Məlum olduğu kimi, paytaxtda ictimai mənəviyyat əleyhinə və milli mentalitetə zidd olan hallara qarşı mübarizə gücləndirilib. Bu məqsədlə sentyabrın 2-dən etibarən Bakı Şəhər Baş Polis İdarəsinin rəhbərliyi tərəfindən təsdiq olunan Tədbirlər Planına müvafiq olaraq, polisin səlahiyyətləri çərçivəsində konkret vəzifələr müəyyən olunaraq icraya yönəldilib.
İdarənin yaydığı məlumatda qeyd olunur ki, əxlaqa zidd olan bütün halların forma və təzahürlərinə qarşı mübarizənin effektivliyini artırmaq üçün milli-mənəvi dəyərlərimizə uyğun olmayan davranışların, ictimai əhəmiyyət kəsb edən digər neqativ halların qarşısının alınması üçün kompleks profilaktik tədbirlərin həyata keçirilməsi nəzərdə tutulur. Bu sahədə artıq silsilə işlər görülüb. Görülən işlər çərçivəsində əxlaqsızlıq yuvaları aşkarlanaraq onlar barəsində müəyyən işlər görülüb. Qeyd edək ki, milli mentalitetə zidd olan hallara qarşı mübarizə sahəsində polislə yanaşı, media da aktiv fəaliyyət göstərir.
Maraqlıdır, ictimaiyyətin, qeyri-hökumət təşkilatlarının dəstəyi bu sahədə hansı səviyyədədir?
Rauf Zeyni: “Vətəndaş cəmiyyətləri əxlaqsızlığa, mənəviyyatsızlığa, həmçinin, insan alverinə qarşı daim mübarizə aparır”
Milli QHT Forumunun prezidenti Rauf Zeyni “Bakı-Xəbər”ə açıqlamasında qeyd etdi ki, vətəndaş cəmiyyətləri əxlaqsızlığa, mənəviyyatsızlığa, həmçinin, insan alverinə qarşı daim mübarizə aparır: “Məlumat üçün bildirim ki, Daxili İşlər Nazirliyi yanında İnsan Alverinə qarşı Qeyri-Hökumət Təşkilatları Koalisiyası var. Həmin koalisiyaya təxminən 15-dən artıq QHT-daxildir. Vətəndaş cəmiyyətləri tək hər hansı bir hadisə ilə bağlı deyil, ümumiyyətlə, il ərzində məhz insan alveri, əxlaqsızlığa qarşı, o cümlədən, mənəviyyatsızlığa qarşı maarifləndirmə işləri aparır. Bu istiqamətdə çoxlu sayda layihə, tədbirlər həyata keçirilir. Danılmaz faktdır ki, vətəndaş cəmiyyətləri milli-mənəvi dəyərlərin qorunması istiqamətində mühum addımlar atırlar. Bu günlərdə Bakı Şəhər Baş Polis İdarəsi əxlaqsızlığa qarşı mübarizə istiqamətində mübarizəni gücləndirib. Koalisiyanın üzvləri də əxlaqsızlığa qarşı mübarizədə aktiv fəaliyyət göstərirlər. Vətəndaş cəmiyyətləri institutları milli mentalitetə zidd olan hallara qarşı görülən işləri alqışlayır. Əxlaqsızlığın qarşısının alınması istiqamətində QHT sektoru ölkənin hər bir bölgəsində, ucqar ərazilərdə belə maarifçilik işləri aparır və aparacaq”.
Ülviyyə NAĞIYEVA
