Albert Aqarunova heykəl qoyulmasının Azərbaycan üçün böyük önəmi...

Azərbaycan dövlətinin ərazi bütövlüyü uğrunda şəhid olan cəsur, qorxmaz vətən övladları arasında qeyri-azərbaycanlıların da olması onların Azərbaycana qəlbən bağlı olmasının təzahürüdür. Belə cəsur vətən övladlarından biri də Azərbaycanın Milli Qəhrəmanı, yəhidi əsilli Albert Aqarunovdur. 8 may 1992-ci ildə Şuşa uğrunda gedən döyüşlərdə snayper gülləsinə tuş gələn və döyüş meydanında qəhrəmancasına həlak olan Albert Aqarunova Bakıda abidə ucaldılıb. Bu günlərdə isə Milli Qəhrəmanın abidəsinin təntənəli açılış mərasimi keçiriləcək.

Doğulduğu Azərbaycan torpağını ürəkdən sevən və vətənimizin ərazi bütövlüyü uğrunda canını belə əsirgəməyən A.Aqarunov 1969-cu il aprelin 25-də Bakının Əmircan qəsəbəsində, yəhudi ailəsində anadan olub. 1992-ci ildə Albert Aqarunov könüllü olaraq cəbhəyə yollanıb. Tank komandiri təyin edilən A.Aqarunov Şuşa cəbhəsində döyüşüb. O, Xankəndi, Daşaltı, Cəmilli istiqamətində gedən döyüşlərdə erməni işğalçılarının xeyli canlı qüvvəsini, zirehli texnikasını məhv edib. Ermənilərin Şuşaya hücumu vaxtı A.Aqarunov düşmənin 9 tankını, 7 ZTR və bir çox texnikasını məhv edib. A.Aqarunov Bakıda Şəhidlər Xiyabanında dəfn edilib.

Bu il Milli Qəhrəmanın 50 illik yubileyidir. Qeyd edək ki, Milli Qəhrəmanın xatirəsinin əbədiləşdirilməsi istiqamətində böyük işlər görülüb. Belə ki, Bakıda vaxtilə təhsil aldığı 154 nömrəli məktəb və Nərimanov rayonunda küçə onun adını daşıyır. Məktəbin önündə Milli Qəhrəmanın büstü qoyulub. 2015-ci ildə “The Times of Israel” qəzetində amerikalı ravvin İsrail Barukun “Müsəlman torpağında yəhudi əsgəri” məqaləsi Aqarunova həsr olunub. 2017-ci ildə A.Aqarunovun Suraxanı rayonunun Əmircan qəsəbəsində yaşadığı binada xatirə lövhəsinin açılış mərasimi keçirilib. 2019-cu ildə Bakının Nərimanov rayonunda ona heykəl qoyulub. 2010-cu ildə "Salnamə" sənədli filmlər studiyası "Qarabağ qəhrəmanları" silsiləsindən onun haqda "Dostuma məktub" filmini çəkib. Filmin ssenari müəllifi və rejissoru Yefim Abramovdur. 2017-ci ildə Səadət Şükürova A.Aqarunov haqqında "Yaşadığım torpaq" sənədli filmini çəkib.

Azərbaycan Respublikası Prezidentinin 7 iyun 1992-ci il tarixli, 833 saylı fərmanı ilə Aqarunov Albert Aqarunoviç ölümündən sonra "Azərbaycanın Milli Qəhrəmanı" adına, 2016-cı ildə isə Milli Qəhrəman “Həzi Aslanov” medalına layiq görülüb.

