“Azərpoçt” MMC-nin loqosu ilə vətəndaşların mobil telefonlarına saxta mesajlar göndərilir. Məlum olduğu kimi, bununla əlaqədar “Azərpoçt” vətəndaşlara xəbərdarlıq edib.
Qurumdan bildirilib ki, son zamanlar “Azərpoçt”un loqosu ilə qurumun adından vətəndaşların mobil telefonlarına saxta mesajlar daxil olur. Mesajların mövzusu təxminən belədir: “Təbriklər, “Azərpoçt” istifadəçiləri. Daxil olduğunuz üçün təşəkkür edirik! Yeni “Samsung Galaxy 10” cihazını qazanmaq üçün sizə daha bir şans veririk. Tək edəcəyiniz düzgün hədiyyə qutusunu seçməkdir”.
Mesajda yazılanları icra edən vətəndaşlardan bank kartının nömrəsi tələb olunur. Müəyyən məbləğ ödədikdən sonra hədiyyəsini ala biləcəyi qeyd edilir. Beləliklə, mesajda yazılanlara aldanan vətəndaşların bank kartlarında olan hesablarındakı vəsait mənimsənilir.
Nəqliyyat, Rabitə və Yüksək Texnologiyalar Nazirliyinin Elektron Təhlükəsizlik Xidməti bu cür hallarla rastlaşan vətəndaşların nəzərinə çatdırır ki, internetdən istifadə zamanı veb-brauzeriniz sizi başqa bir sayta yönləndirirsə, bu o deməkdir ki, sizin mobil qurğu və ya kompyuter zərərli proqramla (adware) yoluxub. Bu halda telefonunuza həmin saytdan arzuolunmaz “pop-up” reklamlar gəlir, eyni zamanda, zərərli proqramlar yüklənir. Məqsəd böyük məbləğli pullar və ya uduşlar vəd edərək istifadəçiləri aldatmaqdır.
“Azərpoçt” MMC və Elektron Təhlükəsizlik Xidməti məsələ ilə bağlı araşdırmaları davam etdirir.
Bu cür halların baş verməsi vətəndaşlara yönəlik kibercinayət təhlükəsindən xəbər verir. Hansı ki, vətəndaşların bir çoxu bu kimi mesajların necə təhlükəli olmasının fərqində deyil.
“Qəti şəkildə öz fərdi məlumatlarını heç bir yerə yazmasınlar”
Sözügedən məsələ ilə bağlı fikirlərini “Bakı-Xəbər”lə bölüşən İKT sahəsi üzrə ekspert Şaiq Muradov hesab edir ki, belə hallar kibercinayətkarlığın bir növü olduğu üçün vətəndaşlar ehtiyatlı olmalıdırlar: “Bu minvalla vətəndaşların fərdi hesablarına müdaxilə olunur. Nəticədə onların pulları mənimsənilir. Belə hallar bütün dünyada geniş yayılıb. Bu cür elektron hücumlara pişenq deyirlər. Azərbaycanda əvvəllər belə hallar yox idi və kiminsə fərdi bank hesabına müdaxilə olmurdu. Sadəcə olaraq, indi internet bankın inkişafı ilə əlaqədar olaraq belə təhlükələr ortaya çıxıb. Bu yaxınlarda belə mesajlardan birini incələdim. Kodlarında türk sözlərinə rast gəldim. Ona görə də vətəndaşlar belə hallarda son dərəcə diqqətli olmalıdırlar. Qəti şəkildə öz fərdi məlumatlarını heç bir yerə yazmasınlar. Bu kimi mesajlara cavab verməsinlər. Nəzərə almaq lazımdır ki, bankın vətəndaşın kartının koduna, digər şifrələrinə onsuz da heç bir ehtiyacı yoxdur. Vətəndaş hansısa şübhəli vəziyyətlə üzləşirsə, o zaman dərhal banka gedib şifrələrini dəyişsin. Bizdə bəzi insanlar pulla bağlı reklamlara son dərəcə həssas yanaşırlar. Görürsən sosial şəbəkələrdə elə şirnikləndirici reklamlar verilir ki, bəzən vətəndaşlar buna aldanırlar. Məsələn, reklamda deyilir ki, məlumatlarınızı daxil edin, əvəzində bahalı telefon udacaqsınız. Bəziləri belə reklamlara qoşulur və nəticədə problemlə üzləşirlər. Ona görə də ciddi araşdırma aparmadan belə mesajlara cavab verməsinlər. Bu baxımdan məsələ yenə gəlib fərdi təhlükəsizlik probleminə çıxır. O üzdən, insanlar öz fərdi təhlükəsizliklərinə riayət etsələr, əslində, heç bir problem olmayacaq”.
Vidadi ORDAHALLI
