Yeni dərs ilinin başlanmasını şagirdlər qədər valideynlər də böyük həyəcanla gözləyirlər. Artıq 2019-2020-ci tədris ili başlayıb. Məktəbin başlamasına bir neçə gün qalmışdan valideynləri ən çox qayğılandıran məsələrdən biri övladına hansı nəşriyyat evinin çap edib satışa buraxdığı məktəbli gündəliyini almaqla bağlıdır.
Valideynlər uşaqlarına hansı gündəliyi alması ilə bağlı çaş-baş qalıblar. Qeyd etdiyimi kimi, bütün satış mərkəzlərində bir neçə formada məktəbli kitabçaları satılır. Satıcılar valideynləri inandırmağa çalışırlar ki, təqdim edilən bütün məktəbli kitabçaları məktəblər tərəfindən qəbul edilir. Əslində isə belə deyil. Satışda olan bütün gündəliklərin heç də hamısı məktəblər tərəfindən qəbul edilmir. Məktəbli kitabçası şagirdin dərs vaxtı öyrəndiklərini qiymətləndirmək üçün bir vasitədir və burada hər şey öz qaydasında olmalıdır ki, kurikulumun bütün tələblərinə cavab verə bilsin. Sirr deyil ki, satışda olan məktəbli kitabçalarının arasında standartlara uyğun olmayanları da var. Məktəbli kitabçalarının çoxçeşidli olması cəmiyyətdə əməlli-başlı çaşqınlıq yaradıb. Valideyn satışda olan istənilən bir məktəbli kitabçasını alıb məktəbə təqdim edəndə, bir çox hallarda, məktəblərdən “biz bu gündəlikləri qəbul etmirik, siz filan nəşriyyatın çap etdiyi gündəliyi almalısınız” deyirlər. Bu da valideynləri narahat etməyə bilməz.
Onu da qeyd edək ki, məktəbli kitabçalarının qiymətləri də fərqlidir, hər nəşriyyat özünün çap etdiyi gündəliyə xüsusi qiymət qoyur. Bir neçə ildir gündəmdə olan bu məsələnin həlli yalnız ölkə üzrə məktəblərdə vahid məktəbli kitabçasının tətbiq edilməsilə mümkün ola bilər. Mövcud problem vahid məktəbli kitabçasının tətbiqinə zərurət yaradıb.
İlqar Orucov: “Məktəbli kitabçaları ilə bağlı nazirlik tərəfindən hər hansı bir tövsiyə, qadağa yoxdursa...”
Gənc Alim, Aspirant və Magistrlər Cəmiyyətinin sədri, Təhsil Nazirliyi yanında yaradılan İctimai Şuranın üzvü, fizika-riyaziyyat üzrə fəlsəfə doktoru İlqar Orucov bununla bağlı “Bakı-Xəbər”ə bildirdi ki, məktəbli kitabçaları ilə bağlı məsələ ictimaiyyəti hər zaman ciddi narahat edir. “Valideynlərdən hansı məktəbli kitabçasını almalı olduqları ilə bağlı tez-tez suallar, narazılıqlar eşidilir. Bilirsiniz ki, vahid məktəbli kitabçası ilə bağlı Təhsil Nazirliyi tərəfindən hər hansı bir tövsiyə və qadağa yoxdur. Bunun nəticəsidir ki, müxtəlif mətbəələrdə fərqli formatlarda məktəbli gündəlikləri çap ounur və satışa buraxılır, onların qiymətləri də fərqli olur. Tutalım, məktəbli kitabçalarının qiyməti 1 manat 50 qəpikdən, 2 manatdan başlayaraq müxtəlif qiymətlərə olur. Bu da sözsüz ki, müəyyən problemlərə səbəb olur. Ölkə məktəblərində vahid məktəbli kitabçasının tətbiq edilməməsi insanları çaş-baş salır. Bir də görüsünüz ki, bir məktəb, yaxud bir sinif rəhbəri “sizin aldığınız gündəlik yararlı deyil, filan gündəliyi alın” deyir. Fikrimcə, məktəbli kitabçaları ilə bağlı nazirlik tərəfindən hər hansı bir tövsiyə, qadağa yoxdursa, sinif rəhbəri gündəliklə bağlı heç bir tələb qoya bilməz, bu halda təqdim edilən bütün gündəliklər qəbul edilməlidir. Qaldı ki, vahid məktəbli kitabçasının qəbul edilməsinə, bu məsələyə baxılmalıdır. Ölkə məktəblərində vahid məktəbli kitabçasının tətbiq edilməməsi insanları çaş-baş salır. Hesab edirəm ki, gələcəkdə bütün məktəblərdə vahid məktəbli kitabçasından istifadə edilərsə, bu, mövcud problemin aradan qalxmasına səbəb olar”.
İ.Orucov qeyd etdi ki, İctimai Şurada cəmiyyəti narahat edən bu kimi məsələlərin müzakirəsinə yer veriləcək. O, həmçinin, vurğuladı ki, konkret olaraq məktəbli kitabçaları ilə bağlı ictimaiyyət tərəfindən şikayətlər, təkliflər olarsa, İctimai Şura bunu müzakirə etməyə hazırdır. “Bununla bağlı İctimai Şuranın hər hansı bir qərarı olarsa, biz bunu nazirliyə tövsiyə edəcəyik. Bu gün gündəliklər keyfiyyətinə görə də fərqlənir. Elə gündəliklər var ki, çox keyfiyyətli çap olunub, eləsi də var ki, çox zəif keyfiyyətlidir, onlar dərs ilinin sonuna qədər davam gətirmir” - deyə İ.Orucov qeyd etdi.
İradə SARIYEVA
