“Bu yöndə aparılan siyasət əhalinin mənzil təminatının daha da yaxşılaşmasına xidmət edir”
Azərbaycanda dövlәt hesabına mәnzil alan vә yaşayış şәraitini yaxşılaşdıran ailәlәrin sayı artıb. Belə ki, 2010-cu ildə Azərbaycanda 743, 2015-ci ildə 501, 2016-cı ildə 1 764, 2017-ci ildə 2 484 ailə dövlәt hesabına mәnzil alıbsa, 2018-ci ildə belə ailələrin sayı 4 402-ə yüksəlib.
Qeyd edək ki, həmin mənzillərin 1 968-i Bakının, 2 214-i Abşeron iqtisadi rayonunun payına düşüb.
Məlumata görə, Abşeronda 1 209, Sumqayıtda 1 005 ailəyə dövlət hesabına mənzil verilib.
Görünən odur ki, dövlət tərəfindən əhalinin mənzil təminatının yaxşılaşdırılması üçün ardıcıl tədbirlər görülür. Bununla yanaşı, Qarabağ əlilləri və şəhid ailələri üçün dövlətin ayrıca proqramı mövcuddur ki, hər il yüzlərlə belə ailə mənzillə təmin olunur.
O da məlumdur ki, mənzil təminatı müasir ailənin mühüm problemlərindən biri hesab edilir. Xüsusilə də aztəminatlı sosial qruplar üçün mənzil sahibi olmaq ailənin maliyyə dayanıqlığının gücləndirilməsi, ailə büdcəsinin daha səmərəli idarə edilməsi, həyat şəraitinin yüksəldilməsi və digər sosial xidmətlərə çıxış imkanlarının artırılması baxımından ciddi əhəmiyyət daşıyır. Dünya təcrübəsinin təhlili göstərir ki, sosial xarakterli mənzil proqramlarında ailənin mənzil xərclərinin onların ümumi gəlirlərində payının 40-50 faizdən artıq olmaması məqsədəuyğun hesab edilir. Azərbaycanda dövlət vəsaiti hesabına mənzil sahibi olan ailələrin sayının artması dövlətin bu sahəyə göstərdiyi diqqətin nəticəsidir.
- Vüqar Bayramov: “Mənzil sahibi olanların sayının artmasını vətəndaşların ev probleminin həlli istiqamətində atılmış addım kimi qiymətləndirirəm”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Vüqar Bayramovun sözlərinə görə, dövlət vəsaiti hesabına mənzil alanların sayının artması müsbət tendensiyadır: “Bu yöndə aparılan siyasət əhalinin mənzil təminatının daha da yaxşılaşmasına xidmət edir. Ona görə də bu təqdirəlayiq haldır. Ümumilikdə, dövlət tərəfindən əhalinin mənzil probleminin həlli ilə bağlı fərqli layihələr həyata keçirilir. Bu layihələr də nəticə etibarilə daha çox vətəndaşın sözügedən proqramlardan istifadə etməklə mənzil əldə etməsinə gətirib çıxarır. Nəzərə almaq lazımdır ki, artıq ölkədə sosial evlərlə bağlı layihə həyata keçirilir. Birinci mərhələdə 2 minə yaxın mənzil, daha sonra isə 3 min sosial mənzilə vətəndaşlar sahib olacaq. Ondan sonra daha 2 min mənzil istifadəyə veriləcək. O baxımdan mənzil sahibi olanların sayının artmasını vətəndaşların ev probleminin həlli istiqamətində atılmış addım kimi qiymətləndirirəm. Çünki mənzil probleminin həlli sosial baxımdan vacibdir. Hazırda kirayə mənzil fondu da formalaşmaqdadır. Bu ondan xəbər verir ki, 2023-cü ildə dövlət proqramları vasitəsilə daha çox ölkə vətəndaşının öz mənzil problemini həll etməsini müşahidə edəcəyik”.
Vidadi ORDAHALLI
