Sosial şəbəkədə bir müştəri Bakıda yerləşən “Paris Bistro” restoranında gender bərabərliyinin pozulması haqqında məlumat yayıb. Şikayətçi bildirir ki, o, iki dostu ilə həmin restoranda əyləşmək üçün içəri daxil olub.
Lakin ofisiant onları qapıda qarşılayaraq restoranda oturmaq üçün hər birinin 25 manat ödəməli olduğunu deyib: "Bunun yeni qayda olub-olmadığını soruşdum, cavab olaraq dedi ki, "xeyr, əvvəldən bizdə belə olub".
Telefon nömrələrinə zəng etdim və aydın oldu ki, 25 manat depozit ödəməli olmağımıza səbəb bizim oğlan olmağımızdır. Telefonda danışan şəxs dedi ki, hətta 10 nəfər kişi ilə 1 nəfər qadın gəlsəydi, depozit istənilməyəcəkdi. Bu da şəhərin ən müasir kafelərindən birində olan "gender ayrıseçkiliyi". 4 nəfər kişi bu restorana gediriksə, minimum 100 manat ödəməliyik. Nəyə görə? Kişi olduğumuza görə?”.
“Paris Bistro”: “Axşam 6-dan sonra 3 nəfər bəy gələrsə, adambaşı 25 manat ödəməlidirlər, amma yanlarındakı 4-cü şəxs xanım olarsa, depozit tətbiq edilmir, bu, restoranın daxili qaydasıdır”
Məsələni dəqiqləşdirmək üçün “Paris Bistro” restoranı ilə əlaqə saxladıq. Rertoranda çalışan şəxslərdən biri faktı təsdiqlədi: “Bəli, depozit restoranın terrasına tətbiq edilir. Axşam 6-dan sonra 3 nəfər bəy gələrsə, adambaşı 25 manat ödəməlidirlər. Amma yanlarındakı 4-cü şəxs xanım olarsa, depozit tətbiq edilmir. Bu, restoranın daxili qaydasıdır və başqa məsələlər var”.
Qeyd edək ki, bu qayda əvvəllər bəzi diskotekalarda tətbiq olunurdu. O cür məkanlara oğlan tək gəlsə idi, ya içəri buraxılmır, ya da əlavə pul tələb olunurdu. Şəhərdə fəaliyyət göstərən “Paris Bistro” restoranına oğlan qarşı cins olmadan daxil olursa, ondan əlavə depozit tələb edilməsi gender bərabərliyinin pozulmasına səbəb olur.
Fatimə Hacıbəyli: “Hansısa restorana bəy xanım olmadan daxil olarsa, ondan əlavə ödəniş tələb etmələri düzgün deyil”
“Vəfa” Sosial İctimai Birliyinin sədri Fatimə Hacıbəyli bizimlə söhbətində qeyd etdi ki, iaşə obyektlərində gender bərabərliyinin pozulması təəssüf doğurur: “Restorana və ya əyləncə mərkəzinə qadın, qız olmadan bəy daxil olarsa, ondan əlavə ödəniş tələb etmələri düzgün deyil. Bu hal ilk növbədə istirahət etmək istəyən şəxslərin hüququnu pozur. Hansısa restoran belə bir qayda tətbiq edirsə, bu, milli mentalitetə yaddır. Bu qayda tezliklə ləğv olunmalıdır”.
Günel CƏLİLOVA
