Xəbər verildiyi kimi, bir neçə gün öncə Bakıda dəhşətli qətl hadisəsi baş verib. Hadisə paytaxtın Sabunçu rayonu ərazisində baş verib. Belə ki, rayonun Bilgəh qəsəbəsi, 28 May küçəsinin ortasında Abbasov Zakir Akif oğlunun bıçaqla qətlə yetirilmiş meyiti aşkarlanıb. Hadisə yerindən 10 metr aralıda yerləşən elektrik transformatorunun kabinəsindən isə daha bir meyit aşkar edilib. Hüquq-mühafizə orqanları əməkdaşlarının keçirdikləri əməliyyat tədbirləri nəticəsində məlum olub ki, kabinədən tapılan meyit Bilgəh qəsəbə sakini, psixi xəstə, 1957-ci il təvəllüdlü Rzayev Sərvər Əlibaba oğluna məxsusdur.
Qeyd edək ki, S.Rzayev əvvəlcə damarlarını doğrayaraq küçəyə çıxıb, qohumu və qonşusu olan, 1977-ci il təvəllüdlü Abbasov Zakir Akif oğlunu bıçaqla qətlə yetirib. Qohumunun öldüyünə əmin olan S.Rzayev yaxınlıqdakı transformator kabinəsinə daxil olaraq yüksək gərginlikli elektrik xəttinə toxunaraq intihar edib.
Məlumat üçün bildirək ki, psixi xəstə S.Rzayev müalicəsini xəstəxana şəraitində deyil, evdə davam etdirib.
Psixi xəstələr xəstəxanadan evə buraxıldıqdan sonra onlara hər hansı formada nəzarət edilirmi?
“Xəstə özü və ətraf aləm üçün təhlükəli sayılarsa, məhkəmənin qərarı ilə həmin şəxs 6 aydan 1 ilə qədər dispanserdə qalıb müalicə olunmalıdır”
1 saylı Ruhi Əsəb Dispanserinin baş həkimi Ağahəsən Rəsulov “Bakı-Xəbər”ə açıqlamasında qeyd etdi ki, S.Rzayev adlı xəstə dispanserdə müalicə alıb. Ancaq həmin xəstə bir ay dispanserdə qaldıqdan sonra müalicəsini ev şəraitində davam etdirəcəyini deyib: “Artıq uzun müddət idi ki, həmin şəxs xəstəxanadan ayrılıb. Dispanserə müraciət edən xəstələr arasında elələri var ki, onlar müalicəyə başladığı andan 2 gün keçəndən sonra müalicədən imtina edir.
Ümumiyyətlə, psixi xəstələr öz istəkləri ilə xəstəxananı tərk edə bilərlər. Adətən xəstələr öz ərizələri ilə xəstəxanaya daxil olurlar. Ona görə də onları məcburi saxlayıb müalicə etmirik. Həmin xəstələr istədikləri vaxt küçəyə çıxa, ərizə yazaraq xəstəxananı tərk edə bilərlər. Bura həbsxana deyil ki, insanları məcburi tutub saxlayaq. Həm də sosial təhlükəsi olmayan xəstə küçəyə çıxdıqda, etdiyi hərəkətlərə özü cavabdeh olur. Xəstə yazılı şəkildə qeyd edir ki, xəstəxanadan kənarda nə baş verərsə, o bütün məsuliyyəti öz üzərinə götürür və müalicəsini ev şəraitində davam etdirəcək. Yazılı ərizə bizə təqdim olunduqdan sonra xəstənin dispanserdən çıxışına icazə veririk. Xəstəxana işçiləri həmin şəxsi güclə saxlaya bilməz”.
Həmsöhbətimiz onu da əlavə etdi ki, xəstə özü və ətraf aləm üçün təhlükəli sayılarsa, məhkəmənin qərarı ilə həmin şəxs 6 aydan 1 ilə qədər dispanserdə qalıb müalicə olunmalıdır: “Elə xəstələr var ki, onlar arasında cinayət törədənlər də olur. Məhkəmə ekspertizasının qərarı ilə cinayət törətmiş ruhi xəstə ruhi əsəb dispanserində müalicə olunmalıdır.
Xəstəxananın baş həkimi onu da vurğuladı ki, psixoloji durumu ağır olan xəstələr cəmiyyətin ən zəif təbəqəsi hesab olunur: “Bunların hər birinin çox acınacaqlı taleyi var. Onlar öz qayğılarına qala bilməyən insanlardır ki, dövlətimiz onlara sahib çıxıb. Buradakı sakinlərimiz pulsuz yemək, dərman və yataq şəraiti ilə tam təmin olunurlar. Texniki avadanlığımız müasir tibbi avadanlıqlardır ki, yalnız bizim dispanserimiz təmin olunub”.
Həmsöhbətimizin sözlərinə görə, ümumi xəstələrin yalnız 1 faizi təhlükəli xəstələr hesab olunurlar: “Remissiya halında yaşaya bilən xəstələr dispanserdən ayrılsalar da, həkim müayinəsinə mütləq gəlməlidirlər. Hətta o xəstələrə ailələri sahib çıxmır. Bəzən insanlar özlərindən asılı olmayan səbəblərdən də xəstələrinə sahib çıxa bilmirlər. Bir sözlə, el-oba qınağından çəkinirlər. Yəni dispanserdən çıxmış xəstələr kiminsə ailəsinə, uşağına sataşıb deyə, ailəsi də məhz bu səbəbdən onu aparmır, qorxurlar ki, yenidən nəsə baş verər. Amma biz belə xəstələri evə yazanda da məsuliyyət daşıyırıq. Çünki bəzən həmin xəstələr kriminal qrupların əlində alətə çevrilirlər, onlara narkotik və s. daşıdırlar”.
Baş həkim qəzetimiz vasitəsilə digər media orqanlarına səsləndi ki, KİV nümayəndələri psixi xəstələrlə bağlı məlumat yazarkən düzgün informasiyanı ictimaiyyətə çatdırsınlar: “Qəyyumların istəyi ilə təbii ki, xəstələr evə buraxılır. Bu zaman baş verəcək hadisələrə qəyyum özü cavabdehlik daşıyır. Yaxınları vaxt məhdudiyyəti olmadan, istədikləri qədər xəstəni evə aparıb saxlaya bilərlər. Jurnalistlərə də səslənirəm ki, "psixi xəstə xəstəxanadan qaçdı" kimi başlıqlı xəbər paylaşmasınlar. Nəzərə almaq lazımdır ki, məcburi saxlanan xəstə qaçdıqda polis onu axtarıb tapır".
Günel CƏLİLOVA
