Sosial şəbəkələrdə sürücünün yol polisi inspektorunu təhqir etməsi ilə bağlı videogörüntü yayılıb. Açıq-aydın görünür ki, sürücü çox kobud söyüşlərlə DYP inspektorunu təhqir edir. Buna rəğmən, DYP əməkdaşı özünü qanunun tələblərinə uyğun şəkildə aparır. Yayılan rəsmi məlumatda bildirilir ki, sürücünün bu hərəkətlərinə hüquq-mühafizə orqanları tərəfindən hüquqi qiymət verilib.
Bakı Şəhər Baş Polis İdarəsinin mətbuat xidmətinin rəisi, polis mayoru Elşad Hacıyevin verdiyi məlumata görə, idarədə aparılan ilkin araşdırma zamanı müəyyənləşdirilib ki, sentyabrın 17-də günorta saatlarında 1967-ci il təvəllüdlü, Yasamal rayonunda müvəqqəti qeydiyyatda olan Fəxrəddin Nəsirov idarə etdiyi “KİA” markalı avtomaşınla Nərimanov rayonunun Xətai prospektində hərəkətdə olarkən təhlükəsizlik kəmərindən istifadə etmədiyinə və qanunsuz taksi fəaliyyəti ilə məşğul olduğuna görə yol polisi tərəfindən saxlanıb. Yol polisi sürücü F.Nəsirovun barəsində inzibati xəta haqqında protokollar tərtib etdikdə sonuncu aqressiv formada polis əməkdaşının ünvana etik çərçivədən kənar ifadələr işlədib, ona fiziki təzyiq göstərərək həmin yerdən uzaqlaşıb. Bakı Şəhər Baş Polis İdarəsi Cinayət Axtarış İdarəsi və Nərimanov Rayon Polis İdarəsinin əməkdaşları tərəfindən keçirilən tədbirlər nəticəsində sürücü Binəqədi rayonunda saxlanaraq Polis Şöbəsinə gətirilib.
Vətəndaşla aparılan izahat və araşdırma zamanı o, şəkər və əsəb xəstəliyindən əziyyət çəkdiyini, əməlindən peşman olduğunu bildirib, polis əməkdaşlarından üzr istəyərək həmin vaxt anlaqsız vəziyyətdə olduğunu deyib.
Faktla bağlı Nərimanov Rayon Polis İdarəsində davam etdirilən araşdırma zamanı toplanmış material əsasında F.Nəsirov Nərimanov Rayon Məhkəməsi tərəfindən İnzibati Xətalar Məcəlləsinin 535.1-ci (Polis işçisi və ya hərbi qulluqçu ictimai qaydanın mühafizə vəzifələrini icra edərkən onların qanuni tələblərinə qəsdən tabe olmamağa görə) maddəsi ilə məsuliyyətə cəlb olunmaqla, 15 gün müddətinə inzibati qaydada həbs edilib.
Qeyd edək ki, polisə qarşı xuliqanlıq hərəkəti edən şəxsin Qarabağ müharibəsi veteranı olduğunu əsas gətirib, ona haqq qazandırmağa çalışanlar da var. Bu qəbildən olanlar iddia edirlər ki, guya müharibə veteranı barəsində 15 günlük inzibati həbsin seçilməsi doğru deyil. Onda belə çıxır ki, qanunun aliliyi kiminsə veteran statusu daşımasına görə arxa plana keçməli idi?
Mehman Muradlı: “Dəfələrlə şahidi olmuşam ki, "Qarabağda döyüşmüşəm" deyən şəxslər məmurları, sahibkarları şantaj edirlər və özlərinə hüquq tanımaq üçün digərinin hüququnu pozurlar”
Hüquqşünas Mehman Muradlı “Bakı-Xəbər”ə bildirdi ki, son zamanlar maraqlı tendensiyalar müşahidə edilir: “Hakimiyyətin vətəndaşların şikayətinə, müraciətlərinə daha operativ yanaşmasından, olunan şikayətlərlə bağlı ciddi tədbirlərin görülməsindən bəziləri şantaj məqəsədilə istifadə etməyə çalışırlar. Belə hədəfə tuş gələnlərin sırasında vətəndaşlarla birbaşa ünsiyyətdə olan vəzifə sahibləri daha çox olur. Məmurları, əsasən də polis əməkdaşlarına təhqir dolu ifadələrlə söyməklə yanaşı, onların şantaj edilməsi də geniş vüsət alıb. Sanki həmin şəxslər sosial şəbəkədəki təhqirləri real həyata gətiriblər.
Bu cür şəxslər barəsində qanunamüvafiq tədbir görüləndə isə onların ya Qarabağ döyüşçüsü olmasını qabardır, ya da hansısa bir imtiyazını əsas gətirirlər. Sadəcə, məsələnin problemli tərəfi ondan ibarətdir ki, bu cür şəxslər qanun qarşısında hamının bərabər olması haqqında Konstitusiyada təsbit edilməş müddəanı unudurlar.
Dəfələrlə şahidi olmuşam ki, "Qarabağda döyüşmüşəm" deyən şəxslər məmurları, sahibkarları şantaj edirlər və özlərinə hüquq tanımaq üçün digərinin hüququnu pozurlar. Məsələn, biz praktikamızda tez-tez müharibə veteranları tərəfindən avtomobilləri əzilən vətəndaşlarla rastlaşırıq. Əksər belə hallarda görürük ki, veteranların idarə etdiyi maşınların nömrəsi olmur, bütün şüşələri qara ortüyə bürünür, sığortaları belə olmur. Zərər vurduqları adamların avtomobillərini düzəltməkdən boyun qaçırırlar. Bütün bunları Qarabağda döyüşdükləri ilə əlaqələndirməyə çalışırlar. Bilirsiniz ki, dövlətimiz həmin kateqoriyadan olan insanlara müəyyən imtiyazlar verir. Onlar avtomobil, mənzillə təmin olunurlar. Bütün bunlar olduğu halda, kiməsə imkan verilmir ki, statusundan istifadə edib, qanunun tələblərini pozsun.
Bu cür şəxslərin qanunsuz hərəkətlərinə və açıq təhqirlərinə görə sonradan KİV vasitəsilə üzr istəməsi hesab edirəm ki, tərbiyəvi xarakter daşıyır”.
Məhəmmədəli QƏRİBLİ
