16/10/2019 14:14
728 x 90

İşləmək üçün xaricdən Azərbaycana gələn miqrantların sayı artır

Azər Allahverənov: “Son illər ölkədə sahibkarlıqla məşğul olmaq istəyənlər üçün əlverişli mühit yaranıb, bu hal əmək miqrasiyasının canlanmasına da səbəb olub”

img

Artıq müəyyən müddətdir Azərbaycana müxtəlif ölkələrdən gələn miqrantların sayı artan xətt üzrə inkişaf edir. Son dövrlərdə isə ölkəmizə gələn miqrantların sayı günü-gündən artır.

Əmək və əhalinin sosial müdafiəsi naziri Sahil Babayev BMT-nin bütün əməkçi miqrantlar və onların ailə üzvlərinin hüquqlarının müdafiəsi üzrə komitəsinin iclasında çıxış edərək bildirib ki, Azərbaycana gələn miqrantların sayının artmasının başlıca səbəbi sahibkarlıq fəaliyyəti üçün əlverişli mühitin yaradılması, demokratik institutların genişlənməsi, ölkə iqtisadiyyatının inkişafı və əhalinin yaşayış səviyyəsinin yüksəlməsidir: “2018-ci ildə iş icazəsi əsasında ölkədə işləyən əcnəbilərin sayı 7000 nəfərə yaxın olub. Bu isə 2003-cü illə müqayisədə 4 dəfə çoxdur. Hazırda nazirliyin əmək müqaviləsi bildiriş sistemində əcnəbilərlə bağlanmış 9962 əmək müqaviləsi qeydiyyatdadır”.

Azərbaycana işləmək üçün gələn miqrantların sayının artması barədə fikir bildirən miqrasiya sahəsi üzrə ekspert Azər Allahverənov baki-xeber.com-a açıqlamasında qeyd etdi ki, son illər ölkədə sahibkarlıqla məşğul olmaq istəyənlər üçün əlverişli mühit yaranıb. Bu hal əmək miqrasiyasının canlanmasına da səbəb olub: “Əmək miqrasiyasının inkişaf etməsində Dövlət Miqrasiya Xidmətinin də xüsusi rolu var. Məlumat üçün bildirim ki, Dövlət Miqrasiya Xidmətinin yanında iki mühum məşvərətçi qurum var. O qurumlardan biri əcnəbi fəaliyyətinə cəlb edən sahibkarlıq subyektlərinə nəzarət edir.

Digər məşvərətçi qurum isə həm sahibkarlıq xidmətləri ilə məşğul olur, həm də işçilərlə bağlı qaldırılan məsələləri müzakirə edir”.

Həmsöhbətimiz onu da vurğuladı ki, Azərbaycana işləmək üçün gələn miqrantların sayının artmasının səbəblərindən biri də ölkədə həyata keçirilən iri layihələrlə bağlıdır: “Hər hansı bir ölkəyə işləmək üçün üz tutan əcnəbilər ilk növbədə orada əmək fəaliyyətinin hansı səviyyədə olduğunu araşdırır. Ölkəmizdə tikinti, aqrar və digər sahələrdə inkişafın qeydə alınması əcnəbilərin ölkəmizdə işləmək istəyinin artmasına səbəb olur. Bununla yanaşı, qanunvericilikdə əcnəbilərə çalışması üçün şəraitin yaradılması da, onların ölkəmizdə əmək fəaliyyətilə məşğul olmasına səbəb olur”.

Günel CƏLİLOVA

Son xəbərlər