19/09/2019 11:24
728 x 90

Marşrut avtobuslarında mərsiyə qoymaq düzgündürmü…

img

Məhərrəmlik ayı başlayandan Bakı və Bakıətrafı ərazilərdə fəaliyyət göstərən bəzi avtobuslarda sərnişinlərə mərsiyə dinlədilir. Bununla bağlı sərnişinlər sosial şəbəkələrdə məlumat veriblər. Onlar bu cür musiqilərdən narahat olduqlarını dilə gətiriblər. Qeyd etdiyimiz kimi, bu hal daha çox Bakıətrafı ərazilərə hərəkət edən avtobuslarda qeydə alınır. “Koroğlu” metrostansiyasından Binə qəsəbəsinə gedən 160 saylı avtobusda da analoji hal yaşanır. Sərnişinlər bununla bağlı narazılıqlarını bildirsələr də, avtobus sürücüsü onlara əhəmiyyət vermədən yoluna davam edib.

Nəzərə almaq lazımdır ki, Azərbaycan qatı islam ölkəsi deyil. Əhalinin 95 faizinin müsəlman olmasına baxmayaraq, Azərbaycan şəriət dövləti sayılmır. Bu səbəbdən də ictimai məkanlarda və ya hər kəsin istifadə etdiyi nəqliyyat vasitələrində dini moizələr, ilahilər və ya mərsiyələrin səsləndirilməsi xoş qarşılanmır.

Məlumat üçün bildirək ki, “Dini etiqad azadlığı haqqında” Azərbaycan Respublikası Qanununun 21-ci maddəsinə əsasən, bu qanunun 1-ci maddəsinin tələbləri, yəni hər kəsin hər hansı dinə təkbaşına və ya başqaları ilə birlikdə etiqad etmək, dinə münasibəti ilə bağlı əqidəsini ifadə etmək və yaymaq hüququ nəzərə alınmaqla, ibadətlər, dini ayinlər və mərasimlər ibadətgahlarda və onlara məxsus ərazidə, ziyarətgahlarda, qəbiristanlıqlarda, dini qurumların idarələrində, vətəndaşların mənzillərində və evlərində maneəsiz keçirilir. İbadətgahlardan kənarda, ictimai yerlərdə dini şüarların, dini moizələrin səsləndirilməsi qadağandır. Qanunun məntiqi mənasına görə, qanunda nəzərdə tutulan yerlərdən kənarda dini ayinlərin icra edilməsi, səsləndirilməsi və s. ictimai narahatlığa səbəb olduğu hallarda bu cür hərəkətlərə maneə yaradıla bilər.

Onu da qeyd edək ki, ictimai yerlərdə yüksək səslə istər dini, istərsə də digər janrlarda musiqi səsləndirmək qanunla qadağandır.

  • Mais Ağayev: “Sərnişinlərin ictimai nəqliyyatdan rahat istifadəsini təmin etmək üçün bununla bağlı daşıyıcılara xəbərdarlıq olunacaq”

Məsələ ilə bağlı qurumun mətbuat xidmətinin rəhbəri Mais Ağayev qeyd etdi ki, məlum fakt araşdırılacaq. O, bildirib ki, sərnişinlərin ictimai nəqliyyatda rahat istifadəsini təmin etmək üçün bununla bağlı daşıyıcılara xəbərdarlıq olunacaq.

  • İsmayıl Əhməd: “Məhərrəmlik və digər aylarda avtobus, taksilərdə dini moizələrin səsləndirilməsi düzgün deyil”

İlahiyyatçı İsmayıl Əhməd bildirdi ki, insanlara xidmət göstərən şəxs özünü deyil, xidmət göstərdiyi şəxslərin rahatlığını düşünməlidir: “Məhərrəmlik və digər aylarda avtobus və ya taksilərdə dini moizələrin səsləndirilməsi düzgün deyil. Avtobusda əyləşən şəxslər mənzil başına çatana qədər həmin mərsiyəni dinləmək məcburiyyətində deyillər. Sərnişinlərin narazılığına səbəb olan mərsiyələrin səsləndirilməsinə yol verilməməlidir. Avropa ölkələrində yüksək səslə hər hansı bir musiqi və ya səsləndirmə sərnişinlərə dinlədilmir”.

İlahiyyatçı onu da vurğuladı ki, bəzən elə hal olur ki, taksi fəaliyyəti ilə məşğul olan sürücülər də sərnişinlərin iradəsinin ziddinə olaraq, maşının içərisində dini moizələrin səslənməsinə şərait yaradırlar: “Taksi fəaliyyəti ilə məşğul olan şəxsin dini moizələrə qulaq asması onun hüququdur. Ancaq bu hal sərnişini narahat edirsə, sürücü ya həmin mərsiyəni dayandırmalı, ya da elə etməlidir ki, həmin moizə nəqliyyatdan istifadə edən şəxsi narahat etməsin”.

Günel CƏLİLOVA

Son xəbərlər