19/09/2019 17:26
728 x 90

Bakının “ən xəstə” rayonları – niyə…

“Bu gün paytaxt ərazisində istifadəyə yararsız yetərincə avtomobil var, həmin nəqliyyat vasitələrindən qara tüstü atmosferə buraxılır”

img

Bakıda xəstəliklərin ən çox hansı rayonda qeydə alındığı açıqlanıb. Açıqlanan məlumatlara görə, ən çox xəstəlik paytaxtın Xətai rayonunun əhalisində müşahidə edilib. Belə ki, adıçəkilən rayonda 2017-ci ildə 68371 xəstəlik qeydə alınıb. Binəqədi rayonu isə paytaxt əhalisinin daha çox xəstələnməsi kateqoriyasına görə ikinci yerdədir.

2017-ci ildə Binəqədi sakinləri arasında 67816 xəstəlik qeydə alınıb. Yasamalda 56588, Sabunçuda 49634, Nəsimidə isə 47080 xəstəlik müşahidə olunub.

Paytaxtın Pirallahı rayonunun əhalisi isə az xəstələnir. Bu rayonda 2017-ci ildə 4056 xəstəlik halı müşahidə edilib.

Qeyd edək ki, bəzi infeksion və parazitar xəstəliklər kateqoriyasında isə Nəsimi rayonu öndədir. Belə ki, 2017-ci ildə Nəsimidə 12680 nəfər bəzi infeksion və parazitar xəstəliyə yoluxub. Tənəffüs orqanlarının xəstəliklərinə görə isə Binəqədi yenə "liderdir". Eyni dövrdə Binəqədidə 31617 şəxs tənəffüs orqanı xəstəliyindən əziyyət çəkib. Sabunçuda isə bu kateqoriya üzrə 18496 xəstəlik qeydə alınıb. Bakıda ağciyər vərəminə yoluxma halı da daha çox Sabunçuda olub. 2017-ci ildə Sabunçuda 96 nəfərə ağciyər vərəmi diaqnozu qoyulub.

2017-ci ildə Xətaidə 74, Yasamalda 69, Xəzərdə 51, Qaradağda 50 nəfər vərəmə yoluxub. 2017-ci ildə Pirallahıda cəmi 3 nəfərə vərəm diaqnozu qoyulub. Bununla da Pirallahı ən az vərəmlə xəstələnən rayonlar siyahısına düşüb. Pirallahıda 2017-ci ildə sifilis, kəskin xroniki süzənək, viruslu hepatit və qoturluq qeydə alınmayıb. Ən çox sifilis xəstəliyi isə Nəsimidə qeydə alınıb (60 nəfərdə). Sabunçuda isə bu rəqəm 52 olub. Məlumat üçün bildirək ki, Bakıda qoturluq isə ən çox Binəqədidə yayılıb. 2017-ci ildə Binəqədidə 11 nəfərdə qoturluq aşkarlanıb.

  • Adil Qeybulla: “Əhalinin böyük əksəriyyəti paytaxt ərazisində toplaşdığı üçün, xəstəliklər bölgələrlə müqayisədə daha çox Bakıda qeydə alınır”

Bakı rayonlarının xəstəliklər üzrə göstəriciləri barədə fikir bildirən professor, tibbi ekspert Adil Qeybulla “Bakı-Xəbər”ə açıqlamasında qeyd etdi ki, əhalinin böyük əksəriyyəti paytaxt ərazisində toplaşdığı üçün xəstəliklər bölgələrlə müqayisədə daha çox Bakıda qeydə alınır. Eyni zamanda, bu gün paytaxt ərazisində  istifadəyə yararsız yetərincə avtomobil var. Həmin avtomobillərdən qara tüstü atmosferə buraxılır: “Havanın çirklənməsi xəstəliklərin artmasına səbəb olur. Nəzərə almaq lazımdır ki, 1 kubmetr havada 1 nanoqram benzokratilin maddəsi varsa, bu, xərçəng təhlükəsi yaradır. Bununla yanaşı, içməli su məsələsi də problemlərdən biridir. Ölkəyə daxil olan ərzaq məhsullarının keyfiyyət parametrləri çox aşağıdır. Bəzi qidalara əlavə dad və rəng qatılır ki, bu da insanların sağlamlığına təsir edir”.

Günel CƏLİLOVA

Son xəbərlər