Bu gün təəssüf ki, sosial şəbəkələrdə Azərbaycan polisinin fəaliyyətinə kölgə salmaq istəyən qüvvələr var. Onlar, bir qayda olaraq, polislə bağlı həqiqətə uyğun olmayan məlumatlar, fikirlər yayırlar. Son günlər sosial şəbəkələrdə yayılan belə əsassız məlumatlardan biri də “əxlaq polisi”nin yaradılması ilə bağlıdır. Sosial şəbəkələrdə Azərbaycanda “əxlaq polisi”nin yaradılacağı barədə şayiələr yayılır. Bu cür söz-söhbətlər polisin Bakının mərkəzində turistlərə intim xidmət təklif edən yüngül əxlaqlı qadınlara qarşı mübarizəni gücləndirməsindən qaynaqlanır.
Daxili İşlər Nazirliyi (DİN) Mətbuat xidmətinin rəisi, polis polkovniki Ehsan Zahidov mətbuata açıqlamasında sosial şəbəkələrdə yayılan bu məlumatın əsassız olduğunu qeyd edib. E.Zahidovun sözlərinə görə, paytaxt sakinlərinin çoxsaylı müraciətini nəzərə alaraq, polis əməkdaşları Bakının bir sıra mərkəzi küçələrindən, xüsusən də “Torqovı”dan (Nizami küçəsi) Azərbaycan xalqının milli dəyərlərinə, mentalitetinə zidd hərəkətlərə yol verən və turistlərə ədəbsiz təkliflər edən qadınları yığışdırıb və onlara müvafiq xəbərdarlıq ediblər: “Polisin bu hərəkətləri, bütövlükdə, şəhər sakinləri tərəfindən müsbət qarşılanıb. Ancaq son günlər sosial şəbəkələrdə bəzi istifadəçilər polisin bu hərəkətlərinə əsaslanaraq, Azərbaycanda yeni bir qurumun - “əxlaq polisi”nin yaradılacağı barədə məlumatlar yayırlar. Bununla əlaqədar olaraq bildirirəm ki, bu bəyanatlar əsassızdır. Ümumiyyətlə, nə keçmişdə, nə də bu gün Daxili İşlər Nazirliyində “əxlaq polisi” strukturunun yaradılması üçün heç bir layihə olmayıb və yoxdur”.
Aydın Quliyev: “Ortaya "əxlaq polisi” deyilən məsələni atanlar bu gün öz işini yüksək dəqiqliklə görən DİN-in səlahiyyətlərinin bir hissəsinin başqa quruma verilməsi ilə onun rolunu azaltmağı hədəfləyirlər”
“Bakı-Xəbər” qəzetinin baş redaktoru Aydın Quliyev öz “Facebook” hesabında Azərbaycanda “əxlaq polisi” yaradılacağı ilə bağlı şayiələrə tutarlı cavab verib: “DİN adından Ehsan Zahidov bu gün (dünən – İ.S.) operativ qaydada təkzib yaysa da, sosial şəbəkələrdə guya Azərbaycanın ayrıca “əxlaq polisi”nin yaradılacağı barədə yaydırılan xəbərlərə təsadüf kimi baxmıram. Bunlar polisə qarşı aparılan qaralama kampaniyalarının başqa formada davamına da oxşayır. Polis ictimai asayişin və qanunçuluğun böyük dayağı olduğu üçün, onun imicini qaralayanların, əslində, hansı hədəfi vurduqlarını görürük. Ortaya "əxlaq polisi"deyilən məsələni atanlar isə bu gün öz işini yüksək dəqiqliklə görən DİN-in səlahiyyətlərinin bir hissəsinin başqa quruma verilməsi ilə onun rolunu azaltmağı hədəfləyirlər. Əslində, hədəf eyni deyilmi?! Əxlaqi mühitə və milli-mənəvi dəyərlərə zidd olan hərəkət və təzahürlərlə mübarizədə indiki DİN orqanları nəyi kəm-kəsir və ya yarıtmaz edir ki?!...”.
Şəmsəddin Əliyev: “Bu qüvvələrə “əxlaq polisi” şayiəsini yaydıranlar var və onların da məqsədi...”
Sosial şəbəkələrdə bəzi qüvvələrin “əxlaq polsi”nin yaradılacağı ilə bağlı yaydığı şayiənin ölkəmizin və polisimizin imicinə zərər vurmağa xidmət etdiyini bildirən “Polisə Dəstək” İctimai Birliyinin sədri Şəmsəddin Əliyev hesab edir ki, bu əsassız söz-söhbəti meydana atan adamların özlərinin əxlaqında ciddi qüsur var. Ş.Əliyevin sözlərinə görə, 100 yaşlı Azərbaycan polisi on illərdir ölkəmizdə asayişin, dincliyin təmin olunmasını həyata keçirir. “Azərbaycan dövləti milli-mənəvi dəyərləri hər zaman qoruyan bir ölkədir. Azərbaycan polisi 100 ildir dövlətimizin, xalqımızın, qonaqlarımızın dincliyini, asayişini qoruyur. Sosial şəbəkələrdə “Azərbaycanda “əxlaq polisi” yaradılır” deyə əsassız kampaniya aparan adamların özlərinin əxlaqında ciddi qüsur var. Onlar Azərbaycan polisinin fəaliyyətinə, onun cinayətkarlıqla mübarizəsinə, bu sahədə gördüyü mühüm tədbirlərə kölgə salmaq, “Azərbaycanda əxlaqsızlıq baş alıb gedir” şayiəsini dövriyyəyə buraxmaq istəyirlər. Əslində isə belə deyil. Azərbaycan polisi öz fəaliyyəti, öz ayıq-sayıqlığı ilə bütün vətəndaşların qayğısına qalır, onların təhlükəsizliyini qoruyur. Hesab edirəm ki, “əxlaq polisi” kimi cəfəng, mənasız, əsassız bir qondarma məsələni ortaya atan adamların özlərinə qarşı ictimaiyyət barışmaz mövqe sərgiləməlidir. İctimaiyyət hər bir addımda polisin zəhmətinə, əməyinə dəyər verməlidir. Polis öz vəzifəsini çox yüksək səviyyədə yerinə yetirdiyi bir halda, başqa qondarma təsisatın yaradılmasını ortaya atan adamlar ciddi məsuliyyət daşıyırlar”.
Ş.Əliyev qeyd edtdi ki, bu qondarma məsələni sosial şəbəkələrdə yayan şəxslər bununla paytaxtımıza və respublikamıza gələn turistlərin fikrini çaşdırmaq, onları bura gəlməkdən çəkindirmək məqsədi güdürlər. “Halbuki, Azərbaycanda belə bir problem yoxdur. Sosial şəbəkələrdə “əxalq polisi” yaradılır deyə yazan adamların özləri əxlaqsızlığa xidmət edirlər. Bu qüvvələrə “əxlaq polisi” şayiəsini yaydıranlar var və onların da məqsədi aydındır - Azərbaycan polisinin fəlaiyyətinə, zəhmətinə kölgə salmaq” - deyə Ş.Əliyev vurğuladı.
İradə SARIYEVA
