Son zamanlar bəzi media orqanlarında yaşayan adamların “ölüm” xəbərlərinin yayılmasına tez-tez təsadüf edirik. İndiyə qədər saysız məşhur insanın “ölüm” xəbəri medianın gündəmində yer alıb. İctimaiyyətin diqqət mərkəzində olan insanların “xəstəlik”lərə tutulması, eləcə də “vəfat” etməsilə bağlı məlumatların yayılması həm onların ailə üzvlərini, həm də cəmiyyəti ciddi narahat edir. Həqiqətə uyğun olmayan xəbərlərlə gündəmi dəyişmək istəyənlərin yol verdikləri bu xata “ölüm” xəbərini çıxardıqları insanların özlərinə də psixoloji təsir göstərir.
Sosial şəbəkələrdə, saytlarda sağ ikən "basdırılan" məşhurları hər kəs tanıyır. Xalq artisti Aygün Kazımovanın, Hacı Nuran Hüseynovun, aparıcı Afət Rahilqızının, Xalq artisti Naibə Allahverdiyevanın, müğənni Rahidə Baxışovanın, müğənni Sevda Sanaliyevanın, Xalq artisti Könül Xasıyevanın, Xalq artisti Arif Quliyevin, Əməkdar artist Coşqun Rəhimovun, Əməkdar artist Kübra Əliyevanın, müğənni Samir Bağırovun, müğənni Nazim Pişyarinin, Xalq artisti, cazmen Cavan Zeynallının, eləcə də Xalq şairi Musa Yaqubun, Xalq artisti Yalçın Rzazadənin sosial şəbəkələrdə və bəzi media orqanlarında “ölüm” xəbərləri yayılıb.
Onu da vurğulayaq ki, sağlığında bir neçə dəfə Xalq artisti Habil Əliyevin ölüm xəbəri mediada yer alıb. Sentyabrın 24-də dünyasını dəyişən Tələbə Qəbulu üzrə Dövlət Komissiyasının ilk rəhbəri, tanınmış ictimai-siyasi xadim Vurğun Əyyubun da həyatda olduğu zaman “ölüm” xəbəri bütün ictimaiyyətin narahatlığına səbəb olub.
“Ölüm” xəbəri yayılan məşhurların bir çoxu bunu gülüşlə, yumorla qarşılasa da, yalan məlumata sərt yanaşanlar da az olmayıb. Məsələn, Xalq artisti C. Zeynallı “Mən bilmirəm o xəbərləri kim yayır. Onlar ölümümü istəyən adamlardır. Bundan sensasiya yaratmaq istəyirlər. Ayıb olsun. Bayaqdan zənglərin ardı-arası kəsilmir. Bir dəfə də belə bir hal yaşanmışdı. Şəklimi qara çərçivəyə salıb sosial şəbəkədə paylaşmışdılar. Hamı zəng edirdi ki, Cavan müəllim, hər şey yaxşıdır?” - deyə bildirib.
Qeyd edək ki, Xalq şairi Musa Yaqub isə “ölüm” xəbərinə belə reaksiya verib: “Hər şey yaxşıdır. İsmayıllıda Buynuz kəndindəyəm. Sizi də dəvət edirəm”.
Bəzi media orqanlarının gündəm xatirinə yaratdıqları bu ajiotaj, əslində, onların özlərinə zərbə vurur. Çoxları “bu xəbəri ilk olaraq biz yaydıq, bizə istinad edin” iddiasını da ortaya qoyur. Sonda isə məlumatlarının yalan olduğu üzə çıxır...
“Həmin media qurumları isə vicdansızcasına bu adamların “ölüm” xəbərini çıxarmaqla onların adlarından sui-istifadə edirlər”
Tanınmış media eksperti, Əməkdar jurnalist Azər Həsrət “Bakı-Xəbər”ə bildirdi ki, məşhurların “ölüm” xəbərini yaradanlar süni gündəm yaratmaq istəyənlərdir. Bunun jurnalistlərin peşə etikasına zidd olduğunu qeyd edən A.Həsrət hesab edir ki, dəqiqləşdirilməmiş məlumatların bəzi media orqanlarında yer alması həmin qurumları gözdən salır. “Burada, ilk növbədə, bir vicdan məsələsi var. Çünki bəzi kütləvi informasiya vasitələri cəmiyyətin ən çox həssas olduğu məsələlərə yer verməklə, bir növ, öndə olmaq istəyirlər. Bununla da ictimaiyyətin diqqətini özlərinə cəlb etmək niyyəti güdürlər. Bəzi həmkarlarımız, yaxud da media sahəsinə gələn təsadüfi adamlar sui-istifadə edirlər. Yəni onlar görürlər ki, diqqət məşhur adamlara yönəlib, bu cür yanlış məlumatlar yayırlar, bununla da ajiotaj yaratmağa çalışırlar. Cəmiyyətdə hansı insana diqqət varsa və həssaslıq göstərilirsə, dərhal bu cür media orqanları onunla bağlı qondarma bir məlumat yayırlar. Bir müddət əvvəl Xalq şairi Musa Yaqubun, Xalq artisti Yalçın Rzazadənin, Xalq artisti Cavan Zeynallının “ölüm” xəbərini yayan media orqanları bununla elə hesab etdilər ki, guya “bu xəbər”lə qabağa düşdülər. Onlar tanınan və ictimaiyyət tərəfindən sevilən adamlardır. Həmin media qurumları isə vicdansızcasına həmin adamların “ölüm” xəbərini çıxarmaqla onların adlarından sui-istifadə edirlər. Belə kütləvi informasiya vasitələri məşhur adamların adları ətrafında manipulyasiya etməyə cəhd göstərirlər. Həyatda olan bir insanın “ölüm” xəbərini yayanların bu hərəkətləri ədəb, əxlaq sınırlarını aşan bir məsələdir”.
A.Həsrət hesab edir ki, bu cür yalan xəbər yayan media qurumları “ölüm” xəbərlərini yaydıqları şəxsiyyətlər tərəfindən məhkəməyə verilə və onlara cəza tələb oluna bilər. O qeyd etdi ki, sadəcə, həmin tanınmış insanlar cəmiyyətdə böyük nüfuza malik olduqları və öz abırlarını qoruduqları üçün həmin KİV-i məhkəməyə vermirlər. “Barələrində əsassız “ölüm” xəbərləri yayılan görkəmli insanlar həmin xəbərləri yayanları məhkəməyə verib təzminat tələb edə bilərlər, lakin Musa Yaqub, Yalçın Rzazadə kimi böyük şəxsiyyətlər heç zaman bunu etməzlər. Çünki bunu öz şəxsiyyətlərinə sığışdırmazlar. Biz elə bir cəmiyyətdə yaşayırıq ki, hər hansı bir tanınmış adam haqqında məlumat almaq elə də çətin deyil. Azərbaycan cəmiyyətində çox böyük hörmət sahibi olan, nüfuz qazanan insanların “ölüm” xəbərini yayan bəzi KİV-in, əslində, özü belə xəbərləri yaymaqda maraqlıdır. Bu da onların daha çox izləyici qazanmaq marağı ilə bağlıdır. Ancaq sonda onlar yaydıqları yalan xəbərlərə görə etimadlarını itirirlər və oxucular onların saytlarına, orqanlarına maraq göstərmirlər”-deyə A.Həsrət bildirdi.
İradə SARIYEVA
