“Azərbaycanın milli statistikası göstərir ki, ingilis dili müəllimlərinin dörddə bir hissəsinin ali təhsili yoxdur. Hətta ali təhsili olan müəllimlər belə dərs dedikləri fənn üzrə çox az kompetensiyaya malikdirlər". Bunu Kolumbiya Universitetinin müəllimi, professor Amra Sabic-El-Rayess Təhsilin Qiymətləndirilməsi üzrə Beynəlxalq Assosiasiyanın (IAEA: International Association for Educational Assesment) "Qiymətləndirmə və qərarvermə: fərdi institusional həll yolları" mövzusunda 45-ci illik beynəlxalq konfransın (IAEA 2019) iştirakçılarına müraciətində deyib. Onun sözlərinə görə, təhsil sektorunda da xarici dilin öyrədilməsinə xüsusi diqqət yönəldilməlidir.
Beynəlxalq ekspertin dediyi kimi, bu gün təhsil müəssisələrinin əksəriyyətində tədris olunan ingilis dili fənnini ali təhsilli müəllimlər deyil, ingilis dili kursu bitirən şəxslər keçir. Ekspertlərin bildirdiyinə görə, bu hal daha çox kolleclərdə müşahidə olunur. Kolleclərdə ali təhsilli müəllimlər deyil, hər hansı bir kursu bitirən şəxslər ingilis dili fənnini tədris edə bilər.
Kamran Əsədov: “Kolleclərin maddi-texniki bazasının və kadr potensialının zəif olması yekunda…”
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, Azərbaycan müstəqillik əldə etdikdən sonra təhsildə ciddi kütləviləşmə baş verdi. Xüsusilə də orta ümumtəhsil məktəblərində xarici dillə bağlı ixtisaslara kadr çatışmazlığı yaşandı: “Bunu aradan qaldırmaq üçün kolleclərdə pedaqoji ixtisaslar üzrə plan yerləri açıldı. Qısa müddətdə kolleclərə ingilis dili müəllimlərinin qəbulu həyata keçirildi. Təəssüflər olsun ki, kolleclərin maddi-texniki bazasının və kadr potensialının zəif olması yekunda bilik və bacarıqları zəif olan şəxslərin həmin təhsil müəssisələrində dərs deməsinə səbəb oldu. Kolleclərdə təhsil alan abituriyentlərin buraxılış və qəbul imtahanlarının nəticəsinə nəzər yetirəndə ingilis dili üzrə cavablandırmanın cəmi 26 faiz olduğu aşkar olunur. Bu isə o deməkdir ki, abituriyenlər yalnız az sayda suala cavab veriblər. Belə gerçəklik orta ümumtəhsil müəssisələrində ingilis dili fənninin tədris olunmasının ürəkaçan səviyyədə olmadığını bir daha göstərir. Bu problemi aradan qaldırmaq üçün ali təhsili olmayan şəxslərin dərs saatı alınıb əvəzində ali təhsilli şəxslərə verilməlidir. Ali təhsilli şəxslər tədrisə cəlb olunarsa, rəqabət mühitinin artmasına səbəb olar. Eyni zamanda, diaqnostik imkanları zəif olan müəllimlərin orta ümumtəhsil müəssisələrində fəaliyyətinə xitam verilməlidir. Bu, ölkədə təhsilin inkişafı üçün zəruru amildir”.
Həmsöhbətimiz onu da vurğuladı ki, hər bir insan mütləq şəkildə ingilis dilini 50 faiz səviyyəsində bilməlidir. Ancaq orta məktəbi bitirənlərin ingilis dili səviyyəsi nəinki 50, heç 25 faiz belə deyil: “Onu da deyim ki, təhsil müəssisələrində çalışan müəllimlərin əksəriyyətinin ingilis dili bilmə səviyyəsi 50 faiz deyil”.
Günel CƏLİLOVA
