16/10/2019 14:22
728 x 90

Ramiz Zeynalova münasibətdə yanaşmanı pozan media orqanları...

Azər Həsrət: “Bu araşdırmaların fonunda qətlə yetirilənin mənfi imicinin formalaşdırılması heç də yaxşı deyil”

img

Tovuzda sabiq məhkəmə sədrinin bir biznesmen tərəfindən güləllənməsi ilə bağlı hadisəni bəzi KİV maraqlı təqdimatla şərh edir. Məsələn yazırlar ki, qətlə yetirilən Firudin Ələkbərli nə vaxtsa buraxdığı kobud qanun pozuntularına görə onun hakimlik səlahiyyətinə vaxtından əvvəl xitam verilib.

Sonra qeyd edirlər ki, özünü vəkil kimi təqdim edən bu şəxs Vəkillər Kollegiyasının üzvü deyil, yalnız nümayəndəlik fəaliyyəti göstərib. Yaxşı, götürək ki, bu belədir. Onda belə çıxır ki, hansısa media quruluşu həmin adamı mənfi xarakterizə etməklə hadisə ilə bağlı yanlış təsəvvür formalaşdırmağa çalışır?

Qətli törədən "Göl Əli" ləğəbli iş adamı ilə bağlı da maraqlı təqdimat edilir. Onun da general Ramiz Zeynalovla və ya digər vəzifəli şəxslərlə olan qohumluğu əsas gətirilərək, xəbərlərə həmin vəzifəli şəxslərin fotosu qoyulur. Bir anlıq elə təsəvvür yaranır ki, sanki baş vermiş cinayət hadisəsinə həmin generalın də aidiyyəti var. Təbii ki, bu cür təqdimat da doğru deyil.

Mövzu ilə bağlı media ekspertlərinin fikirlərini öyrənmək maraqlıdır: jurnalistlər bu məsələdə yanlışlıq edir, yoxsa yox?

  • “Hər hansı vəzifəli şəxsin qətlə heç bir aidiyyəti yoxdursa, onun şəkilinin bu hadisənin təqdimatında verilməsi çox yanlışdır”

Media üzrə mütəxəssis Azər Həsrət baki-xeber.com-a bildirdi ki, burada adam öldürməklə nəticələnən bir cinayət hadisəsindən söhbət gedir: “Təbiidir ki, media diqqəti məhz bu faktın üzərinə cəmləməlidir. Yəni xəbər olaraq burada kriminal mahiyyət qabardılmalıdır. Əgər hadisəni daha dərindən araşdırmaq istəyirlərsə, buyursunlar. Qətlin nə səbəbdən, hansı şəraitdə baş verdiyi ilə bağlı jurnalist araşdırmaları aparıla bilər. Lakin bir faktı da nəzərə almalıyıq ki, hazırda istintaq gedir, media da istintaqın gedişinə mane  sayılan, istintaq sirri hesab olunan məlumatları tirajlamamalıdır. Qətlə yetirilən şəxsin əvvəllər harda işləməsi və ya işdən hansısa səbəbdən uzaqlaşdırılmasının bu hadisələrə o qədər də dəxli yoxdur. Ola bilər ki, qətlə yetirilənin keçmişi media üçün maraqlı olsun. Amma onu mənfi xarakterizə edən məlumatların xüsusi olaraq qabardılması artıq başqa niyyətlərdən xəbər verir. İstər mənfi, istərsə də müsbət xarakterizə olunmağına baxmayaraq, ortada bir qətl hadisəsi var. Bu araşdırmaların fonunda qətlə yetirilənin mənfi imicinin formalaşdırılması heç də yaxşı deyil. Eyni sözləri qətlə yetirənlə bağlı yayılan məlumatlara da aid edə bilərik. Həmin adamın hansısa yüksək vəzifəli şəxslərlə yaxın və ya uzaq qohum olması xüsusi olaraq qabardılmamalıdır. Cünki həmin adam uşaq deyil ki, kiminsə himayəsində yaşasın. Ağlı başında olan adam öz əməllərinə görə özü cavab verməlidir. Əgər hər hansı vəzifəli şəxsin qətlə heç bir aidiyyəti yoxdursa, onun şəkilinin bu hadisənin təqdimatında verilməsi çox yanlışdır. Bizim media bu məsələdə bir qədər diqqətli olmalıdır. Dəxli olmayan xüsusatlar həmin təqdimatda olmamalıdır. Buna riayət edilmirsə, media etikasının pozulması anlamına gəlir. Jurnalistlər bu detalları mütləq mənada nəzərə almalıdır”.

Məhəmmədəli QƏRİBLİ

Son xəbərlər