Azərbaycan ali məktəblərində təhsil almaq istəyən xarici ölkə tələbələrinin sayı ilbəil artır. Bu gün universitetlərimizdə dünyanın müxtəlif ölkələrindən olan əcnəbi tələbələr təhsil alırlar.
Builki tədris ilində ADA Universitetinə 12 yeni ölkədən, o cümlədən, Belarus, Butan, Qana, Litva, Mozambik, Nepal, Fələstin, Filippin, Səudiyyə Ərəbistanı, Seyşel adaları, Slovakiya və Tacikistandan tələbə qəbul olunub. Ümumilikdə isə universitetdə 45 ölkə öz tələbələri ilə təmsil olunub.
Seyşel adalarından qəbul olunan Laura Bonifas bildirir: “ADA-ya qəbul olunmaq barədə xəbəri alanda hədsiz dərəcədə sevindim. Öz ölkəmi Azərbaycanda təmsil edən ilk tələbə olmağın qürurunu yaşayıram. Bilirəm ki, burada aldığım təhsil gələcəkdə mükəmməl karyera qurmaq üçün mənə kömək edəcək. Üstəlik, Azərbaycanı və buranın insanlarını öyrənmək dünyagörüşümü daha da genişləndirəcək. İlk gündən buradakıların nə qədər mehriban olduğunun şahidi oluram”.
Qeyd edək ki, ADA Universitetinin icraçı prorektoru Fariz İsmayılzadənin mətbuata bildirdiyinə görə, ali təhsil ocağının əlaqələri genişləndirərək tədris mühitini beynəlmiləlləşdirməsi vacib məqsədlərdən biridir: “Biz tələbələrimizə, sözün əsl mənasında, qlobal təhsil almaq üçün şərait yaradırıq. Hazırda ADA Universiteti 38 ölkədə yerləşən 82 universitetlə akademik tərəfdaşlıq edir. Bunun nəticəsi olaraq, bakalavr və magistr tələbələrimiz ADA-da oxuduğu müddətdə bir semestri mübadilə təhsilində keçirə bilirlər. Çox zaman bu mübadilə onlar üçün yeni akademik baxış bucağı ilə yanaşı, yeni dil, yeni mədəniyyətə alışmaq qabiliyyətinə yiyələnmək deməkdir. Builki beynəlxalq tələbə qəbulu prosesi yeni təqaüd imkanlarının yaradılması ilə yadda qaldı. Dövlətimizin başçısı və XİN tərəfindən verilən təqaüdlərlə yanaşı, ADA Universitetinin rektoru Hafiz Paşayevin Özbəkistana səfəri nəticəsində biz bu ölkənin gəncləri üçün biznes dairələrindən alınan ianələr hesabına ayrıca təqaüd təsis edə bildik. Nəticədə Özbəkistandan 6 tələbə ADA-da təqaüdlü təhsil almaq imkanı qazandı”.
İlqar Orucov: “Bu baxımdan, 12 yeni xarici ölkədən ADA Universitetinə tələbələrin qəbul olunması ali təhsilimizdə çox ciddi yenilikdir”
Xarici tələbələrin ADA-ya marağının səbəblərini şərh edən Gənc Alim, Aspirant və Magistrlər Cəmiyyətinin sədri, Təhsil Nazirliyi yanında İctimai Şuranın üzvü, fizika-riyaziyyat üzrə fəlsəfə doktoru İlqar Orucov “Bakı-Xəbər”ə bildirdi ki, xarici ölkələrin tələbələrinin ADA Universitetinə maraq göstərməsi olduqca əlamətdar bir məsələdir. “Bu, Azərbaycan təhsili üçün olduqca vacib və əlamətdar hadisədir. Faktiki olaraq, 12 yeni xarici ölkədən tələbələrin bu ali məktəbi seçməsi, bura qəbul olunması, həmin dövlətlərin vətəndaşlarının təhsillərini, öz gələcək karyeralarını ADA Universitetinə etibar etmələri onu göstərir ki, biz artıq ADA-nın timsalında Azərbaycan universitetini bir model kimi formalaşdıra bilmişik. Baxmayaraq ki, ADA-nın yaranma tarixi elə də böyük deyil. Ancaq çox sevindirici haldır ki, bu müddət ərzində ADA universiteti fərqlənə bilib. Bunun nəticəsdir ki, bu il yeni 12 xarici dövlətin tələbələri ADA-nı seçib və öz ali təhsillərini burada alacaqlar. Əlbəttə, mən ADA-nı seçən tələbələrin ölkələrinin siyahısına baxdım. Düzdür, bu ölkələrin heç də hamısı elm tutumlu, dünyada təhsillə bağlı ciddi nəticələri olan ölkələr deyil. Lakin Belarusun bu sahədə nəticələri var. Mən özüm Belarusda olmuşam və onların təhsil sistemi ilə tanışam. Belarsuda təhsilin səviyyəsi aşağı deyil. Azərbaycanın xarici ölkələrdə tanınması üçün neft, idman, mədəniyyət kifayət etmir, burada ali təhsil müəssisələrinin də xüsusi yeri olmaladır. Biz ADA nümunəsində Azərbaycan təhsilinin xaricdə tanınmasını, qəbul edilməsini görə bilirik. ADA nümunəsi olduqca yaxşı nümunədir və digər universitetlərimiz də bu istiqamətdə işlərini qurmalıdırlar. Biz bu gün Azərbaycan gənclərini təhsil almaq üçün xarici ölkələrə göndəririk, arzu edərdim ki, Azərbaycan universitetlərinə də xarici ölkə tələbələri maraq göstərsinlər. Azərbaycanda təhsil alan hər bir xarici tələbə, ən azından, gələcəkdə Azərbaycanın xoşməramlı səfiri olaraq ölkəmizi təbliğ edəcək. Bu baxımdan, bu vacib məqamdır. Çox müsbət hadisədir ki, xarici ölkə tələbələrinin Azərbaycanda təhsil almaları üçün münbit şərait yaradılıb. Hesab edirəm ki, xarici ölkə tələbələrinin ADA-nı seçməsi təsadüfi deyil, bu ali məktəbdə həqiqətən də çox yüksək səviyyədə təhsil verilir. Bu çox yaxşpı tendensiyadır”.
Azərbaycanda SSRİ dövründə indiki Azərbaycan Neft və Sənaye Universitetində xarici tələbələrin təhsil aldığını xatırladan İ.Orucovun qeyd etdiyinə görə, bu daha çox neft sənayesi ilə bağlı ixtisaslar idi. “ADA-da isə xarici tələbələr müxtəlif ixtisaslar üzrə təhsil alacaqlar və gələcək karyeralarını Azərbaycanda aldıqları ali təhsil üzərində quracaqlar. Bu baxımdan, 12 yeni xarici ölkədən ADA Universitetinə tələbələrin qəbul olunması ali təhsilimizdə çox ciddi yenilikdir” - deyə İ.Orucov vurğuladı.
İradə SARIYEVA
