Bu günlərdə 40 ton yararsız, ölü heyvan ətini satmağa hazırlaşan “Leş Tofiq” və dəstəsi ifşa edildikdən sonra qida təhlükəsizliyi məsələsi bir daha gündəmə gəldi. Bu şəbəkə vasitəsilə “Leş Tofiq” ləqəbli Alıbəy Rzaxanov rayonlardan mənşəyi məlum olmayan, qidaya yararsız, ölmüş heyvan ətlərinin əsasən gecə saatlarında daşınmasını, emal edilməsini, satışa çıxarılmasını təşkil edə bilibsə, deməli, yarasız ət müxətlif iaşə obyektlərinə, burada isə müştərinin önünə qədər gəlib çıxıb, ya dönər şəklində, yaxud da hansısa yeməyin tərkibində.
Təbii ki, bununla bağlı hüquq-mühafizə orqanlarının apardığı araşdırma daha dəqiq danışmağa imkan verəcək. Ancaq aşkarlanan fakt yararsız, mənşəyi məlum olmayan ət probleminin hələ də qaldığını göstərir.
Burada diqqətçəkən maraqlı məqam ondan ibarətdir ki, “Leş Tofiq” ləqəbli Alıbəy Rzaxanov həbs ediləndən sonra dönərxanalarda dönərin qiyməti bir qədər qalxıb. Xüsusən də qiyməti ucuz satılan dönərlərin qiymətində artım var. Məsələn, 1 manata satılan dönər indi 1 manat 40 qəpiyə, 1 manat 40 qəpiyə satılan dönər 1 manat 70 qəpiyə satılır. Bu bir daha onu sübut edirmi ki, həqiqətən də indiyə qədər bəzi dönərxanalarda satılan ucuz dönərlər məhz yararsız heyvan ətindən hazırlanıb?
“Bu cür yararsız ət məhsulları nəinki dönərxanalara, şadlıq evlərinə, müəyyən kafelərə də aparılır”
Məsələyə münasibət bildirən Azad İstehlakçılar Birliyinin sədri Eyyub Hüseynovun sözlərinə görə, dönərxanalara yararsız ətin verilməsi yeni deyil: “Mən 22 ildir “leş mafiyası” ilə vuruşuram. Beş il bundan əvvəl 4-cü mikrorayonda gecələr onların leşi necə təmizləyib ətə qarışdırdığını görmüşəm. Gecə saat üçdə başıma xüsusi papaq keçirib getdim ora. Məni görən kimi bir-birinə işarə verib oradan məni uzaqlaşdırdılar. Bir sıra qurumlara bununla bağlı müraciət etdim. Yalnız polis müraciətimə cavab olaraq bu işi araşdırmağa başladı. Digər qurumlar bunun üzərinə getmədi. Dəfələrlə Sabirabad rayonunun Xəlfəli kəndində olan Əlifxan adlı şəxsə sifariş göndərmişəm ki, bu pis əməllərdən əl çək. Bildiyim qədər, sözügedən şəxs indi həbsdədir. Deməyim odur ki, həqiqətən də “leş mafiyası” ilə dönərxanalar arasında əlaqə var. Ucuz dönərlər məhz bu cür yararsız ət məhsullarından hazırlanır. Daxili İşlər Nazirliyinin “Leş Tofiq” ləqəbli Alıbəy Rzaxanovla bağlı əməliyyatını çox yüksək qiymətləndirirəm. Fikrimcə, bu cür yararsız ət məhsulları nəinki dönərxanalara, şadlıq evlərinə, müəyyən kafelərə də aparılır. Yaxşı olardı ki, Qida Təhlükəsizliyi Agentliyi bu cür ətlərə tələbin haradan gəldiyini geniş araşdırsın. Daha sonra onu cəmiyyətə açıqlasın. Ölkənin oxunan qəzeti olan “Bakı-Xəbər” vasitəsilə deyirəm, din xadimləri, bələdiyyələr belə hallara qarşı göz yummamalı və bunu qınamalıdırlar. Ümumən cəmiyyət bu məsələdə ayıq-sayıq olmalıdır. Ən başlıcası, bu işlə məşğul olanlar sərt cəzalandırılmalıdırlar”.
Vidadi ORDAHALLI
