21/11/2019 04:50
728 x 90

Polisin jesti Bakıda unudulmuş bir yol problemini gündəmə gətirdi...

Yusif Səfərov küçəsində “Sevgim” parkına keçid insan həyatı bahasına başa gələ bilər...

img

Bu günlərdə Baklda Yusif Səfərov küçəsində çox az-az rast gəlinən bir hadisənin şahidi oldum. Nadir hadisə olmasa da, doğrusu, çox sevindim və həqiqətən təhlükəli yol keçidi edən piyadalara polislərin kömək etdiyini görməkdən qürur duydum. Belə faktlara Bakının bir çox yerlərində rast gəlinib.

Dəfələrlə Heydər Əliyev prospektində, Aeroport yolunda, Xırdalan yolunda polislərin uşaqları, yaşlı insanları əllərindən tutaraq maşınların gur hərəkət etdiyi yerlərdən keçirdiklərini görmüşdük. Əslində bu, polisin heç borcu da deyil, hətta istəsələr, keçidin nəzərdə tutulmadığı yerlərdə piyadaların yolun o tərəf-bu tərəfinə keçməsinə imkan verməyə bilərlər. Ancaq bir insanlıq borcu var ki, hər cür vəzifə səlahiyyətlərindən və qanunlardan üstün sayıla bilər. Yolu keçmək istəyən uşaq var, ağsaqqal-ağbirçək var, əlil var və sair. Əgər yol tikintisi ilə məşğul olan hansısa məmur öz işini vicdanla yerinə yetirməyibsə, yolun hansı hissəsindəsə keçid zolaqları nəzərdə tutulmayıbsa, yol keçməyə möhtac piyadanın halı necə olmalıdır? Bu piyadaların çoxunu real ölüm təhlükəsindən məhz ayrı-ayrı epizodlarda polislərin insanlığı xilas edir.

Bakıda Yusif Səfərov küçəsində Baş Polis İdarəsi ilə üz-üzə gözəl və yaraşıqlı “Sevgim” parkı salınıb. Həqiqətən gözəl parkdı. Burada keçirilən vaxt üçün təəssüflənməyə, təbii ki, dəyməz. Ancaq istirahət xatirinə həyatı təhlükədə qoymaq qorxusu çox uşaqları, valideynləri bu parkın imkanlarından bəhrələnməkdən məhrum edir. Yol tikintisində buraxılmış nöqsanların ağır nəticəsini bütün hallarda polislər çəkəsi deyil ki... Baş Polis İdarəsinin alt və üst tərəflərində çoxlu sayda çoxmərtəbəli yaşayış binaları var və demək olar ki, hamısı məskunlaşıb. Təsəvvür edin ki, vətəndaşlar Baş Polis İdarəsi ilə üz-üzə olan “Sevgim” parkına keçmək üçün Yusif Səfərov küçəsi boyunca Neftçilər Xəstəxanasına qədər uzun bir yol keçməli, xəstəxananın önündəki keçidlə yolun qarşı tərəfinə keçməli və yenidən avtobusa oturaraq “Sevgim” parkına və digər yerlərə getməlidir. “Sevgim” parkının yanında da dayanacaq var. Vətəndaşların heç də hamısı Neftçilər Xəstəxanasınadək gedib keçiddən keçməyə həvəsli olmur, “niyə bu qədər yolu getməliyəm” sualını verənlər də olur, təhlükəli yerdə yolu birbaşa keçmək istəyənlərin hamısına polis imkan verə bilməz, polislərin hamıya kömək etmək, əlindən tutub yol keçirmək imkanı da yoxdur. Bəs nə etməli?

Sakinlər məhz həmin yerdə - “Sevgim” parkının qarşısında piyadaların vurulması kimi hallların olduğunu da bildirdilər və çıxış yolları da təklif etdilər. Sakinlərin fikrincə, Yusif Səfərov küçəsində “Sevgim” parkına keçid üçün, heç olmasa, işıqfor və zolaqlı keçid quraşdırmaq, ya da yüngül konstruksiyalı yerüstü keçid inşa etmək olar. Həqiqətən də daha “qlobal” olan yeraltı keçiddənsə, bu təkliflər daha asan və real görünür. Təklif reallaşsa, sakinlərin beş addımlıqdakı dayanacağa keçidi daha rahat olar, bədbəxt hadisələrdən hər kəs sığorta olunar, polislər isə təhlükəli yerdən keçmək istəyən və buna məcbur sakinlərə yardım göstərmək kimi çətinlik qarşısında qalmaz.

Gözləyək, rəsmi orqanların reaksiyasını...

Namiq QULİYEV 

Son xəbərlər