14/11/2019 09:48
728 x 90

Tortla “Allah rəhmət eləsin!” - əcaibləşən adətlərimiz…

Cəmşid Əliyev: “Doğmasını itirən şəxsin evinə əlində tortla gəlmək düzgün deyil”

img

Tort əsasən ad günlərinin, gənclərin nişan və toy mərasiminin və bayramların simvolu hesab edilir. Azərbaycanda biz tortun artıq hüzr mərasimlərinin də simvoluna çevrilməsinin şahidi olmaqdayıq. Artıq bir neçə gündür sosial şəbəkədə üstündə “Allah rəhmət eləsin" yazılmış tort şəkli paylaşılır.

Sosial şəbəkədə yayılan məlumatlara görə, artıq Azərbaycanın bəzi bölgələrində yas mərasimində, xüsusən də mərhumun 40 mərasimində yas sahibinin evinə başsağlığına gələnlər tort və şirniyyat gətirirlər. Bunun da mənası ondan ibarətdir ki, guya bununla hüzr sahibinin evində bundan sonra şadyanalıq olsun.

Bu paylaşım insanların böyük qınağına səbəb olub.  Hətta bəziləri bu şəklə "şamı da mərhum üfürəcək", "ölən adamın şirinliyidir?" tipli ironiyalı rəy bildiriblər.

Məlumdur ki, yas mərasimindəki ehsan süfrələrində halva, qoğal, xurma, turşməzə konfet kimi şirniyyat növləri qoyulur. Baxmayaraq ki, bunu da düzgün hesab etməyənlər az deyil.  Bəs belə olan halda yas məclisində tort bişirilməsi, üzərinə "Allah rəhmət eləsin" yazılması nə dərəcədə düzgündür?

  • “Yas məclisi üçün hazırlanan tort həm insanların gülüşünə səbəb olur, həm də qıcıqlandırır”

İlahiyyatçı Cəmşid Əliyev bildirdi ki, yas mərasimlərində süfrəyə hər təamın verilməsi düzgün deyil: “Bu günlərdə sosial şəbəkədə üzərində “Allah rəhmət eləsin” yazılmış tort şəkli paylaşılıb. Bu olay həm insanların gülüşünə səbəb olur, həm də qıcıqlandırır. Məlumdur ki, yas mərasimlərinin özünəməxsus, yüz illərlə formalaşmış qayda-qanunları var. Yas mərasimi kədərin göstəricisidir, yas düşən evdə qədimdə ocaq tüstüləməzdi neçə gün. Əzizi ölənə qonşusu yemək bişirib gətirərmiş. Ancaq indi yas mərasimlərində süfrəyə hər cür təam düzülür. Hüzr məclislərində süfrənin zənginləşdirilməsinin əleyhinə çıxdığımız ərəfədə indi də yas üçün xüsusi tortlar hazırlanır. İnsanlar tort bişirməyə gülüş obyekti kimi səthi yanaşırlarsa, bunu edən adamlar həmin əməldən çəkinsələr, daha yaxşı olar. Danılmaz faktdır ki, tort insanların xoş günləri üçün hazırlanır. Ancaq doğmasını itirən şəxsin evinə əlində tortla gəlmək düzgün deyil. Dinimiz ümumi olaraq deyir ki, insanlar çalışsınlar barmaqla göstəriləcək bir hərəkət etməsinlər ki, kimlərəsə özlərini güldürməsinlər. Bu cür qaydalardan çıxış edərək, insanlar müəyyənləşdirməlidirlər ki, hansı addımı atmaq olar, hansını yox".

Günel CƏLİLOVA

Son xəbərlər