Dünyada Azərbaycan brendi olaraq tanınan, qəbul edilən əfsanəvi Qarabağ atları sülhün və azadlığın simvolu kimi də dəyərləndirilir. Ermənistan Silahlı Qüvvələrinin Dağlıq Qarabağı işğal etməsi nəticəsində doğma torpağından didərgin düşən Qarabağ atları bu gün öz əzəli yurduna qayıdacağı günü gözləyir. Bu gün Qarabağ atları dünyanın ən möhtəşəm sərgi salonları, cıdır meydanlarında ölkəmizi uğurla təmsil edir. Qarabağ atının şan-şöhrəti üç əsrdən artıqdır Avropanı dolaşır.
Onu da bildirək ki, Belçikanın Ham, İngiltərənin London şəhərində Qarabağ atına heykəl ucaldılıb.
Sumqayıtın 70 illik yubileyi ilə bağlı şəhərdə Qarabağ atlarına heykəl qoyulacaq.
Vaqif Nəzirov: “Bu heykəlin adını “Azərbaycan irəli” qoymuşam”
Qarabağ atları heykəlinin müəllifi, monumentalist rəssam, Əməkdar incəsənət xadimi Vaqif Nəzirov “Bakı-Xəbər”ə bildirdi ki, Azərbaycanda ilk dəfədir Qarabağ atlarına heykəl ucaldılacaq. Təxminən üç il əvvəl heykəlin eskizləri üzərində işə başladığını deyən V.Nəzirovun sözlərinə görə, artıq heykəlin maketi də hazırdır. “Qarabağ atları Azərbaycanın şan-şöhrətidir. Mən artıq heykəlin maketini də hazırlamışam. Mən öz üzərimə düşən işin çox böyük hissəsini görmüşəm, bircə heykəlin bürüncdən hazırlanması qalır. Mənim gördüyüm işdən Sumqayıt Şəhər İcra Hakimiyyətinin başçısı Zakir Fərəcovun xəbəri var, o, heykəlin fotoşəkilləri, maketi ilə tanışdır. İcra başçısı heykəlin maketini bəyənib. Təqdim etdiyim layihəyə müsbət cavab verilib. Planlaşdırılır ki, heykəlin açılışı Sumqayıtın 70 illik yubileyinə qədər yekunlaşdırılsın.
Çox arzu edərdim ki, digər əlaqədar qurumlar da heykəlin bürüncdən hazırlanma işinə dəstək versinlər və biz heykəli ucalda bilək. Heykəlin qeyri-adi cəhətləri çoxdur. Mən Yer kürəsi üzərində şaha qalxan üç Qarabağ atı təsvir etmişəm, yəni heykəl belə olacaq. Dünyada Qarabağ atlarından gözəl at yoxdur. Bu heykəlin adını “Azərbaycan irəli” qoymuşam. Burada mən həm də Azərbaycanın inkişafını, lider dövlət olmasını, sülhün, əminamanlığın, tolerantlığın, multikulturalizmin ünvanı olduğunu göstərmişəm. Ölkəmiz həmişə inkişaf edir. Qarabağ atı da həm hərəkət, həm inkişaf, həm də vətənpərvərlik simvolu kimi xarakterizə olunur. Qarabağ atları heykəli həm də Sumqayıtın yeni simvollarından biri olacaq. Bu heykəlin əsas mənası odur ki, Azərbaycan Yer kürəsi üstündə inkişaf edir, irəliyə gedir. Heykəlin şəhərin Heydər Əliyev prospekti ilə Sülh küçəsinin kəsişməsində qoyulacağ gözlənir. Bu olduqca gözəl bir məkandır. Mən heykəli kompyuterdə ora otuzdurmuşam. İndiyə qədər bizdə Qarabağ atlarına heykəl qoyulmayıb, bu işi mən görürəm, hesab edirəm ki, tezliklə Qarabağ atları heykəli ucaldılacaq. Bir neçə aydan sonra Sumqayıtın 70 illiyi olacaq. Çox istəyirəm ki, yubiley tədbirinə qədər heykəl qoyulsun”.
Azərbaycanın Yer kürəsində öz inkişafına görə irəliləyən bir dövlət olduğunu deyən V.Nəzirovun sözlərinə görə, bu abidənin həm də beynəlxalq əhəmiyyəti olacaq. O vurğuladı ki, Sumqayıtda Qarabağ atlarına abidə ucaldılması həm də Qarabağ torpaqlarının Azərbaycanın əzəli-əbədi torpaqları olduğunu bir daha dünyaya bəyan edir.
V.Nəzirov həm də bu gün Sumqayıtın simvoluna çevrilən Göyərçin abidəsinin də müəllifidir. O bizimlə söhbətində onu da dedi ki, keçən il Göyərçin abidəsinin 40 yaşı tamam olub. Göyərçin abidəsinin qoyulduğu yerdə əvvəllər raketlər olduğunu deyən V.Nəzirovun sözlərinə görə, o vaxt onun təkidi ilə həmin raketlər ərazidən götürülüb və onun yerində sülh simvolu olan Göyərçin abidəsi ucaldılıb: “Sumqayıt həmişə çoxmillətli şəhər olub, burada xalqlar dostluğu hökm sürüb. Göyərçin abidəsi illərdir Sumqayıtdan dünyaya sülh, əminamanlıq ünvanlayır. Hesab edirəm ki, müəllifi olduğum Qarabağ atları heykəli də öz əzəməti, mənası ilə seçiləcək” - deyə V.Nəzirov qeyd etdi.
İradə SARIYEVA
