Son illər ictimaiyyət və rəsmi qurumlar arasında əlaqələrin qurulması, vətəndaşları narahat edən məsələlərin daha operativ şəkildə həll edilməsi üçün müxtəlif nazirliklərin tərkibində ictimai şuralar yaradılıb. Onu da bildirək ki, əksər ziyalı və ictimiayyət nümayəndələri nazirliklərdə fəaliyyət göstərən ictimai şuraların fəaliyyətindən o qədər də razı deyil. Onlar bildirirlər ki, bu şuralarda ictimaiyyət təmsilçiləri formal olaraq təmsil olunur, şuraların əsas üzvləri isə nazirliklərin, dövlət qurumlarının öz işçilərindən ibarət olur.
Bir müddət əvvəl Təhsil Nazirliyində də İctimai Şuranın yaradılması ilə bağlı xəbərlər yayıldı. İctimaiyyətin maraq dairəsində olan Təhsil Nazirliyində yaradılan şuranın tərkibində kimlərin təmsil olunacağı sualları var idi. Artıq Təhsil Nazirliyi yanında İctimai Şuraya seçkilər keçirilib və şura üzvlərinin siyahısı məlum olub.
Təhsil nazirinin müavini, Seçki Komissiyasının sədri Firudin Qurbanov nazirlik yanında İctimai Şuranın yaradılmasının əhəmiyyətini vurğulayıb və qeyd edib ki, İctimai Şura təhsil sahəsində müxtəlif məsələlərin müzakirəsi üçün məsləhətləşmələr təşkil edən, bu sahədə dövlət siyasətinin həyata keçirilməsi ilə bağlı nazirliyə təkliflər verən və qanunvericiliklə müəyyən edilmiş digər hüquqlara malik olan məşvərətçi qurum olacaq.
Bildirək ki, şura üzvləri səsvermə ilə seçilib. Səsvermənin nəticəsinə əsasən, İlqar Orucov, Şahlar Əsgərov, Etibar Əliyev, Nadir İsrafilov, Ülviyyə Mikayılova, Elmina Kazımzadə, Anar Vəliyev, Mirzə Cəfərzadə, Asif Cahangirov, Mais Əliyev və Hikmət Əlizadə İctimai Şuraya üzv seçiliblər.
Məlumat üçün bildirək ki, Təhsil Nazirliyi yanında İctimai Şura təhsil naziri Ceyhun Bayramovun 11 iyul 2019-cu il tarixli əmrinə əsasən yaradılır. Şuranın yaradılmasında əsas məqsəd nazirliyin fəaliyyətində şəffaflığı artırmaq, eyni zamanda, təhsil sahəsində ictimaiyyətlə qarşılıqlı fəaliyyəti gücləndirməkdir.
İctimai Şuraya namizədliyə və seçici qismində iştirakla bağlı Təhsil Nazirliyinə (elektron qaydada və ya Vətəndaşların Qəbulu Mərkəzinə) 125-dən çox müraciət daxil olub. Sənədləri qanunvericilikdə nəzərdə tutulmuş tələblərə uyğun olan 44 seçici və 34 namizəd rəsmi qeydiyyata alınıb. Həmin müraciətlər Təhsil Nazirliyinin və vətəndaş cəmiyyəti institutlarının nümayəndələrindən təşkil olunmuş Seçki Komissiyası tərəfindən yoxlanıb. Komissiyaya Təhsil Nazirliyinin 4 və vətəndaş cəmiyyəti institutlarının 5 nümayəndəsi daxildir.
Təhsil Nazirliyinin yeni İctimai Şurasını digər nazirliklərin şurasından fərqləndirən əsas cəhət nədir?