Vaqif Abışov: “Albert Aqarunova abidə ucaldılması həm Azərbaycan və yəhudi xalqlarının bir-birinə qırılmaz tellərlə bağlı olduğunu, həm də dövlətimizin öz qəhrəmanına bəslədiyi ehtiramı göstərir”

Nərimanov rayonunda Milli Qəhrəman A.Aqarunovun heykəlinin qəhrəmanın adını daşıyan küçədə ucaldılmasının böyük tarixi əhəmiyyəti olduğunu deyən Azərbaycan Milli Elmlər Akademiyasının (AMEA) A.Bakıxanov adına Tarix İnstitutunun aparıcı elmi işçisi, tarix elmlər doktoru Vaqif Abışov bizimlə söhbətində bildirdi ki, A.Aqarunovun xatirəsinin əbədiləşdirilməsi istiqamətində görülən işlərin əhəmiyyəti yalnız ölkə üçün deyil, həm də beynəlxalq səciyyə daşıyır. Azərbaycan torpaqlarının erməni işğalından azad edilməsi uğrunda gedən döyüşlərə könüllü qatılan A.Aqarunovun göstərdiyi şücaətin misilsiz olduğunu deyən V.Abışov hesab edir ki, o, bu addımı ilə yalnız yəhudi xalqının deyil, həm də Azərbaycan xalqının, torpağının övladı olduğunu sübut edib. “Azərbaycanın ərazi bütövlüyü uğrunda həlak olan vətən oğulları sırasında A.Aqarunov və digər qeyri-türklərin olması onu deməyə əsas verir ki, milliyyətindən, dinindən asılı olmayaraq, bu torpaqda doğulan hər bir Azərbaycan vətəndaşı ölkəmizin müdafiəsinə hazır olub. Əlbəttə, A.Aqarunovun misilsiz qəhrəmanlığı, erməni işğalçılarına qarşı mübarizəsi, vətən uğrunda şəhid olması qürurvericidir. Aqarunovun xatirəsinə abidə ucaldılmasının mühüm cəhətlərindən biri ondan ibarətdir ki, Azərbaycanın azadlığı, ərazi bütövlüyü uğrunda şəhid olan qəhrəmanlar unudulmur və onların xatirəsi əziz tutulur, əbədiləşdirilir. Ona heykəl qoyulmamışdan əvvəl də xatirəsinin əbədiləşdirilməsi istiqamətində dövlət tərəfindən mühüm işlər görülüb. Hesab edirəm ki, Milli Qəhrəman A.Aqarunova Bakının mərkəzində, onun adını daşıyan küçədə abidə qoyulmasının beynəlxalq əhəmiyyəti də çoxdur. Bu məsələ bütün dünyanın diqqət mərkəzindədir. Bu gün Azərbaycanı dünyanın hər yerində ciddi şəkildə izləyirlər. Ölkəmiz bununla bir daha göstərir ki, Azərbaycan torpaqlarının ərazi bütövlüyü uğrunda həlak olan hər bir insan, qəhrəman unudulmur və onların adları nəsillərdən-nəsillərə keçir. A.Aqarunova abidə ucaldılması həm Azərbaycan və yəhudi xalqlarının bir-birinə qırılmaz tellərlə bağlı olduğunu, həm də dövlətimizin öz qəhrəmanına bəslədiyi ehtiramı göstərir. Onu da deyim ki, A.Aqarunovun bədii ədəbiyyatda da obrazı yaradılıb və bu da gənc nəslin vətənpərvərlik tərbiyəsinin formalaşmasında mühüm rol oynayan amillərdən biridir. Abidənin açılışından sonra bağça uşaqlarını, məktəb şagirdlərini həmin abidənin ziyarətinə aparmaq lazımdır.

Azərbaycanda yəhudi əsilli vətəndaşa heykəl qoyulması, eyni zamanda, ölkəmizin multikultural, tolerant bir ölkə olmasını da bir daha dünyaya göstərir. Düşünürəm ki, abidənin açılması hadisəsi yalnız Azərbaycanda deyil, xarici ölkələrdə də yaxından izlənəcək və Azərbaycan dövlətinin öz qəhrəmanına münasibəti təqdir ediləcək” - deyə qeyd edən V.Abışovun sözlərinə görə, ölkəmizdə qəhrəmanlıq ənənələrinin təbliğində Milli Qəhrəmana qoyulan abidə mühüm əhəmiyyət daşıyır.

İradə SARIYEVA