Kitabxana-İnformasiya Mərkəzinin fəaliyyətinin təkmilləşdirilməsi və müasir tələblərə uyğun qurulması üçün tapşırıq və tövsiyələrini verib.
Tədbirdə Elm və innovasiyalar üzrə prorektor, professor Asəf Zamanov, Tədris işləri üzrə prorektor, dosent Eldar Aslanov, Sosial və humanitar məsələlər üzrə prorektor, professor Fikrət Rzayev dərsliklərin hazırlanması və bu sahədə qarşıda duran vəzifələrlə bağlı öz fikirlərini bölüşüblər.
Sərgi bir neçə gün davam edəcək.
