16/10/2019 14:19
728 x 90

Vilayət Eyvazovdan DİN-də daha bir islahat...

Mehman Muradlı: “İnsanlarımızda yol keçmək mədəniyyəti formalaşıb”

img

Bakının küçə və prospektlərində piyadaların hərəkətinə nəzarət edən post-patrul xidməti əməkdaşlarının fəaliyyəti dayandırılıb. Piyadaların hərəkətinə nəzarət edən və bu zaman yolu müəyyən olunmamış yerdən keçənləri saxlayan post-patrul xidmətinin əməkdaşları son günlər gözə dəymir.

Bununla bağlı Daxili İşlər Nazirliyinin Mətbuat Xidmətinin rəisi Ehsan Zahidov bildirib ki, ötən ilin mart ayından Daxili İşlər nazirinin əmri ilə piyadalar tərəfindən yol hərəkəti qaydalarının pozulmasının qarşısının alınması məqsədi ilə Bakı şəhərinin rayon polis idarələrinin, eləcə də respublikanın digər şəhər və rayon polis orqanlarının post-patrul xidməti əməkdaşlarına yol patrul xidməti inspektorlarına aid olan səlahiyyətlər verilib: "O vaxt belə bir qərarın verilməsinə ehtiyac var idi. Lakin post-patrul xidməti əməkdaşlarının qayda pozanları saxlayaraq protokollar tərtib etməklə onları cərimələmələri piyadaların vaxt itkilərinə, bəzən də narazılıqlarına səbəb olurdu. Bütün bunları nəzərə alan Daxili İşlər naziri, general-polkovnik Vilayət Eyvazov bu günlərdə müvafiq əmr imzalayıb. Əmrə əsasən, post-patrul nizami hissələri əməkdaşlarına verilmiş yol patrul xidməti inspektorlarına aid olan səlahiyyətlərə xitam verilərək, qanunla müəyyən olunmuş vəzifələrinin icrasını davam etdirmək üçün onlar daimi xidmət yerlərinə qaytarılıblar”.

DİN tərəfindən verilən bu əmri necə dəyərləndirmək olar?

Hüquqşünas Mehman Muradlı baki-xeber.com-a bildirdi ki, DİN rəhbəri cənab Eyvazovun piyada keçidlərində post-patrul hissələrinə verilmiş səlahiyyəti ləğv etməsi mütərəqqi addımdır: “Cənab nazirin bu məsələyə müasir texnologiyaların imkanından yararlanmaqla yanaşması zamanın tələbi olduğunu ortaya qoymuş oldu. Bir çoxumuzu bir sual maraqlandırır: indi istədiyimiz yerdən keçə biləcəyikmi? Birmənalı olaraq bu suala cavab olaraq bildirirəm ki, xeyr, bu mümkün olmayacaq. Çünki yeni texnologiyalardan istifadə etməklə üztanıma kameraları vasitəsi ilə inzibati xəta törədən piyadaların müəyyən edilməsi o qədər də çətin olmayacaq. Əvvəl inzibati xətalar məcəlləsinin müvafiq maddəsinin icra edilməsi üçün bu cür tədbirlərə post-patrul xidmətinin cəlb edilməsi zərurəti var idi. İndi isə həmin zərurət tam olmasa da, aradan qalxıb. İnsanlarımızda yol keçmək mədəniyyəti formalaşıb. Bunda polisin böyük əməyi olub və bunu danmaq olmaz. Buna baxmayaraq, yenə də inzibati xəta törətməyə meylli vətəndaşlarımız var. Bununla yanaşı qeyd etmək istəyirəm ki, post-patrul əməkdaşlarının cinayətkarlıqla mübarizədə kifayət qədər işi var və bu yöndə fəaliyyət göstərmələri cəmiyyət üçün daha yaxşı olardı. Bütün aspektlərdən yanaşdıqda bu əmri təqdirəlayiq sayıram. Vətəndaşlarımız da insan faktorunun olmamasını nəzərə alıb, bir qədər də diqqətli olsunlar, qayda pozmağa meyl etməsinlər. Bu, həm onların təhlükəsizliyinə, həm də büdcələrinə xeyirdir”.

Məhəmmədəli QƏRİBLİ

Son xəbərlər