İlqar Orucov: “Təhsil Nazirliyi yanında yaradılan İctimai Şurada isə yalnız ictimaiyyət nümayəndələri yer alıb, burada nazirliyin heç bir nümayəndəsi təmsil olunmur”
Gənc Alim, Aspirant və Magistrlər Cəmiyyətinin sədri, fizika-riyaziyyat üzrə fəlsəfə doktoru, İctimai Şuranın üzvü İlqar Orucov bu barədə bizimlə söhbətində bildirdi ki, Təhsil Nazirliyi yanında yaradılan şuranın çox böyük ictimai-sosial, siyasi əhəmiyyəti var. “Təhsil Nazirliyi yanında İctimai Şuraya seçkilər çox şəffaf şəkildə keçirildi. Təhsil sahəsində kifayət qədər təcrübəsi olan, cəmiyyətdə qəbul edilən təhsil ekspertləri, eləcə də vətəndaş cəmiyyətində təmsil olunan və təhsillə əlaqəli insanlar şura üzvləri sırasında yer aldılar. 34 nəfər içindən ən çox səs toplayan şəxslər İctimai Şurada yer aldı. Hesab edirəm ki, tədris ilinə qədər İctimai Şuranın iclası keçiriləcək və şuranın rəhbərliyi müəyyənləşdiriləcək, eyni zamanda, şuranın fəaliyyətini tənzimləyəcək bəzi sənədlər, normativ aktlar qəbul ediləcək. Əlbəttə ki, müstəqil şəkildə Təhsil Nazirliyi yanında məşvərətçi şura kimi öz sözünü deyəcək. Burada təmsil olunanların peşəkarlığına və təcrübəsinə arxayın olub demək istəyirəm, şura öz müsbət fəaliyyəti ilə yadda qalacaq. Ümumilikdə, İctimai Şura ölkəmizdə Prezident İlham Əliyev tərəfindən həyata keçirilən təhsil siyasətinin daha yaxşı formada reallaşması istiqamətində öz sözünü deyəcək. Təhsil Nazirliyi İctimai Şuranın yaradılması ilə bağlı komissiya yaradarkən ilk növbədə çox ciddi sənədlər tələb olundu, bəzi namizədlər vətəndaş cəmiyyəti tərəfindən yaxşı qarşılanmadı. Amma bu başadüşüləndir. Təhsil sahəsi elə bir məfhumdur ki, o, bütövlükdə, dövlətin təhsillə bağlı gələcəyini, insan kapitalını formalaşdıran bir sahədir. Bu baxımdan, Təhsil Nazirliyinin İctimai Şurasına hər adam namizədliyini verə bilməzdi”.
İ.Orucov qeyd etdi ki, bəziləri bu sahə ilə əlaqəsi olmadığı halda, şuraya üzv olmaq istəyib və bununla bağlı sosial şəbəkələrdə həqiqətəuyğun olmayan fikirlər yayımlayırlar. “Bəziləri seçilmiş şura üzvlərinə qara yaxmağa başladılar. Amma reallıq ondan ibarətdir ki, İctimai Şuraya keçirilən seçkilərdə vətəndaş cəmiyyətinin kifayət qədər tanınan nüfuzlu simaları, eyni zamanda da kütləvi informasiya vasitələrinin populyar simaları komissiyanın tərkibində təmsil olunurdu. Bütövlükdə, həm onların, həm seçicilərin, həm namizədlərin, həm də bu prosesi izləyən və işıqlandıran KİV-in gözləri qarşısında çox şəffaf, aşkar seçki keçirildi. Təhsil Nazirliyi yanında İctimai Şuranın üzvlüyünə seçilən şəxsləri, təhsillə, elmlə bağlı mütəxəssisləri ictimaiyyət yaxşı tanıyır və onların müsbət istiqamətdə fəaliyyət göstərəcəklərinə inanır. Bu şuranı başqa nazirliklərin tərkibində fəaliyyət göstərən şura üzvlərindən fərqləndirən cəhətlər çoxdur. Qeyd edim ki, ilk növbədə, bu şurada təhsillə əlaqəsi olan, bütün prosesləri bilən, Azərbaycan təhsilinin inkişafına təkan verən insanlara üstünlük verilib. Əsas odur ki, İctimai Şurada mütəxəssislər, şuranın gələcək fəaliyyətinə müsbət təsir edəcək adamlar seçilib. Burada yaşlı nəslin mümayəndələri də təmsil olunurlar. Təhsil elə bir sahədir ki, mütləq burada təcrübə öz sözünü deyir”.
İ.Orucov bildirdi ki, İctimai Şuranın fəaliyyərti olduqca faydalı olacaq, ölkəmizdə təhsillə bağlı dövlətin həyata keçirdiyi siyasətə dəstək olacaq. Digər nazirliklərin nəzdində yaradılan ictimai şuralarla Təhsil Nazirliyi yanında yaradılan İctimai Şuranı müqayisə edən İ.Orucov vurğuladı ki, indiyə qədər nazirliklərin, mərkəzi icra hakimiyyətlərinin nəzdində yaradılan ictimai şuralarda həmin qurumların öz nümayəndələri təmsil olunur. “Başqa nazirliklərin, eləcə də mərkəzi icra hakimiyyətlərinin yanında fəaliyyət göstərən ictimai şuraların bir çoxunda həmin qurumların özlərinin əməkdaşları təmsil olunur. Təhsil Nazirliyi yanında yaradılan İctimai Şurada isə yalnız ictimaiyyət nümayəndələri yer alıb, burada nazirliyin heç bir nümayəndəsi təmsil olunmur” - deyə İ.Orucov bildirdi.
İradə SARIYEVA
