Son illər uşaqlar arasında müxtəlif patoloji xəstəliklərin yaranmasının şahidi oluruq. Bu xəstəliklər zamanında müalicə edilmədikdə özünü daha ağır şəkildə büruzə verməyə başlayır. Yeni nəsil uşaqlar arasında geniş yayılan problemlərdən biri uşaqların ayaq barmaqları üstündə gəzməsidir ki, buna biz sıx-sıx rast gəlirik. Bu daha çox yeni yeriməyə başlayan uşaqlar arasında geniş yayılıb. Artıq böyük bir təhlükə kimi qarşımıza çıxan bu problemin nədən qaynaqlandığı müxtəlif suallar yaradır.
Uşaqlar arasında pəncə, barmaq uclarında gəzmələrin artmasının səbəbini həkimlər müxtəlif cür izah edirlər. Həkim-pediatrların böyük əksəriyyəti qeyd edirlər ki, axır illər uşaqlarda müşahidə edilən bu təhlükəli vəziyyətlə bağlı tez-tez valideynlər tərəfindən müraciət alırlar. Həkim-pediatrların bildirdiyinə görə, bu təhlükəli məsələ yalnız Azərbaycanda deyil, bütün dünyada mövcuddur və mütəxəssislər bu halın aradan qaldırılması, eyni zamanda, vərdiş halına keçməməsi üçün o cür uşaqların zamanında müalicə almasını tövsiyə edirlər.
Ekspertlərin bildirdiyinə görə, dünya üzrə uşaqlarda qeydə alınan travmaların 80-90 faizi “gəzdirici”lərdən qaynaqlanır. Bəzi həkimlərin fikrincə, təzə-təzə yeriməyə başlayan uşaqlarda bu funksional hal xəstəlik, qüsur kimi xarakterizə edilmir. Ancaq bəzən bunun səbəbi valideynlərin uşaqları vaxtından erkən “gəzdirici”lərə qoyması olur. Uşaqların ayaqları tam olaraq yerə çatmadığından, barmaq uclarında hərəkət edirlər, bu da onlarda vərdiş formasına çevrilir.
Həkimlərin dediyinə görə, uşaqların erkən “gəzdiriciyə” qoyulması çox zərərlidir. Bundan başqa, onlar hesab edirlər ki, körpə uşaqların barmaq uclarında gəzməsi ilə “gəzdirici”yə qoyulan uşaqlarda yaranan problem arasında fərq var.
Pediatrlar qeyd edirlər ki, birinci məqam funksional olaraq müəyyən yaşdan sonra keçir, ikinci isə vərdiş formasında qala bilər. Onlar tövsiyə edirlər ki, valideynlər uşaqları 10 ayından tez “gəzdirici”yə qoymasınlar. Uşaqlarda ilk üç yaş pəncənin formalaşma dövrü sayılır. Bəzən dəb, gözəl görünüş üçün valideynlər uşaqlara sərt, bəzəkli ayaqqabılar geyindirməklə, səhvə yol verirlər. Həmin dövrdə uşaqlara yalnız yumşaq ayaqqabıların geyindirilməsi tövsiyə edilir. Sərt ayaqqabılar uşağın pəncəsini sıxır və normal formalaşmasına mane olur.
“Bunun digər səbəbi də uşaqların vaxtından tez “gəzdirici”yə qoyulmasıdır”
Nizami rayonu 17 saylı Uşaq Poliklinikasının həkimi, pediatr Sevinc Xasayeva “Bakı-Xəbər”ə bildirdi ki, uşaqlar arasında geniş yayılan bu patologiya əsasən nefroloji problemlə bağlıdır. O qeyd etdi ki, bu əsasən nevroloji problemi olan uşaqlarda geniş müşahidə edilir: “Uşaqlar arasında ayaq barmaqları ucunda yerimə halları geniş yayılıb və bu bir patologiyadır. Bu əsasən uşaqların əsəb sistemində olan oyanıqlıqla bağlıdır. Uşaq müəyyən bir yaş dövründən sonra pəncəsini tam olaraq yerə oturtmalıdır. Əgər ayaq pəncələrini tam oturtmursa, onların əzələ tonusunda da müəyyən problemlər ola bilər. Bunun digər səbəbi də uşaqların vaxtından tez “gəzdirici”yə qoyulmasıdır. Tövsiyə edərdim ki, analar uşaqlarını 10 ayından sonra, ilk addımlarını atdığı zaman “gəzdiriciyə” qoysunlar, bundan əvvəl olmaz. Təəssüf ki, bizim valideynlər uşaqları “gəzdirici”yə vaxtından tez qoyurlar”.
S.Xasayevanın sözlərinə görə, bu gün bəzən 6, 7, 8 yaşlı uşaqlarda da bu hal müşahidə edilir. Bunun birbaşa nevroloji problemlə əlaqədar olduğunu deyən S.Xasayeva hesab edir ki, valideynlər bu halın aradan qaldırılması üçün mütləq mütəxəssislərə müraciət etməlidirlər, bu, vaxtında müalicə olunmasa, sonra uşaqda vərdiş kimi qala bilər.
İradə SARIYEVA
