19/09/2019 11:20
728 x 90

İşlənmiş pamperslərin biri 3 qəpikdən geri alınır, ekspertlər nə düşünür...

“Çox güman ki, həmin bezlər təkrar istehsala yönəldilir və o üzdən, ucuz qiymətə əhalidən toplanır”

img

Sosial şəbəkələrdə işlənmiş pamperslərin alışı adlı səhifələr yaradılıb. Həmin səhifələrdə işlənmiş bezləri atmamaq tövsiyə edilir. Bildirilir ki, onu atmaq əvəzinə toplayın və pul qarşılığında bizə satın. Uşaq bezlərinin hansı məqsədlə alındığı barədə isə məlumat yoxdur.

Artıq bir neçə gündür sosial şəbəkələrdə və qadın qruplarında "İşlənmiş uşaq bezlərinin alışı" adı altında elanlar paylaşılır. Elan sahibləri xanımlara istifadə etdikləri, bulaşmış bezləri atmamağı, toplamağı, müəyyən qədər yığıldıqdan sonra onlara satmalarını təklif edirlər.

Bir bez üçün 3 qəpik təklif edən sözügedən sosial şəbəkələr yazırlar ki, belə bezləri hətta vətəndaşın yaşadığı yerdə və ya yaxın ərazidə görüşərək qəbul edir və yerindəcə pulunu ödəyirlər. Ancaq bir çox qadın işlənmiş pamperslərin yenidən emal edilib, ucuz brend altında təzədən satışa çıxacağından ehtiyat edərək, bu təklifə qarşı çıxır. Maraqlıdır ki, işlənmiş pamperslərin nəyə görə alınması barədə suallara aydın cavab verilmir. Bildirilir ki, guya bu, biznes sirridir.

Ancaq bununla bağlı təklif bir qədər iyrənc olsa da, məlumata görə, bir çox kasıb ailə işlənmiş pampersləri yığıb pul götürməkdə maraqlıdır. İşlənmiş pampers biznesi bəzi ölkələrdə olsa da, bizdə yoxdur. Ona görə də Azərbaycanda bu biznesin qanuni olub-olmaması, qaydalara nə qədər əməl edilib-edilməməsi sual altındadır.

Maraqlıdır, işlənmiş pamperslər nə məqsədlə 3 qəpikdən alınır? Ekspertlərin bununla bağlı fikirləri nədən ibarətdir?

  • Eyyub Hüseynov: “Bu, müəyyən xəstəliklərin yayılmasına səbəb ola bilər”

Sözügedən məsələ ilə bağlı fikirlərini “Bakı-Xəbər”lə bölüşən Azad İstehlakçılar Birliyinin sədri Eyyub Hüseynovun sözlərinə görə, işlənmiş pamperslərin alınmasında müxtəlif məqsədlər ola bilər: “Konkret indidən nəyisə demək çətindir. Ona görə də bunun səbəbini ortaya çıxarmaq üçün ciddi araşdırma aparılmalıdır. Çünki bunun konkret nə məqsədlə edildiyi hələlik tam bəlli deyil. Sadəcə, bununla bağlı müəyyən ehtimallar var. Çox güman ki, həmin bezlər təkrar istehsala yönəldilir və o üzdən, ucuz qiymətə əhalidən toplanır. Ola bilər ki, həmin bezlər hansısa formada təzədən ucuz qiymətə satılır. Bunu da istisna etmək olmaz. İstənilən halda, bunda hansısa məqsəd olmasa, buna getməzlər. Ona görə də bu çox ciddi məsələ olduğuna görə araşdırılmalıdır. Bunun üstündən sükutla keçmək doğru deyil. Çünki işlənmiş bezlərin alınaraq təzədən satılması gigiyenik baxımdan normal deyil. Ona görə ki, bu, müəyyən xəstəliklərin yayılmasına səbəb ola bilər. Bu baxımdan hesab edirəm ki, məsələyə müvafiq qurumlar son dərəcə ciddi yanaşmalıdırlar. İqtisadiyyat və səhiyyə nazirlikləri bu məsələ ilə maraqlanmalıdırlar. Bundan əlavə, pampers biznesi ilə məşğul olan iş adamları da gərək bunu araşdırmaqda maraqlı olsunlar. Ona görə də buna qeyri-ciddi yanaşmaq olmaz”.

Vidadi ORDAHALLI

Son xəbərlər