Xəbər verildiyi kimi, Prezident İlham Əliyevin məlum sərəncamlarına əsasən, sentyabrın 1-dən ölkəmizdə minimum əməkhaqqı 40 faizədək artırılaraq 180 manatdan 250 manata çatdırılıb. Eyni zamanda, dövlət sektorunda çalışanların əməkhaqlarında 20-50 faiz artımlar edilib.
Bununla da Azərbaycanda minimum əməkhaqqı məbləğinin 92,3 faiz artırılmasına, eyni zamanda, bu məbləğin yaşayış minimumunu (180 manat) 40 faiz üstələməsinə nail olunub.
Minimum əməkhaqqının artımı ilk pilləsi minimum əməkhaqqı məbləği səviyyəsində olan vahid tarif cədvəlinin bütün pillələri üzrə edilən artımlar da nəzərə alınmaqla 950 min nəfərin (o cümlədən, dövlət sektoru üzrə 600 min, özəl sektor üzrə 350 min nəfərin) maaşının artmasına imkan verib. Azərbaycan minimum əməkhaqqının səviyyəsinə görə tək qonşu ölkələrlə deyil, MDB ölkələri ilə müqayisədə edildikdə alıcılıq qabiliyyəti indeksi üzrə artıq ikinci yerə sahibdir. İkinci sosial paketin tərkib hissəsi kimi, minimum əməkhaqqının və dövlət sektorunda işləyənlərin əməkhaqlarının artımı ümumən 1 milyon 350 min insanın əməkhaqqı gəlirlərinin əhəmiyyətli şəkildə artması ilə nəticələnib.
Böyük sosial paket çərçivəsində imzalanan sənədlər, müxtəlif sahələr üzrə həyata keçirilən yeniliklər ölkə vətəndaşlarının həyat şəraitini yaxşılaşdırmaqla yanaşı, onları gələcəyə daha da nikbinliklə baxmağa həvəsləndirir. Bütün bunlar, əlbəttə ki, Prezident İlham Əliyevin iqtisadi islahatlarının təzahürüdür. Məhz bu islahatlar nəticəsində ölkədə maliyyə sabitliyi və iqtisadi artım yaranıb. Bir çox sahələrdə, xüsusilə kənd təsərrüfatı, qeyri-neft sənayesi və digər sektorlarda əhəmiyyətli irəliləyiş əldə edilib. Büdcəyə daxilolmaların həcmi yüksəlib. Bu da imkan verir ki, genişmiqyaslı sosialyönümlü tədbirlər görülsün. Bu tədbirlər çərçivəsində əməkhaqları, pensiyalar və müavinətlər artırılır. Bütün bunlarla yanaşı, 1 milyon 350 min insanın əməkhaqqı gəlirlərinin əhəmiyyətli şəkildə artması və ümumən sosial islahatlar paketinin hansı beynəlxalq əhəmiyyəti var?
Elçin Mirzəbəyli: “Fikrimcə, bunun Azərbaycan üçün çox böyük beynəlxalq əhəmiyyəti var”
Məsələyə münasibət bildirən politoloq Elçin Mirzəbəylinin sözlərinə görə, bunun beynəlxalq əhəmiyyəti böyükdür: “Əvvəla sosial paketə ölkəmizdə həyata keçirilən sosial-iqtisadi islahatların tərkib hissəsi kimi yanaşıram. Dünyanın heç bir ölkəsində islahatlar aparılan zaman əhalinin sosial müdafiəsinə bu qədər böyük vəsait ayrılmır. Fikrimcə, bunun Azərbaycan üçün çox böyük beynəlxalq əhəmiyyəti var. Şərqi Avropada aparılan islahatları xatırlasaq görərik ki, orada fərqli mənzərə yaranıb. Həmin dövrlərdə aparılan islahatlar zamanı əhalinin gəlirləri qısa müddət ərzində kəskin şəkildə azaldı. Maliyyə resursları əsasən iqtisadi islahatların aparılmasına yönəldildi. Ancaq Şərqi Avropa ölkələrindən fərqli olaraq, Azərbaycanda bu yöndə aparılan islahatların paralel şəkildə həyata keçirildiyinin şahidi oluruq. Bir tərəfdən islahatlar aparılır, o biri tərəfdən isə əhalinn sosial müdafiəsi ilə bağlı tədbirlər görülür. Əməkhaqları və pensiyalar əhəmiyyətli şəkildə artırılır. Hesab edirəm ki, Azərbaycanın təqdim etdiyi bu model unikaldır. Bu ondan qaynaqlanır ki, Azərbaycanda yürüdülən siyasətin təməlində ölkə vətəndaşı dayanır. Yəni hədəf, bütün hallarda, Azərbaycan vətəndaşının rifah halını yüksəltməkdən ibarətdir. Düşünürəm ki, məhz bu faktor da ölkəmizə beynəlxalq miqyasda diqqətin artırılmasında mühüm rol oynayacaq. Azərbaycanda bu yöndə gedən proseslər uzun zaman beynəlxalq ekspertlərin, araşdırmaçıların diqqət mərkəzində olacaq”.
Vidadi ORDAHALLI
