Kibertəhlükə bütün dünyada böyük həyəcan doğuran bir cinayətkarlıq növüdür ki, dünyanın müxtəlif dövlət təşkilatları, bankları, qurumları bundan ciddi zərər çəkirlər.
Azərbaycanda da bu hallar mövcud olub. Məlum olduğu kimi, ölkəmizdə kibercinayətkarlığa qarşı ciddi mübarizə tədbirləri həyata keçirilir. Elə bu tədbirlərin, görülən davamlı işlərin nəticəsidir ki, Azərbaycanda dövlət qurumlarının kibertəhlükəsizliklə bağlı etdiyi sorğuların sayı azalıb.
Rəsmi məlumata görə, bu ilin avqust ayında Azərbaycanda kompyuter təhlükəsizliyi ilə bağlı dövlət strukturları tərəfindən açılmış sorğuların sayı iyul ayı ilə müqayisədə 20,6% azalaraq 280 ədəd təşkil edib. Mətbuatın yaydığı statistikaya görə, avqust ayı ərzində mərkəzə daxil olan sorğulardan 91,7%-nə baxılıb və təmin edilib.
Kibercinayətkarlığa qarşı Elektron Təhlükəsizlik Mərkəzi tərəfindən informasiya təhlükəsizliyi üzrə audit keçirilərək, müvafiq dövlət qurumlarına 23 hesabat təqdim edilib. Mərkəzdən verilən məlumata əsasən, cari ilin avqust ayında Azərbaycan internet məkanında dövlət qurumlarına aid 11 domen və 18 subdomen qeydiyyatdan keçib.
Ümumilikdə, cari ilin yanvar-avqust aylarının nəticələrinə görə, kompyuter təhlükəsizliyi ilə bağlı müraciətlərin ümumi sayı 2509 təşkil edib. Qeyd olunan dövr ərzində ümumi sorğunun 93,6%-nə baxılıb və təmin edilib. Bu müddət ərzində aparılan informasiya təhlükəsizliyinin yoxlanışı əsasında 162 hesabat hazırlanaraq müvafiq strukturlara göndərilib. Yanvar-avqust ayları ərzində Azərbaycanın internet seqmentində 35 domen və 62 subdomen qeydiyyata alınıb.
Osman Gündüz: “Son dövrlər ölkəmizdə dövlət qurumlarında ciddi mərkəzləşdirmə aparılıb”
"Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz “Bakı-Xəbər”ə bildirdi ki, Azərbaycanda dövlət qurumlarının kibertəhlükəsizliklə bağlı etdiyi sorğuların sayının azalması bu sahədə həyata keçirilən tədbirlərlə bağlıdır. “Hesab edirəm ki, bu bir tərəfdən Azərbaycanda informasiya təhlükəsizliyi ilə bağlı işlərin gücləndirilməsi ilə əlaqədardır. Son dövrlər ölkəmizdə dövlət qurumlarında ciddi mərkəzləşdirmə aparılıb. Bununla əlaqədar xüsusi dövlət qurumu formalaşdırılıb, eyni zamanda da Prezidentin fərmanı ilə informasiya təhlükəsizliyi sahəsində görülən işlərin koordinasiyası üçün dövlət komissiyası da yaradılıb. Ayrıca bir dövlət komissiyası fəaliyyət göstərir ki, o da bütövlükdə, informasiya təhlükəsizliyi ilə bağlı işlərin qaydaya salınması, koordinasiya edilməsi, qabaqlayıcı tədbirlərin görülməsi, hüquqi-normativ bazanın hazırlanması sahəsində işlər görür. Hazırda bu sahədə iki əlavə sənəd də hazırlanır”.
O.Gündüzün sözlərinə görə, bu sənədlərin hazırlanması prosesi ləng gedir. O qeyd etdi ki, Prezident fərmanı ilə kibercinayətkarlığa qarşı mübarizə və informasiya təhlükəsizliyi ilə bağlı konsepsiya hazırlanmalı idi. “Lakin bu sənədlərin hazırlanma prosesi ləng gedir. Halbuki, Prezidentin fərmanında nəzərdə tutulan müddət çoxdan başa çatıb. Bu sənədlər artıq qəbul olunmalı idi. Ancaq indiyə qədər bu sənədlər ictimai müzakirəyə də çıxarılmayıb ki, bu sənədlərdə nələrin əks olunduğunu ictimaiyyət də bilsin. Bununla belə, qeyd edtmək lazımdır ki, son dövrlər bu istiqamətdə bir xeyli iş görülüb. Azərbaycanda dövlət qurumlarının kibertəhlükəsizliklə bağlı etdiyi sorğuların sayının azalması həm də bu istiqamətdə görülən işlərlə bağlı ola bilər” - deyə O.Gündüz dedi.
Qeyd edək ki, Azərbaycan Respublikasının Prezidenti İlham Əliyev 27 iyun 2019-cu il
tarixində “İnformasiya Təhlükəsizliyi üzrə Koordinasiya Komissiyasının yaradılması haqqında” Azərbaycan Respublikası Prezidentinin 2018-ci il 29 mart tarixli, 3851 nömrəli Sərəncamında dəyişiklik edilməsi barədə Sərəncam imzalayıb.
İradə SARIYEVA
