Bu gün dünyada sürətlə inkişaf edən estetik təbabət həm qadınların, həm də kişilərin diqqətini çəkir. Dünyanın elə bir ölkəsi tapılmaz ki, orada estetik əməliyyata güclü meyl olmasın. Azərbaycanda da estetik əməliyyatlara meyl edənlərin sayında kəskin artım var. Hazırda nəinki sənət adamları, eləcə də sadə insanlar kütləvi olaraq estetik əməliyyata girir və bədənlərinin müxtəlif üzvlərində dəyişikliklərə nail olurlar.
Bu gün cəmiyyətləri ən çox təhdid edən silikonlardır ki, Azərbaycanda da qadınların xeyli qismi sinələrinə, dodaqlarına, yanlarına, ayaqlarına və s. orqanlarına silikon qoydurmaqdan çəkinmir. Baxmayaraq ki, həm uğursuz estetik əməliyyatların, həm də silikonların ciddi fəsadları var və bu hətta qadınların ağır xəstəliklərə tutulmasına, eləcə də dünyasını dəyişməsinə səbəb olur, heç kəs bundan imtina etmək istəmir.
Ekspertlər qeyd edirlər ki, bu gün dünya miqyasında ən çox həyata keçirilən estetik cərrahi müdaxilələrdən biri də sinə böyütmə əməliyyatlarıdır ki, bu əməliyyat döşlərə yerləşdirilən silikon əsaslı protezlərlə həyata keçirilir. Məlumatlara görə, Azərbaycan qadınları da sinə böyütmə və sinə kiçiltmə prosedurlarından bəhrələnirlər. Bu əməliyyatlar nə qədər çox keçirilsə də, döşlərə qoyulan silikonların zərərli olub-olmaması ciddi mübahisə mövzularından biridir. Bir sıra mütəxəssislər özləri qeyd edirlər ki, elə insan var onun orqanizmi silikonları qəbul etmək iqtidarında deyil. Mütəxəssislər vurğulayırlar ki, sinə qadının estetik görünüşünə çox əhəmiyyətli dərəcədə təsir edir. Buna görə də təsadüfi deyil ki, çox sayda qadın döşlərini bir və ya iki ölçü böyütmək üçün bu əməliyyata müraciət edir. Onlar qeyd edirlər ki, əməliyyat sonrası fiziki dəyişikliyə əlavə olaraq, psixoloji cəhətdən də qadınlar özlərini daha yaxşı hiss etdiklərini, özgüvənlərinin artdığını bildirirlər.
Mütəxəssislərin verdiyi bilgiyə görə, döş böyütmə əməliyyatının sadə forması 1800-cü illərdə tətbiq edilməyə başlanıb. Silikon protezlər isə 1960-cı ildən bu yana döş böyütmə əməliyyatında istifadə olunur. Estetik əməliyyatları müdafiə edən həkimlər silikonun bədənə hər hansı bir zərəri olmadığını desələr də, baş verən hadisələr bunun əksini düşünməyə əsas verir.
Məlum olduğu kimi, qadınlar və bəzi kişilər dodaqlarını da silikon etdirirlər. Azərbaycanda dodaqlarını silikon etdirənlər də çoxdur.
Plastik, rekonstruktiv və estetik cərrah İlyas Axundzadənin verdiyi məlumata görə, silikon anlayışı çox səhv bir anlayışdır, amma təəssüf ki, dilimizə sirayət edib. “1950-ci illərdə Amerikada maye silikondan istifadə pik həddə çatmışdı və hər yerdə istifadə edilirdi. 1960-cı illərdə bunun bir çox fəsadı ortaya çıxdı. Bundan sonra həm Amerikada, həm də Avropada maye silikon qadağan edildi” -deyə qeyd edən mütəxəssis bildirib ki, qabaqcıl ölkələrdə qadağan edilən maye silikonlar bu dəfə Rusiyanın kəndlərinə ayaq açır və geniş istifadə edilir. Təəssüf ki, zamanla Azərbaycanda da özünə müştəri tapır.
Hazırda maye silikon müxtəlif adlarla, ən çox da biopolimer adı ilə çox ucuz qiymətə satılır. Buna görə də xanımlar dodaqlarını böyütmək və qırışları açmaq üçün maye silikondan istifadə edirlər. Baxmayaraq ki, bütün ölkələrdə ondan istifadə, onun dəri altına yeridilməsi qadağan edilib.
