10/12/2019 08:21
728 x 90

Bəzi alış-veriş saytlarının həm də “intim xidmət” saytlarına çevrilməsi hiss olunmağa başlayır

Fatimə Hacıbəyli: “İnsan alveri ilə məşğul olan şəxslər öz qurbanlarının çoxunu elə bu cür saytlar vasitəsilə tələyə salırlar”

img

Son vaxtlar müxtəlif alış-veriş saytlarında xanımla tanış olmaq istəyənlərin sayı artıb. İlk baxışdan gülməli olsa da, bunu edən yüzlərlə insan var. Fotolarını və özləri barədə məlumatları tanışlıq üçün sosial şəbəkələrdə paylaşan insanlar əmlak və əşya satışı üçün nəzərdə tutulan elan saytlarında da fəaldırlar. Alış-veriş saytlarında kiminləsə tanış olmaq istəyənlər “Gözəl xanımla tanış olmaq istəyirəm”, “Yaraşıqlı oğlanlar, özünə güvənənlər və ciddi olanlar zəng etsin” tipli elanlara rast gəlmək mümkündür.

Kişilərlə bərabər “ömür-gün yoldaşı” axtarışına çıxan xanımlar da bu saytlara müraciət edirlər:

“Sadə, səmimi, təmiz, sadəlövh birini axtarıram. Ətraflı “WhatsApp”da danışaq. Bir uşağım var, boşanmışam”.

Ekspertlər bu növ elanlara xüsusi nəzarət edilməli olduğunu deyirlər. Bu addıma görə cavabdehlik məhz həmin elan saytlarının üzərinə düşür. Ekspertlər bir çox məlumatın qeyd edildiyi belə elanlar vasitəsilə şantaj edilənlərin də az olmadığını deyirlər. Onu da qeyd edək ki, pul müqabilində tanışlıq və ya digər əməllər insan alverinin predmeti qəbul edilə və cinayət tərkibi hesab oluna bilər.

  • “Alış-veriş saytlarında “tanış olmaq olar” tipli elandan istifadə edənlərin əsas məqsədi özünə ömür-gün yoldaşı tapmaq yox, əylənmək üçün tərəf müqabili axtarmaqdır”

 “Vəfa” Sosial-İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, alış-veriş saytlarında xanımla (bəylə) tanış olmaq kimi elanların yayılmasının məqsədi əxlaqsızlığın yayılmasıdır: “Bu tip saytlar aidiyyəti qurumların nəzarətində olmalıdırlar. Alış-veriş etmək üçün həmin sayta daxil olan şəxs tanışlıq elanı görərsə, dərhal hüquq-mühafizə orqanlarına müraciət etməlidir. Danılmaz faktdır ki, bu cür tanışlıq saytından istifadə edənlərin əsas məqsədi özünə ömür-gün yoldaşı tapmaq yox, əylənmək üçün tərəf müqabili axtarmaqdır. Yəni bu tip saytlar üzərindən tanışlıqlar əyləncə xarakteri daşıyır. Xarici ölkələrdə tanışlıq saytları vasitəsilə bir-birini tanıyan gənclərin, hətta bir qədər yuxarı yaş həddində olan insanların evlənməsi halları çoxdur. Amma bizdə belə hallar barmaqla sayılacaq həddə ola bilər. Hətta əks cinsin nümayəndələri arasında belə saytlardan istifadə edib qeydiyyatdan keçən xanımlara münasibət də birmənalı deyil. Bu bizim xalqın mental dəyərləri, ailəyə münasibətilə bağlı formalaşmış adət-ənənələrə əsaslanır. Azərbaycanda tanışlıq saytları vasitəsilə ailə quranların çoxu əcnəbilərlə izdivaca girənlərdir. Onların da çoxu bu cür tanışlığın qurbanına çevrilir. Bu gün də insan alveri qurbanları arasında tanışlıq saytları vasitəsilə xaricə gedib aldanan, qurbana çevrilənlər az deyil”.

Həmsöhbətimiz onu da vurğuladı ki, gənclər bu tip elanlar üzərindən qurulan münasibətlərdə diqqətli olmalıdırlar: “Nəzərə almaq lazımdır ki, bu cür saytlardan insan alverçiləri də yararlanırlar. Onlar öz qurbanlarının çoxunu elə bu cür saytlar vasitəsilə tələyə salırlar. Tanışlıq saytlarında qeydiyyatdan keçən xanımlar arasında ilk ailə həyatı uğursuz olan gənc qadınlar daha çoxdur. Belə qadınlar insan alverçiləri üçün həmişə maraqlı olub. Onlar xaricdə gözəl həyat vəd edərək evlənmək üçün dəvət etdikləri qadını asanlıqla öz tələlərinə sala bilirlər. Tanımadığı ölkədə sənədləri əlindən alınan qadınlar insan alverçilərinin əmrinə tabe olmaq məcburiyyətində qalırlar. Qurbanların dediklərindən də üzə çıxır ki, belələrinin tanışlıq saytları üzərindən münasibət qurmasının məqsədi elə aldatmaq xarakterli olub. Onlar arasında işgəncələrə və cinsi istismara məruz qalanlar çoxluq təşkil edir”.

Günel CƏLİLOVA

Son xəbərlər