19/09/2019 11:23
728 x 90

Tələbə şəhərciyinin Bakının hansı hissəsində tikilməsi məqsədəuyğundur?

img

Ali məktəblərə qəbul imtahanlarının nəticələrinin açıqlanmasından sonra tələbə adı qazananların bir qisminin sevinci uzun sürmür. Hər il olduğu kimi, bu tədris ilində də ali məktəblərin əksəriyyətinin yataqxana probleminin çözülməmiş qalması tələbələri kirayə mənzil axtarmaq məcburiyyətində qoyur. Amma bəzi valideynlərin övladları üçün kirayə ev tutmağa imkanı olmadığından, onlar aylıq qiyməti 20-60 manat arasında dəyişən mövcud universitet yataqxanalarına müraciət edirlər.

Gördükləri mənzərə isə bir o qədər də ürəkaçan olmur. Bu səbəbdən də valideynlər övladlarının təhsil alması üçün kirayə mənzil axtarışına çıxırlar. Belə olan vəziyyətdə kirayə mənzillərə tələbat artdığından, qiymətlərdə də bahalaşma yaşanır. Hətta vəziyyət o yerə gəlib ki, “gecəqondu” kimi tanınan evlər “od” qiymətinədir. “Gecəqondular”da 1 otaqlı evlərin 300-350 manatarası olduğu bildirilir.

Tələbələrin təhsil haqqı, kirayə pulu, geyim, yemək və digər xərclərini hesablasaq, onların paytaxtda yaşayışını təsəvvür etmək belə çətindir. Belə olan halda isə tələbələr üçün xüsusi şəhərciyin salınması gündəmə gəlir. Məlumat üçün bildirək ki, bir sıra ölkələrdə, o cümlədən, qonşu Türkiyədə tələbə şəhərciyi mövcuddur. Beynəlxalq təcrübədə hər universitetin özünün şəhərciyi mövcuddur ki, orada həm tədris korpusları olur, həm də tələbələrin məişət və yataq problemlərini həll etmək üçün binalar tikilir. Bizdə isə hələlik bu tendensiya müşahidə edilmir, lakin ümid edirik ki, gələcəkdə bu istiqamətdə işlər görüləcək.

Ekspertlərin fikrincə, paytaxt Bakıda da belə bir təcrübəni tətbiq etmək olar. Maraqlıdır, Bakıda tələbə şəhərciyi salınarsa, paytaxtın hansı ərazisində olması münasib olar?

  • Məlahət Mürşüdlü: “Bakıda tələbə şəhərciyi salınarsa, bu, universitetlərə yaxın ərazi olmalıdır ki, həm tələbələr gediş-gəliş sarıdan əziyyət çəkməsin, həm də nəqliyyat yüklənməsin”

Təhsil eksperti Məlahət Mürşüdlü “Bakı-Xəbər”ə açıqlamasında qeyd etdi ki, tələbələrin yaşayış problemini birdəfəlik həll etmək üçün tələbə şəhərciyi salınmalıdır: “Tələbə şəhərciyi inkişaf etmiş ölkələrdə var. Həmin ölkələrdə salınan tələbə şəhərcikləri universitetlərin sıx olduğu ərazilərdə salınıb. Bizdə də analoji hal tətbiq oluna bilər. Bakıda tələbə şəhərciyi salınarsa, bu, universitetlərə yaxın ərazi olmalıdır ki, həm tələbələr gediş-gəliş sarıdan əziyyət çəkməsin, həm də nəqliyyat yüklənməsin.  Nəzərə almaq lazımdır ki, ali təhsil müəssisələrinin əksəriyyəti “Elmlər Akademiyası” metrostansiyasının yaxınlığındadır. Bu ərazidə tələbə şəhərciyinin salınması üçün uyğun yer axtarılmalıdır”.

  • Nüsrət İbrahimli: “Əhali sıxlığının az olduğu yerlərdə tələbələr üçün şəhərcik salına bilər”

Daşınmaz əmlak məsələləri üzrə ekspert Nüsrət İbrahimli qeyd etdi ki, əhali sıxlığının az olduğu yerlərdə tələbələr üçün şəhərcik salına bilər. Kirayə üçün nəzərdə tutulmuş xüsusi evlərin tikintisi və tələbə şəhərciklərinin qurulmasına ehtiyac var. Dünya təcrübəsini də ölkəmiz üçün tətbiq etmək olar. Sadəcə, bunun üçün münbit şərait yaratmaq lazımdır. Xüsusilə investorlar üçün şərait qurulmalıdır ki, onlar bu sahəyə vəsait yatırmağa maraqlı olsunlar. Hələ ki, investorlar yalnız yaşayış evləri və obyektlərin tikintisi ilə məşğuldurlar.

Çünki ora qoyduqları vəsaiti qısa müddətdə artıqlaması ilə götürə bilirlər. Amma kirayə mənzil sahəsində gəlir az olduğundan, investorlar ora vəsait yatırmaq istəmirlər.

Bunun üçün icra hakimiyyətləri müəyyən ərazilər ayırmalı, həmin ərazilərin layihəsi işlənməli və müvafiq infrastruktur salınmalıdır. Bundan sonra tenderlər elan edib həmin yerə investorları cəlb etmək olar. Hələ ki, bu əlçatmazdır. Yəqin yaxın zamanda kirayə evlərlə bağlı müəyyən tədbirlər görüləcək”.

Günel  CƏLİLOVA

Son xəbərlər