20/10/2019 19:13
728 x 90

Azərbaycanda hər 10 ailədən birində sonsuzluq problemi və sonsuzluğun ciddi səbəbi…

img

Yenicə ailə quran gənclərin adətən böyük həvəslə seyr etdikləri bir mənzərə var. Parklarda totuq uşaqların valideynlərinin ətrafında oynaması, arabadakı körpənin şirin qığıltıları, dil açan zaman söylədiyi ilk sözlər... Onlar da bir müddət sonra ata-ana olub körpələrinin əlindən tutaraq parka gəzintiyə çıxacaqları günün xəyalı ilə yaşayırlar. Bəzən isə bu təbii arzu elə xəyal olaraq da qalır.

Bütün dünyada gündən-günə artmaqda olan sonsuzluq bəlası neçə-neçə ailəni körpə nəfəsinə həsrət qoyur. Təəssüf ki, ölkəmizdə də övladsız ailələr var. Ailədə boşanma hallarına rəvac verən ilkin səbəblərdən biri elə sonsuzluqdur.Açıqlanan statistik rəqəmlərə əsasən, 2019-cu ilin 6 ayında ölkədə 8 324 boşanma qeydə alınıb. Qeyd etdiyimiz kimi, boşanmaların əsas səbəblərindən birinin sonsuzluq olduğu bildirilir. O da bildirilir ki, ölkəmizdə hər 10 ailədən biri sonsuzluqdan əziyyət çəkir.

Mütəxəssislərin fikrincə, sonsuzluqdan əziyyət çəkənlərin sayının artması səbəbi valideynlərin övladını (qız və ya oğlan) ginekoloji və androloji müayinə etdirməməsidir.

  • Pərvanə Mustafayeva: “Bəzi valideynlər “USM-də nə işi var?", “həkimə apararam, qızımı ginekoloji masaya çıxarar” düşüncəsilə övladında olan hansısa narahatlıqların müalicəsi üçün həkimdən imtina edirlər”

Ginekoloq Pərvanə Mustafayeva bizimlə söhbətində bildirdi ki, qız valideynləri 13-14 yaşından sonra il ərzində övladını ultrasəs müayinəsi etdirməlidir: “Təəssüflər olsun ki, bəzi valideynlər “USM-də nə işi var?", “həkimə apararam, qızımı ginekoloji masaya çıxarar” düşüncəsilə övladında olan hansısa narahatlıqların müalicəsi üçün həkimdən imtina edirlər. Ümumiyyətlə, valideynlər qız uşaqlarının ginekoloji orqanlarının müayinəsindən qorxurlar. Belə olduğu halda, sonsuzluqdan əziyyət çəkən qızların sayı artır. Məlumat üçün bildirim ki, sonsuzluq əlamətləri erkən yaşlarda müəyyən ediləndə onu aradan qaldırmaq daha asan olur. Qızlar 14 yaşından başlayaraq ginekoloqun nəzarətində olmalıdırlar. Ginekoloqa getmək o demək deyil ki, həkim ona hansısa müdaxilələr edəcək. Sadəcə, həkim sual-cavab əsasında, USM vasitəsilə həmin uşaqda ginekoloji problemlərin olub-olmadığını müəyyən edə biləcək. Neqativ hal müəyyən olunanda həmin uşaq qan müayinəsinə cəlb olunmalıdır”.

  • Ramiz Abdullayev: “Valideynlər uşaqlarının sağlamlığı üçün onları elə uşaq vaxtında həkimə aparmalıdırlar ki, sonradan peşmançılıq yaşanmasın”

Androloq Ramiz Abdullayev bizimlə söhbətində vurğuladı ki, kişi sonsuzluğunun səbəbləri müxtəlifdir. Səbəblərdən biri də uşaq yaşlarında keçirilmiş olan epidemik parotit (“svinka”) xəstəliyidir: “Bu xəstəlik zamanı oğlan uşaqlarında xayalar zədələnir. Əgər xəstəlik zamanı uşaqda baş verən xayanın iltihabı kifayət qədər güclü olarsa və bu zaman tələb olunan müalicə kursu aparılmazsa, bu, son nəticədə xayaların funksiyasının xeyli dərəcədə pozulmasına və sonsuzluğa səbəb ola bilər. Məhz buna görə uşaqlara epidemik parotitə qarşı vaxtında müayinə, müalicə və peyvənd edilməsi tövsiyə olunur. Fərqi yoxdur, oğlan və ya qız, valideynlər uşaqlarının sağlamlığı üçün onları elə uşaq vaxtında həkimə aparmalıdırlar ki, sonradan peşmançılıq yaşanmasın”.

Günel CƏLİLOVA

Son xəbərlər