“Şagirdləri uğurlu nəticə göstərməyən məktəblərlə bağlı tədbirlər görüləcək”. Bu sözləri təhsil nazirinin müavini Məhəbbət Vəliyeva jurnalistlərə açıqlamasında bildirib. O qeyd edib ki, ümumtəhsil müəssisələrinin vəzifəsi məzunu ali məktəbə hazırlamaq deyil, onların qarşısında duran əsas vəzifə dövlət, cəmiyyət üçün sağlam vətəndaş yetişdirməkdir.
M.Vəliyeva bildirib ki, ali məktəbə qəbul olunmayan şagirdlər buna səbəb kimi təhsil aldıqları məktəbi göstərirlər: "Təbii ki, məktəb təlim-tərbiyə prosesini elə təşkil etməlidir ki, şagird gələcəkdə təhsilini davam etdirmək istəyində olsun. Bu işi lazımi şəkildə təşkil etməyi bacarmayan məktəblərlə bağlı Təhsil Nazirliyi ciddi tədbirlər görür. Növbəti dərs ilində bu ilin nəticələrinə əsasən şagirdləri uğurlu nəticə göstərməyən məktəblərlə bağlı müvafiq addımlar atılacaq".
Onu da qeyd edək ki, ali məktəbə qəbul imtahanında yüksək nəticə göstərən və göstərməyən rayonların adları açıqlanıb.
İlk 20-liyi təqdim edirik: Qubadlı - 77% (297 nəfər), Şəki - 73% (841 nəfər), Mingəçevir - 73% (460 nəfər), İsmayıllı - 73% (400 nəfər), Qax - 72% (215 nəfər), Neftçala - 71% (223 nəfər), Balakən - 67% (284 nəfər), Oğuz - 66% (209 nəfər), Ağcabədi - 65% (449 nəfər), Zaqatala - 63% (435 nəfər), Qazax - 63% (305 nəfər), Kürdəmir - 61% (294 nəfər), Gəncə - 58% (1178 nəfər), Sabirabad - 58% (345 nəfər), Yevlax - 58% (318 nəfər), Qəbələ - 54% (485 nəfər), Biləsuvar - 53% (262 nəfər), Ucar - 51% (189 nəfər), Ağdaş - 48% (310 nəfər), Masallı - 42% (546 nəfər).
Məlumat üçün bildirək ki, bu siyahını təhsil eksperti Kamran Əsədov şəxsi “Facebook” səhfəsində paylaşıb.
Maraqlıdır, şagirdləri uğurlu nəticə göstərməyən məktəblərlə bağlı nə kimi tədbirlər görüləcək?
Kamran Əsədov: “…bunun da səbəbi məktəbi bitirən gənclərin orta məktəb proqramını mənimsəməməsi ilə bağlıdır”
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, hər il ölkədə kifayət qədər şəxs məzun olur: “Keyfiyyət göstəricisi ondan ibarətdir ki, məzun olan gənclərin neçə faizi ali məktəbə sənəd verib və onlar arasında neçə nəfər tələbə adını qazanıb. Bakı Şəhər Təhsil İdarəsinə tabe olan məktəblərdən 19 722 şəxs məzun olub. O məzunların 17 468-i ali təhsil müəssisələrinə qəbul olunmaq üçün sənəd verib. Bunlardan yalnız 10000 məzun ali məktəbə qəbul olunub. Bu o deməkdir ki, məzunların 52 faizi tələbə adını qazana bilib”.
Həmsöhbətimizin sözlərinə görə, böyük rayonların bir qismində məzun sayı çox olsa da, tələbə adını qazanan gənclərin sayı azdır: “Cəlilabad rayonunda 1582 nəfər məzun olsa da, 363 nəfəri tələbə adını qazana bilib. Tovuz rayonunda da analoji hal yaşanıb. Belə ki, bu rayonda 1542 nəfər məzun olmağına baxmayaraq, 471 nəfəri ali məktəbə qəbul olunub. Təəssüf ki, bu hal bir çox rayonda qeydə alınıb. Yüksək nəticə göstərən məzunların sayı azdır. Ümumiyyətlə, ölkə üzrə məzunların 73 faizi ali məktəbə sənəd verib, sənəd verənlərin isə 39 faizi qəbul olunub. Bu statistika onu göstərir ki, Azərbaycanda ali təhsilli insanların sayı azalır. Bəzi bölgələrdə məzunların sayı ilə qəbul olunanların arasında təhlükəli məqam var. O məzunlar orta məktəb proqramını mənimsəməyiblər. Xüsusilə də riyaziyyat və ingilis dili dərsi ilə bağlı problem var. Bu problemlərin həll olunması üçün müəyyən işlər görmək lazımdır. Keyfiyyətin artması üçün konkret iş görmək lazımdır. Keyfiyyətin artması üçün dövlətin tələb etdiyi ay ərzində bir dəfə məktəblərdə imtahanlar keçirilməlidir ki, qəbul imtahanında keyfiyyət göstəricisi yüksəlsin”.
Günel CƏLİLOVA
