Azərbaycan vətəndaşlarının sosial müdafiəsinin gücləndirilməsində Prezident İlham Əliyev tərəfindən həyata keçirilən sosial paketlərin mühüm rolu var. Bu gün cəmiyyətimizin sosial rifahının yüksəldilməsində son bir il ərzində həyata keçirilən sosial paketlər böyük əhəmiyyətə malikdir.
Dövlət başçısı tərəfindən ölkəmizdə həyata keçirilən yeni islahatlar konsepsiyasının əsas məqsədi Azərbaycanı daha güclü, qüdrətli ölkəyə çevirməkdir. Sözsüz ki, əsas hədəf Azərbaycan vətəndaşının sosial rifahını yüksəltmək, güzəranını daha da yaxşılaşdırmaqdır. Bildiyimiz kimi, bu məqsədlə Prezident İlham Əliyev son bir ildə bir neçə sosial paket həyata keçirib ki, həmin sosial paketlər vətəndaşların sosial rifah halının yüksəlməsinə gətirib çıxarıb.
Son bir ildə ölkəmizdə gerçəkləşdirilən sosial paketlər Azərbaycanda ailələrin dayanıqlı olmasına, boşanmaların sayının azalmasına nə kimi təsirlər göstərir?
Aytəkin Kamranqızı: “Hesab edirəm ki, son bir ildə qədul edilən sosial paketlər Azərbaycan ailələrinin dayanıqlığının təmin edilməsinə və boşanmaların azalmasına müsbət təsir göstərib”
Sosioloq Aytəkin Kamranqızı “Bakı-Xəbər”ə bildirdi ki, son bir ildə ölkə başçısının müvafiq sərəncamları ilə maaşların, pensiyaların, sosial müavinətlərin, minimum əməkhaqqının artırılması əhalinin güzəranında, ailələrin dayanıqlı olmasında, eləcə də boşanmaların sayının azalmasında mühüm rol oynayır. Ekspertin sözlərinə görə, bu gün Azərbaycan ailəsinin güzəranında müsbət mənada köklü dəyişikliklər var. “Ölkə başçısı tərəfindən həyata keçirilən sosial paketlər özünü Azərbaycan ailəsinin güzəranında açıq şəkildə göstərir. Son bir ildə əməkhaqlarının artması, minimum əməkhaqqının bir ildə 2 dəfə qaldırılaraq 250 manata, minimum pensiyanın 200 manata çatdırılması əhalinin rifah halının yüksəlməsini təmin edir. Sosial sahələrin inkişafı daim Prezidentin diqqət mərkəzindədir. Dövlət başçısının həyata keçirdiyi sosial islahatlar ailələrin vəziyyətinə müsbət təsir göstərib. Göründüyü kimi, Prezidentin sosial sahəyə xüsusi diqqət və qayğısı, imzaladığı fərman və sərəncamlar, qəbul etdiyi qərarlar Azərbaycan ailəsinin xeyrinədir və bu özünü sosial paketlərin timsalında açıq şəkildə göstərir. Düşünürəm ki, 2019-cu il ölkəmizdə sosial inkişaf ili kimi dəyərləndirilməlidir. Prezident İlham Əliyevin həyata keçirdiyi sosial paketlərin əhatə dairəsi çox genişdir və bundan hər bir vətəndaş bəhrələnir. Hesab edirəm ki, son bir ildə qədul edilən sosial paketlər Azərbaycan ailələrinin dayanıqlığının təmin edilməsinə və boşanmaların azalmasına müsbət təsir göstərib. Bir sıra hallarda, ailələrin dayanıqlığını sosial vəziyyətin ürəkaçan olmaması pozurdu, boşanmalara da çox zaman maddi sıxıntılar, bu sıxıntıların gətirdiyi psixoloji, sosioloji gərginlik səbəb olurdu”.
Könül Vaqifqızı: “Hesab edirəm ki, biz bunun daha müsbət nəticələrini qarşıdakı illərdə də görəcəyik”
Psixoloq Könül Vaqifqızı da hesab edir ki, sosial paketlərin ardıcıl olaraq qəbul edilməsindən hər bir vətəndaşa pay düşüb. K.Vaqifqızının sözlərinə görə, bu gün həm paytaxtda, həm də bölgələrdə ailələrin dayanıqlığının təmin olunmasında bu sosial paketlər mühüm əhəmiyyət kəsb edir. “Hesab edirəm ki, ölkə başçısının həyata keçirdiyi sosial islahatlar Azərbaycan vətəndaşlarının, ailələrin həyatında müsbət mənada dəyişikliklərə səbəb oldu. Həm əməkhaqlarının, həm də müavinətlərin artırılması ailələrdə xoş əhval yaratdı. Deyim ki, müraciət edənlərin böyük əksəriyyəti bir çox hallarda sosial problemlər üzündən ailəsində gərginlik olduğunu qeyd edirdilər. Amma müşahidələr göstərir ki, qəbul edilən sosial paketlər vətəndaşların həm maddi rifahına, həm psixoloji-mənəvi vəziyyətinə, həm də ailələrinin qorunmasına müsbət mənada təsirsiz ötüşməyib. Sirr deyil ki, boşanmalara yol açan amillərdən biri hər zaman sosial problemlər olub, bunun nəticəsində ailələr dağılıb, boşanmalar artıb. Bilirsiniz ki, Azərbaycanda boşanmaların sayının azalmasında xeyli irəliləyiş var. Yəni sosial problemlər üzündən ayrılanlar elə də çoxluq təşkil etmir. Ölkə başçısının həyata keçirdiyi sosial paketlər ailələrin qorunmasına, boşanmaların azalmasına yaxşı mənada təsirsiz ötüşməyib. Hesab edirəm ki, biz bunun daha müsbət nəticələrini qarşıdakı illərdə də görəcəyik” - deyə K.Vaqifqızı qeyd etdi.
İradə SARIYEVA
