Bilik günündə məktəb müəllimlərinə hədiyyə edilən güllər zibil qutularında – daha səmərəli istifadə təklifləri…

Sentyabrın 16-sı Azərbaycanda yeni tədris ilinin ilk dərs günü idi. Yeni tədris ilində 1 525 016 şagird təhsil müəssilərinə dərsə getdi. Təbii ki, dərsə gedən hər bir şagirdi öz  müəllimləri qarşıladı. Birinci sinfə gedən uşaqlar müəllimlərinə gül buketi hədiyyə edirlər. Bu hal artıq ənənə halını alıb. Sinifdə neçə şagird olacaqsa, hər biri müəlliminə gül buketi təqdim edir. Dərsə gedən şagirdlər müəllimlərini yeni tədris ili münasibətilə təbrik etmək üçün məktəbə gül buketləri gətirirlər.

Amma təəssüf ki, şagirdlərinin gətirdiyi gül buketlərinə ağız büzən müəllimlər də oldu. Elə bu səbəbdən də hövsələsizlik edib onlara təqdim olunan gül dəstələrini güldana deyil, zibil qutularına tulladılar...

Halbuki, ən azı, nəzakət xatirinə həmin buketləri evə apara, sonra heç kim görmədən ata bilərdilər. Amma bəziləri bunu etmədilər. Buketləri elə məktəbin yanındakı zibil qutusuna atdılar. Həm də hamının görə biləcəyi şəkildə, nümayişkaranə...

Müəllimlərə təqdim olunan gül buketinin zibil qabına atılması barədə foto sosial şəbəkədə geniş müzakirə olundu. Müəllimlərin bu hərəkəti valideynlər tərəfindən xoş qarşılanmadı. Əksər valideyn müəllimlərə təqdim olunan gülün zibil qabına atılmasından təəssüfləndi. Pedaqoqlar nəzərə almalı idi ki, güllərin yeri zibil qutusu deyil.

Bəzi ekspertlər təklif edirlər ki, güllər ilk dərs günündən müəllimlərə təqdim olunacaq hədiyyə ilə dəyişdirilməlidir.

• “…onlara kitab, ya da suvenir hədiyyə olunmalıdır ki…”

Sosioloq Aytəkin Kamranqızı bizimlə söhbətində bildirdi ki, Bilik günündə müəllimlərə gül və ya başqa bir hədiyyənin təqdim olunması mütləq deyil: “Qonşu ölkələrdə ilk dərs günü məktəbə gedən şagirdlər müəllimlərinə ya tək qızılgül, ya kitab verir, ya da heç nə vermədən yeni tədrisi ili münasibətilə pedaqoqlarını təbrik edirlər. Analoji qayda ölkəmizdə də tətbiq oluna bilər. Ölkəmizdə müəllimlərə təqdim olunan gül buketinin həcminin iri və güllərin sayının çox olmasına önəm verilir. Valideynlər həmin buketlərə ən azı 30-50 manat dəyərində vəsait xərcləyirlər. Birincilərin əllərində olan gülə nəzər yetirəndə görmək olar ki, buket uşaqların özlərindən böyükdür. Müəllimlər də bəyənmədikləri gül buketini zibil qutusuna tullayırlar. Bilik günündə müəllimlərə hədiyyə olunan gül buketinin zibil qutusuna atılmasından sonra pedaqoqlara gül deyil, kitab, ya da suvenir hədiyyə olunmalıdır ki, onu çölə atmasınlar”.

Günel CƏLİLOVA