Bazarda, küçələrdə meyvə qurularının, müxtəlif növ quru çərəzlərin qablaşdırılmadan açıq şəkildə satıldığına rast gəlirik. Təbii ki, açıq havada satışa çıxarılan çərəzlərə ətrafdan toz, mikroblar hopur. Elə çərəzlər var ki, onlar yuyula bilməz. Bu səbəbdən də həmin çərəzlərin açıq şəkildə satışı qadağandır. Ümumiyyətlə, meyvə qurusu və quru çərəzlər yalnız qablaşdırılmış formada satışa çıxarılmalıdır. Ancaq bazar və küçə ticarəti ilə məşğul olanlar çərəzlərin açıq formada satışını həyata keçirirlər.
Ümumiyyətlə, bazarlardakı quru meyvələrin əksəriyyəti normativ-texniki tələblər kobud şəkildə pozulmaqla alıcılara təklif olunur. Müvafiq qaydalara əsasən, qablaşdırılmayan məhsul açıq şəkildə satışa çıxarıla bilməz. Normativ-texniki sənədlərin tələblərinə əsasən, quru meyvələrin qablaşdırılmasında istehsalçı müəssisənin adı və ünvanı, məhsulun adı, növü, çəkisi, istehsal tarixi, yararlılıq müddəti, enerji dəyəri və texniki sənədləşdirmənin nömrəsi barədə məlumatlar qeyd edilməlidir.
Eyyub Hüseynov: “…onların tərkibinin artıq kifləndiyini və xırda qurdlarla zəngin olduğunu müşahidə etmək olar”
Məsələ ilə bağlı fikir bildirən Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında qeyd etdi ki, Nazirlər Kabinetinin qərarına əsasən, Azərbaycan əmtəə bazarında satılan məhsullar qablaşdırılmalıdır. Həmin məhsulların üzərində istehsal tarixi, son istifadə müddəti qeyd olunmalıdır. Həmçinin, istehsalçının adı və ünvanı qeyd olunmalıdır: “Çox təəssüflər olsun ki, quru meyvələr satılan yerlərdə Nazirlər Kabinetinin məlum qərarı icra olunmur. Əksər hallarda, istehlakçılara vaxtı ötmüş quru meyvələr satılır. O məhsullara diqqətlə fikir verilsə, onların tərkibinin artıq kifləndiyini və xırda qurdlarla zəngin olduğunu müşahidə etmək olar. Bu işlərlə məşğul olan qurumlar problemə, demək olar ki, biganəlik nümayiş etdirirlər. Nazirlər Kabinetinin 94 saylı qərarı həyata keçirilmir”.
Həmsöhbətimiz onu da bildirdi ki, qərara əməl etməyib, quru meyvələrin açıq şəkildə satışı ilə məşğul olanlar, qanunvericiliyin tələbinə uyğun olaraq, 400 manat civarında cərimələnə bilər.
Rasif Bağırov: “Açıq şəkildə satılan quru meyvələr və çərəzlər qaraciyər xərçəngi risqi daşıyır”
Həkim-ekspert Rasif Bağırov bizimlə söhbətində bildirdi ki, açıq şəkildə satılan quru meyvələr və çərəzlər qaraciyər xərçəngi risqi daşıyır. Çünki bu məhsullar istehsal zamanı göbələk və bakteriyalardan qorunmaq üçün bir sıra maddələrin təsirinə məruz qalırlar. Bu maddələr isə birbaşa olaraq qaraciyərə pis təsir edir: “Ən çox bayramlarda alınan qoz və fındıq, badam və digər çərəzlərin açıq halda, küçədə, yol kənarında satılması təhlükəlidir”.
Günel CƏLİLOVA
