Bakıda ənənəvi taksi xidməti getdikcə əhəmiyyətli dərəcədə azalmaqdadır. Müştərilərin sayı əvvəlki kimi deyil. Bunun səbəbi onunla bağlıdır ki, hazırda Bakı şəhərində bir neçə iri taksi xidməti fəaliyyət göstərir. Fəaliyyət ərazisi eyni olsa da, xidmət səviyyəsi, xidmət çeşidi və digər amillərdən asılı olaraq, xidmət haqlarında da fərqlər var. Bu taksi xidmətləri arasında rəqabət get-gedə artır.
Hazırda ən çox sifariş edilən *9933 nömrəli “Salam” taksi, *8555 nömrəli “Ailə” taksi, *9111 nömrəli “Ekonom” taksi, *8844 nömrəli “City” taksi, *5000 nömrəli “Ulduz” taksi və *2111 nömrəli “Maxim” taksi sifarişi xidməti bu siyasəti həyata keçirirlər. İndi müştərilərin əksəriyyəti sözügedən taksi şirkətlərinin xidmətinə üstünlük verir. Bunun bir səbəbi qiymətlərdir, digər amil təhlükəsizlik və sürücünün vaxtında sifariş olunan ünvana gəlməsidir.
Ancaq son vaxtlar müştəriləri narazı salan taksi şirkətlərinin qiymət manevrləridir. Məsələ ondadır ki, sözügedən taksi xidmətlərinin təklif etdiyi qiymətlər heç də hər zaman müştəriləri qane etmir. Hər bir şirkət istədiyi tarifi müəyyənləşdirir. Əvvəlcə müştərini cəlb etmək üçün ucuz qiymətlər təklif edirlər, sonra bazarda yer tutub qiymətləri qaldırırlar.
Bu arada diqqətçəkən məqamlardan biri də ondan ibarətdir ki, eyni məsafəyə görə taksi xidmətləri fərqli qiymət təklif edirlər.
Müqəddəs Kərimov: “Aradakı məsafə eyni olsa da, gedəndə ayrı, qayıdanda tamam ayrı qiymət deyirlər”
Sözügedən məsələ ilə bağlı qəzetimizə şikayət edən Sabunçu rayon sakini Müqəddəs Kərimov *2111 nömrəli “Maxim” taksi sifarişi xidmətinin qiymət siyasətindən narazı olduğunu bildirdi. O, narazılığını belə əsaslandırdı: “2011-ci ildən Maştağa qəsəbəsinin Daş karxanası yaşayış massivində yaşayıram. Ötən ildən *2111 taksi xidmətindən tez-tez istifadə edirik. Buna səbəb sözügedən taksi xidmətinin təklif etdiyi qiymətlərin digərlərinə baxanda nisbətən ucuz olmasıdır. Ancaq son vaxtlar qəribə bir vəziyyətlə üzləşmişik. Problem ondadır ki, *2111 taksi xidmətini sifariş edib harasa gedirik, qayıdan baş yenə sözügedən xidmətə sifariş verəndə fərqli qiymət deyirlər. Hansı ki, aradakı məsafə eynidir. Aradakı məsafə eyni olsa da, gedəndə ayrı, qayıdanda tamam ayrı qiymət deyirlər. Bu günlərdə uşaq xəstələnmişdi. Uşağı Bakıxanovda yerləşən uşaq xəstəxanasına aparası oldum. Evdən xəstəxanaya 5 manata apardı. İki saat ərzində xəstəxanada işlərimizi bitirəndən sonra yenidən *2111 taksi xidmətinə müraciət etdik, bu zaman gedişhaqqının 7 manat olduğunu dedi. Hansı ki, məsafə eynidir, təxminən 16 kilometr. Bir gün ərzində qiymətlərin niyə bu qədər dəyişkən olduğunun səbəbini soruşduqda heç bir izahat vermədilər. Digər qonşularımız da tez-tez sözügedən taksi xidmətindən istifadə edərkən bənzər problemlə üzləşirlər”.
Məsələ ilə əlaqədar *2111 nömrəli “Maxim” taksi sifarişi xidməti ilə əlaqə saxlasaq da, buna aydınlıq gətirən olmadı.
Azər Allahverənov: “Zaman-zaman taksidən istifadə etdiyim üçün, xidmətlərdən və xüsusən də qiymətlərdən o qədər də razı deyiləm”
Sözügedən məsələyə aydınlıq gətirən nəqliyyat sahəsi üzrə ekspert Azər Allahverənov qiymət fərqini bir sıra amillərlə əlaqələndirdi: “Hər bir taksi xidmətinin qiyməti müəyyən edən sistemi mövcuddur. Eyni məsafə olsa da, günün hansı saatlarında olmasından asılı olaraq, qiymət dəyişə bilər. Xüsusilə də pik saatlarında qiymət bir qədər yüksək olur. Mən özüm də zaman-zaman taksidən istifadə etdiyim üçün, xidmətlərdən və xüsusən də qiymətlərdən o qədər də razı deyiləm. Vətəndaş deyə bilər ki, bir saat fərqə görə qiymət fərqlidir. Ancaq yoldakı hərəkət intensivliyini də nəzərə almaq lazımdır. Ola bilər ki, həmin zaman yolda tıxac olub. Yaxud da avtomobillərin sayı bir qədər çox olduğundan, sürət həddi aşağı olub. Tıxacın yaranması üçün 5 dəqiqə də bəsdir. Yəni həmin müddət ərzində yoldakı vəziyyət dəyişə bilər. Bir məqamı nəzərə almaq lazımdır ki, qiyməti sistem yoldakı vəziyyətə görə hesablayaraq müəyyənləşdirir. Dispetçer isə, sadəcə, qiyməti müştəriyə deyir. Bunu vətəndaşların çoxu bilmir”.
Vidadi ORDAHALLI
