12/11/2019 14:24
728 x 90

Sabirabadda qara yara yenidən peyda olur

Yolçu Xanvəli: “Bəzən heyvanlar arasında qara yara xəstəliyinə qarşı peyvəndləmədən kənarda qalma halları da qeydə alınır”

img

Məlum olduğu kimi, sentyabrın 9-da Sabirabadda iki nəfər qara yara xəstəliyinə yoluxub. Ət satışı ilə məşğul olan 2 nəfər, Sabirabad rayonunun Qaragüney və Həşimxanlı kənd sakinləri qara yara xəstəliyinə yoluxublar. Xəstəliyə yoluxan şəxslər Sabirabad Rayon Mərkəzi Xəstəxanasının infeksion şöbəsinə yerləşdiriliblər. Qaragüney kənd sakininin kəsdiyi heyvanda qara yara xəstəliyi aşkar edilib. Həmin heyvanın əti Şirvan şəhərində fəaliyyət göstərən qəssablardan birinə satılıb. Qəssabın bildirdiyinə görə, ət sümükdən ayrılıb və hazırda hansı məqsədlər üçün istifadə olunduğu aydınlaşdırılır.

Azərbaycan Qida Təhlükəsizliyi Agentliyinə (AQTA) Səhiyyə Nazirliyindən Sabirabad rayonu Qaragüney və Həşimxanlı kənd sakinləri Muradov Yunis Möhübbət oğlu və İsgəndərov Rəvan Ülvi oğlunda qara yara xəstəliyi ehtimalı ilə bağlı daxil olan məlumat əsasında agentliyin mütəxəssislərindən ibarət araşdırma qrupu yaradılıb və hadisənin baş verdiyi əraziyə artıq ezam olunublar.  

Qeyd edək ki, bu il iyul ayının 25-də Sabirabadda iki nəfər qara yaraya yoluxub. Onlardan biri iyulun 29-da dünyasını dəyişib.

Adıçəkilən xəstəliyin daha iki nəfərdə qeydə alınması əhali arasında qara yara xofunu artırıb. Xəstəliyin ət satışı ilə məşğul olan şəxslərdə aşkarlanması isə qara yaranın heyvanlar arasında yayılması ilə bağlı narahatlıq yaradır.

  • “…ildə bir dəfə respublika üzrə mal-qara arasında qara yaraya qarşı vaksinasiya tədbirləri aparılır”

Kənd Təsərrüfatı Nazirliyi yanında Aqrar Xidmətlər Agentliyinin İnformasiya təminatı, ictimaiyyətlə əlaqələr və beynəlxalq əməkdaşlıq şöbəsinin baş məsləhətçisi Yolçu Xanvəli bizimlə söhbətində bildirdi ki, heyvanlar arasında bu xəstəliyin yayılmasının qarşısını almaq məqsədilə ildə bir dəfə respublika üzrə mal-qara arasında qarayaraya qarşı vaksinasiya tədbirləri aparılır: “Onu da deyim ki, bəzən heyvanlar arasında qara yara xəstəliyinə qarşı peyvəndləmədən kənarda qalma halları da qeydə alınır. Heyvanların qara yaraya qarşı vaksin edilməsi fermerlərdən asılıdır. Onlar heyvanlarını vaksin etdirmədikdə, heyvanın bu qorxunc xəstəliyə yoluxması mümkündür”.

Günel CƏLİLOVA

Son xəbərlər