Aynurə Həsənova: “Silikon edilən nahiyəyə kifayət qədər qan gələ bilmədiyi üçün, burada müqavimət azalır, hər cür infeksiya, mikrob bura daxil olub iltihab yarada bilir”
Həkim-trixoloq Aynurə Həsənovanın sözlərinə görə isə silikonun fəsadları qaçılmazdır. Mütəxəssisin sözlərinə görə, silikon yad maddədir və o, bədənə vurulduqda bədən onun ətrafında çəpər hörməyə çalışır və çox sərt çapıq toxuması əmələ gəlir. “Silikon edilən nahiyəyə kifayət qədər qan gələ bilmədiyi üçün, burada müqavimət azalır, hər cür infeksiya, mikrob bura daxil olub iltihab yarada bilir. Nəticədə silikonun vurulduğu nahiyədə deformasiya yaranır. Əyilmə əmələ gəlir, irinləyir, axıntı verir. Beləliklə, xəstə özünə gözəllik əvəzinə, yeni bir problem qazanmış olur” - deyə o, vurğuladı.
Onu da qeyd edək ki, Azərbaycanda bir sıra aktrisa, müğənnilər bədənlərinin müxtəlif nahiyələrinə silikonlar vurdururlar. Onların bir qismi silikonun zərərini vaxtında anlayıb onu çıxartdırırlar. Mütəxəssislər bildirirlər ki, dodağa, yanağa vurulan silikonlar problemlərə səbəb olduğu üçün, bu istiqamətdə müraciətlər daha çoxdur. Yəni bu insanlar silikondan istifadə edirlər.
Bu gün bəzi qadınlar silikonların yaratdığı fəsadlar nəticəsində ağır xəstəliyə tutulublar. Xalq artisti Naibə Allahverdiyevanın səhhətində yaranan ciddi problemin məhz silikonla bağlı baş verdiyi bildirilir. İndiyə qədər silikon çox insana ağır vəsadlar yaşadıb. Amma qadınlar bunu bilə-bilə yenə də özlərini “oda” atırlar.
Leyla Bayramlı: “Silikon çox insanın sağlamlığını əlindən alıb və onları müxtəlif xətəliklərə düçar edib”
Həkim-terepevt Leyla Bayramlı bizimlə söhbətində bildirdi ki, bu gün silikon qoyduran qadınların çoxu bu addımı atdıqları üçün peşman olduqlarını deyirlər. L.Bayramlının sözlərinə görə, bədənə daxil olan silikonlar çox zaman özləri ilə böyük bəlalar gətirirlər. “Qadınlar heç bir araşdırma aparmadan bədənlərinin əyər-əskiklərini düzəltmək üçün estetik cərrahlara müraciət edirlər. Elə adam var ki, onun bədəninə silkon yerləşdirmək olmaz. Amma o, israrla həkimi məcbur edir ki, əməliyyat aparmalısan. Bu da çox zaman elə insanların əlavə xəstəliklər qazanmasına səbəb olur. Gizlin deyil, silikon çox insanın sağlamlığını əlindən alıb və onları müxtəlif xəstəliklərə düçar edib. Qadınların xeyli hissəsi yaşlanmaları ilə barışmaq istəmir. Bədənlərinin ayrı-ayrı üzvlərinə, eləcə də dodaqlarına, yanaqlarına silikonlar vurdururlar. Bəzən görürsünüz ki, silikonlu qadınlar sonradan bu addımı atıqlarına peşman olduqlarını deyirlər. Çoxları dodaq, yanaq nahiyələrindən silikonları çıxarırlar, deyirlər ki, silikon qoyulan nahiyələri, ümumiyyətlə, hissiyyatsız olub, silikondan azad olunduqdan sonra isə həmin nahiyələrin hissiyyatı özünə qayıdır. Bilirsiniz ki, şou-biznesdə silikonlular həddən artıq çoxdur. Maraqlıdır ki, bir-iki sənətçini çıxmaq şərtilə onların çoxu “mən silikon qoydurmamışam, öz bədənimdir” deyirlər, amma mütxəlif xəstəliklər tutduqdan sonra etiraf etməyə başlayırlar. Təəssüf ki, dünyada silikonun aldığı canlar az deyil, məncə, estetik gözəllikdən öncə insan üçün ən vacib olan sağlamlıqdır” - deyə mütəxəssis qeyd etdi.
Leyla QARAXANLI
