19/09/2019 11:20
728 x 90

Klinikalarda həkim qəbulunun qiyməti 50-dən 100 manata qaldırıldı

“Bu gün həkimlərin anormal qiymətlər qarşılığında xəstə qəbulu həyata keçirməsi tibbi sığortanın olmamasından irəli gəlir”

img

Son dövrlər Azərbaycanda özəl xəstəxanaların sayı getdikcə artmaqdadır. Təbii ki, hər klinikada analizlər, həkim qəbulu üçün müəyyən məbləğ ödənilməlidir. Həkim qəbulunun qiyməti ildən-ilə dəyişir. Həmin həkim az da olsa tanınırsa, el arasında məşhurdursa, onun qəbuluna yazılmaq üçün daha artıq məbləğ ödəmək lazımdır. İki-üç əvvəl həkim qəbuluna yazılmaq üçün 30 manat ödəniş olunurdusa, ötən il bu məbləğ 50 manata yüksəldi. Bu ildən isə həkimlər xəstə qəbulu üçün 80-90-100,  80 manata olanlar isə 120 və daha yuxarı ödəniş olunmasını tələb edirlər.

Sosial şəbəkədə özəl klinikalarda çalışan, qəbulu 100-150 manatı keçən həkimlərin ilkin siyahısı açıqlanıb:

1. Azər Fərəc – 112-177 AZN - Fetal ultrasonoqrafiya üzrə Azərbaycanın 1 nömrəli peşəkar mütəxəssisdir. Özəl klinikada çalışır, bu məbləğə hamilənin 2 dəfə dopleri daxildir. Məbləğ birinci qəbulda ödənilir.

2. Zakir Əliyev – 150 AZN - Azərbaycan Tibb Universitetinin nevrologiya kafedrasının professoru. Həm dövlət, həm özəl klinikada çalışır. Uşaq nevroloji xəstəlikləri üzrə bir nömrəli həkim hesab edilir.

3. Uzman psixiatr İkram Rüstəmov – 120 AZN - Daha çox uşaqlarda autizm diaqnozunun təsdiqlənməsi üçün valideynlərin seçimi olur. Özəl klinikada çalışır.

4. Dermatoloq Leyla Mirzoyeva– 100 AZN.

5. Mama-ginekoloq Aytən Səfərova - 100 AZN.

6. Psixoloq Babək Bayramov - 100 AZN.

7. Ginekoloq-cərrah Turab Canbaxışov - 95 AZN.

8. Pediatr Erkin Rəhimov – 90 AZN.

9. Ginekoloq Natiq Məhərrəmov – 90 AZN.

Ekspertlərin fikrincə, həkimlərin yüksək məbləğ qarşılığında xəstə qəbul etməsinin səbəbi icbari tibbi sığortanın tətbiq olunmaması ilə bağlıdır.

  • Adil Qeybulla: “Hər kəs üçün hər bir həkim əlçatan olmalıdır”

Tibb elmləri doktoru, professor Adil Qeybulla “Bakı-Xəbər”ə açıqlamasında qeyd etdi ki, Azərbaycanda bu sahədə çox ciddi problemlər var. Televiziya ekranlarında, sosial şəbəkələrdə həkim reklamları dünyanın heç yerində yoxdur: “Axı nəyə xidmət edir bu reklamlar? Həkim reklamı ancaq korporativ maraqlara xidmət edir. Hesab edirəm ki, bu reklam məsələsi peşəkarlıqla ziddiyyət təşkil edir. Dünyanın hər yerində hansısa bir yeni müalicə üsulu olanda xəstələrə məlumat verilir. Əslində, şou xarakterli reklamlar pul üçündür və heç kim inkar etmir ki, bu çox baha başa gəlir. Sonra isə bu reklama verilən pullar xalqın belinə yüklənir. Həmin o qəbul pullarını qaldıran və əlçatmaz edən də bu hallardır. Digər tərəfdən, insanlar özləri də aldanmamalıdırlar. İnsanlar reklama getməməli, məlumatlı olmalıdırlar. Ümumiyyətlə, peşəkar həkim heç vaxt reklama getməz”.

Ekspertin fikrincə, bu gün həkimlərin anormal qiymətlər qarşılığında xəstə qəbulu həyata keçirməsi tibbi sığortanın olmamasından irəli gəlir. Tibbi sığorta olarsa, xəstə istədiyi həkimin qəbuluna rahatlıqla düşə bilər: “Əhalinin dövlət xəstəxanalarına bir o qədər də etibarı qalmadığı üçün, özəl klinikalardakı yüksək qiymətə də olsa, həkimlərin qəbuluna yazılmalı olurlar. Bu gün Azərbaycanda özəl sektorun xüsusi çəkisi olduqca yüksəkdir. Dünyanın heç bir yerində özəl tibb sektoru bu qədər güclü inkişaf etməyib. Sosial dövlətlərdə, xüsusilə Avropa ölkələrində, Almaniya, İngiltərədə özəl sektor tibbin maksimum 5 faizini təşkil edir. Azərbaycanda isə bu göstərici 60-70 faizdir.

Özəl sektorun da iş prinsipi hamıya məlumdur. Onlar öz qiymətlərini özləri müəyyənləşdirirlər və dövlətin buna müdaxilə etməyə ixtiyarı yoxdur. Bu səbəbdən icbari tibbi sığorta olmalıdır ki, xəstə məhz bundan yararlana bilsin”.

A.Qeybullanın fikrincə, Azərbaycan tibbində rəqabət mühiti yoxdur: “Əslində, özəl klinikalar arasında da sağlam rəqabət getməlidir. Bir çoxu təklif edir ki, qəbulu baha qiymətə olan tanınmış həkimlər ayda bir dəfə olmaq şərtilə, imkansız ailələr üçün pulsuz qəbul təşkil etsə, yaxşı olar. Xeyr, bu olmamalıdır. Çünki bu, çıxış yolu deyil. İnsanları, problemi olan bir xəstəni ələbaxımlı etmək lazım deyil, insanı köməyə alışdırmaq düzgün olmaz. Hər bir insanın axı hüququ var. Bu hüquqlarından istifadə etməlidir. Gözləməməlidir ki, kimsə pulsuz qəbul keçirsin və o da bundan istifadə etsin. Hər kəs üçün hər bir həkim əlçatan olmalıdır. Vətəndaşın icbari tibbi sığortası olmalıdır ki, o, bu sığorta ilə gedib istədiyi həkimin qəbuluna düşsün”.

Günel CƏLİLOVA

Son xəbərlər