Azərbaycanda hüquq-mühafizə orqanlarının cinayətkarlıqla bağlı apardığı mübarizə özünün müsbət nəticəsini verir. Son illər ölkəmizdə ağır cinayətlərin sayında azalma müşahidə edilir.
Daxili işlər naziri, general-polkovnik Vilayət Eyvazov Daxili İşlər Nazirliyində “Mülkiyyət əleyhinə olan cinayətlərin və qeyri-aşkar şəraitdə baş vermiş xırda talamaların qarşısının alınması və açılması”nın, həmçinin, “Polis sahə rəisləri və inspektorları tərəfindən inzibati qanunvericiliyin tətbiqi sahəsində görülmüş işlər”in vəziyyətinə və qarşıda duran vəzifələrə həsr olunan Kollegiya iclasında bir sıra sahələrdə cinayətlərin azaldığını bildirib. “Bu ilin 8 ayında asayişin və ictimai təhlükəsizliyin təmini ilə bağlı qarşıya qoyulmuş vəzifələr, bütövlükdə, layiqincə yerinə yetirilib, cinayətkarlıqla mübarizədə, insan hüquq və azadlıqlarının qorunmasında əldə olunan müsbət nəticələr hesabat dövründə də qorunub-saxlanıb”.
Nazir, həmçinin, bildirib ki, 2018-ci ilin müvafiq dövrü ilə müqayisədə bu ilin 8 ayında qəsdən adamöldürmələrin 13,8, adamöldürməyə cəhdlərin 18,5, qəsdən sağlamlığa ağır zərərvurmaların 1,8, odlu silahın tətbiqi ilə törədilən cinayətlərin 7,5, mülkiyyət əleyhinə olan cinayətlərin 12,2, o cümlədən, quldurluqların 7, hədə-qorxu ilə tələb etmələrin 19, dələduzluqların 27 faiz azaldığını, habelə cinayətlərin açılmasının yüksək olduğunu qeyd edib.
“...polis və ictimaiyyət birliyi bu kimi ağır cinayətlərin dinamikasının azalmasına səbəb olub”
Məsələyə münasibət bildirən “Polisə Dəstək” İctimai Birliyinin sədri Şəmsəddin Əliyev hesab edir ki, qəsdən adamöldürmələrin 13,8, adamöldürməyə cəhdlərin 18,5, qəsdən sağlamlığa ağır zərərvurmaların 1,8 azalması hüquq-mühafizə orqanlarının həyata keçirdiyi tədbirlərlə bağlıdır. “Ümumiyyətlə, son zamanlar ölkədə şəxsiyyət əleyhinə, vətəndaşların sağlamlığına qəsdən zərər vurmaqla bağlı cinayətlərin sayında azalma müşahidə edilir. Əvvala bu, son illər ölkədə sabitliyin qorunub-saxlanması, vətəndaların təhlükəsizliyinin müdafiə olunması, ictimai qaydaların qorunması, bu məsələlərə xüsusi nəzarət olunması deməkdir. Eyni zamanda da bu, dövlətin cinayətkarlıqla mübarizə siyasətinin düzgün formalaşdırılmasının nəticəsidir. Belə bir ifadə vardı: “hər şey nəzarətdədir”. Bu bir az qeyri-adi səslənsə də, amma vacib məsələdir. Bilirsiniz ki, həm Azərbaycan vətəndaşlarının, həm də xarici turistlərin təhlükəsizliyi hüquq-mühafizə orqanları tərəfindən tam şəkildə qorunur. Ölkədə mövcud olan sabitlik, eləcə də vətəndaşların müdafiəsinin yüksək səviyyədə təşkil olunması, ictimai mühitdəki sağlamlıq, polis və ictimaiyyət birliyi bu kimi ağır cinayətlərin dinamikasının azalmasına səbəb olub. Hesab edirəm ki, qəsdən adamöldürmə, adamöldürməyə cəhdlər kimi ağır cinayətlərin azalması polisin cinayətkarlıqla bağlı apardığı mütəşəkkil, davamlı mübarizənin uğurlu nəticəsidir. Burada vətəndaş və polis birliyi amili də var. Vətəndaşlar hər zaman polislə bərabər olmalıdırlar. Belə olduğu təqdirdə həm dayanıqlıq təmin olunar, həm də ağır cinayətlərin sayı daha da azalar” - deyə Ş.Əliyev qeyd etdi.
İradə SARIYEVA
