“Kontakt Home” mağazalar şəbəkəsinin tələbələrlə bağlı apardığı kampaniyasından narazılıqlar var. Bildirilir ki, şirkət bu məqsədlə yaydığı məlumatda "İstər Bakı, istərsə də bölgə qeydiyyatlı hər tələbə, sadəcə, tələbə bileti və şəxsiyyət vəsiqəsi ilə “Kontakt Home” mağazalar şəbəkəsinin istənilən filialından 1200 manatadək ilkin ödənişsiz nisyə məhsul ala bilər", - vurğusunu xüsusi qeyd etsə də, əslində, bu, hər tələbəyə aid deyil.
Bununla bağlı şikayətlərini sosial media vasitəsilə ictimailəşdirən tələbələr bildirirlər ki, sentyabrın 4-də “Kontakt Home”un "xüsusi kampaniya"sına inanıb, “28 Moll”la üzbəüz yerləşən filialdan telefon almaq istəyiblər: "Əvvəla şirkət tamamilə qanunsuz reklam kampaniyası aparır. Diqqət etmisinizsə, onların reklam roliklərinin üz qabığında "hər tələbəyə 1200 manat ayırırıq" ştrixti var. Bunlar bank deyil, bankir deyil ki, pul ayırsın. "Reklam haqqında" Qanuna görə, reklamın mahiyyəti aldadıcı deyil, aydın olmalıdır. Yəni bunlar açıq bəyan etməlidirlər ki, tələbələrə 1200 manatlıq məhsul verə bilərik və s.
Digər yandan, bunlar əvvəldən açıq bəyan etməlidirlər ki, biz 4-cü kursda, yaxud qiyabi təhsil alanlara məhsul vermirik. Tələbələr bunu bilsə, heç vaxt itirib, mağazalara getməzlər. Necə ki, mən itirdim. Orada mənə dedilər ki, sənə düşmür. Gah dedilər sən qiyabisən, gah da dedilər 4-cü kursda oxuyursan. Halbuki, 3-cü kursu bitirsəm də, 4-cü kursun dərsləri heç başlamayıb. İkincisi, mən 12 aylıq deyil, 6 aylıq kreditə telefonu götürmək istəyirdim. Amma sonda da dedilər ki, qiyabilərə, ümumiyyətlə, vermirik. Bakı qeydiyyatı və ev nömrəsi olan adam gətirim, onun adına versinlər. Sözüm odur ki, indi elə kampaniya aparırlar ki, guya bunların tələbələrə canı yanır". Tələbə deyir ki, dostu oradan telefon alan zaman da maraqlı faktla üzləşiblər: "Baxın, dostum oradan əvvəl də kreditə məhsul alıb, hətta vaxtından əvvəl birinin ödənişini bitirib, digərini də vaxtlı-vaxtında ödəyir. Lakin bu dəfə yeni telefon götürmək istəyəndə, ona deyiblər ki, ilkin ödəniş etməlisən. Halbuki, hər yerdə "ilkin ödənişsiz, faizsiz telefonlar", - deyə haray salıblar. Nə isə. Aydın olub ki, ikinci telefon üçün 25 manat ödəniş + 20 manatlıq da telefona proqram yazılmalıdır”.
Qeyd edək ki, “Kontakt Home” mağazalar şəbəkəsinin başqa bir reklamının da olduğu barədə məlumat almışıq. Oxucular deyirlər ki, şəbəkə köhnə noutbukların mağazaya verilməsini əhalidən xahiş edir. Bildirilir ki, həmin cihazlar təmir olunduqdan sonra ölkənin ucqar rayonlarındakı ehtiyacı olan insanlara təmənnasız verilir. Vətəndaşlar maraqlanırlar ki, bunun müqabilində köhnə avadanlıqları təqdim edən şəxsə hansısa ödəniş və ya yeni mal əldə edəcəyi təqdirdə güzəşt edilirmi?
Biz “Kontakt Home” şəbəkəsi ilə əlaqə saxladıq. Şikayətlər və təkliflər şöbəsinin məsul əməkdaşı Fəridə Rzayeva “Bakı-Xəbər”ə bildirdi ki, birinci halda söhbət “bək tu skul” “məktəbə qayıdış” kampaniyasından gedir: “Şikayətlərə fərdi qaydada yanaşılır. Əgər kiminsə konkret şikayəti varsa, istənilən filialımıza müraciət edib, bunu dəqiqləşdirə bilər. Ümumən isə həmin kampaniya ilə bağlı verilən məlumatların hamısına əməl olunur. Məsələn, əlavə ödənişlə bağlı deyə bilərəm ki, eyni telefondan ikinci dəfə alınırsa və birinci telefonun dəyərinin 30 faizi ödənilibsə, onda ilkin ödəniş tələb edilmir. Bu olmayıbsa, ilkin ödəniş tələb oluna bilər. Proqram yazılması isə müştərinin istəyinə bağlıdır. İstəsə bunu edə bilər, istəsə kənarda elətdirər. Başqa yerdə də bu xidmətdən pul alırlar. Həmin kampaniyadan yararlanmaq üçün müəyyən olunan kriteriyalara uyğun gəlinməlidir. Ancaq hansısa tələbənin neçənci kursda oxuması önəmli deyil. Burada nəsə yanlışlıq olub. Köhnə noutbukların yığılıb təmir edildikdən sonra əyalətlərə göndərilməsi ilə bağlı isə şirkətimiz tərəfindən heç bir kampaniya aparılmır. Ola bilər ki, bu məsələdə bizi hansısa şirkətlə dəyişik salırlar. Bir daha qeyd edirəm ki, kimsə élan olunan kampaniya ilə bağlı hansısa qanunsuzluqla rastlaşıbsa, buyurub “qaynar xətt”imizə müraciət edə bilər. Kampaniyada nəzərdə tutulmayan detalları isə biz şirkət olaraq təqdim edə bilmirik”.
Məhəmmədəli QƏRİBLİ
.jpg)
.jpg)
