Paytaxtda ictimai mənəviyyat əleyhinə və milli mentalitetə zidd olan hallara qarşı mübarizə gücləndirilir. Bu məqsədlə sentyabrın 2-dən başlayaraq Bakı Şəhər Baş Polis İdarəsinin rəhbərliyi tərəfindən təsdiq olunan Tədbirlər Planına müvafiq olaraq, polisin səlahiyyətləri çərçivəsində konkret vəzifələr müəyyən olunaraq icraya yönəldilib.
Bu barədə açıqlama verən idarənin mətbuat xidmətinin rəisi, polis mayoru Elşad Hacıyev sözügedən məsələ ilə bağlı bir sıra məqamlara toxunub. Onun sözlərinə görə, paytaxt sakinlərindən daxil olan müraciətlərin, müşahidə olunan sosial-neqativ halların təhlilləri göstərir ki, Bakıda fəaliyyət göstərən bəzi əyləncə-istirahət yerlərində - gecə klubları, barlar, otel və motellər, mərkəzi küçələrdə ictimai mənəviyyat əleyhinə, əxlaqazidd hallar var: “Əxlaqazidd olan bütün halların forma və təzahürlərinə qarşı mübarizənin effektivliyini artırmaq üçün milli-mənəvi dəyərlərimizə uyğun olmayan davranışların, ictimai əhəmiyyət kəsb edən digər neqativ halların qarşısının alınması üçün kompleks profilaktik tədbirlərin həyata keçirilməsi nəzərdə tutulur.
Əsasən Səbail rayonu ərazisində yerləşən “Fəvvarələr meydanı” və Nizami küçəsində, Nəsimi rayonu Səməd Vurğun və Nizami küçələrinin kəsişmələrində yüngül əxlaqlı həyat tərzi sürən şəxslərin profilaktikasına dair tərkibi əməliyyat, təhqiqat, ictimai təhlükəsizlik əməkdaşlarından ibarət fasiləsiz fəaliyyət göstərən xüsusi naryad qrupları yaradılıb”.
Ümumilikdə, milli mentalitetə zidd olan hallara qarşı zaman-zaman müəyyən maarifləndirici, ictimai qınaq xarakterli işlər görülür. Ancaq bəzən bu kimi addımların atılması yetərli nəticə vermir. