Azərbaycan Qida Təhlükəsizliyi Agentliyi Bakıdakı arıçılıq məhsullarının satış yarmarkasına çıxarılması planlaşdırılan bal nümunəsindən 25-nin keyfiyyətinin aşağı olduğu müəyyən edib. Agentliyin yaydığı məlumatda qeyd olunur ki, arıçılıq məhsulları "Aqrar Tədarük və Təchizat" ASC-nin Xocahəsən yolu 57 (Meyvəli bazarı) ünvanında yerləşən anbarına daxil olduqdan sonra qurumun əməkdaşları tərəfindən nümunələr götürülür.
Bal yarmarkasına satış üçün gətirilən ballar arasında keyfiyyət göstəriciləri aşağı olan məhsullar aşkarlanıb. Məlumatda qeyd edilir ki, nümunələrin götürülməsinə 14 sentyabr tarixində başlanıb və bu günədək 1795 bal nümunəsi götürülüb, onlardan 1395-nin müayinəsi aparılıb: “395 bal nümunəsindən 25-nin keyfiyyətinin aşağı olduğu müəyyən olunub, digər 1000 nümunənin nəticələri sınaq protokolları tərtib olunandan sonra açıqlanacaq. Yarmarkada yalnız təhlükəsizlik və keyfiyyət göstəriciləri normalara uyğun olan məhsulların satışına icazə veriləcək".
Qeyd edək ki, 28 sentyabr - 18 oktyabr tarixlərində keçiriləcək arıçılıq məhsullarının 20-ci Respublika sərgi-satış yarmarkasında satışa çıxarılması nəzərdə tutulan bal məhsullarından nümunələr götürülərək Azərbaycan Respublikasının Qida Təhlükəsizliyi Agentliyinin tabeliyində fəaliyyət göstərən Qida Təhlükəsizliyi İnstitutunun müvafiq laboratoriyasında ekspertizaya cəlb edilir.
Artıq neçə ildir Bakıda bal yarmarkası keçirilir. Bal yarmarkasına ölkənin dörd bir yanından arıçılıq təsərrüfatı ilə məşğul olanlar istehsal etdikləri məhsulu satış üçün gətirirlər. Gətirilən ballar arasında keyfiyyət göstəricisi aşağı olan məhsullar da var.
“Saxta balın olmaması üçün bölgələrdə və iri şəhərlərdə də keyfiyyətli yoxlama məntəqəsi yaradılmalıdır”
İqtisadçı-ekspert Fuad İbrahimli “Bakı-Xəbər”ə açıqlamasında qeyd etdi ki, saxta balın olmaması üçün bölgələrdə və iri şəhərlərdə də keyfiyyətli yoxlama məntəqəsi yaradılmalıdır. Bal satışa çıxarılmazdan öncə sahibkara həmin məhsulla bağlı sertifikat verilməlidir: “Saxta bal məhsulunun qarşısını almaq üçün fermerlər arasında müəyyən maarifləndirmə işi aparılmalıdır. Eyni zamanda, yarmarkaya saxta məhsul təqdim edənlər inzibati məsuliyyətə cəlb olunmalıdırlar”.
Həmsöhbətimizin sözlərinə görə, təbii bal yetişdirən insanlara müəyyən köməklik göstərilməlidir. Fermerlər arıçılıq məhsulları ilə bağlı preparatlarla təmin olunmalıdırlar. Daha sonra fermerlərə güzəştli şərtlərlə kredit ayrılmalıdır. Süni maneələrin aradan qaldırılması üçün arıçılıqla məşğul olanlara şərait yaradılmalıdır.
Günel CƏLİLOVA
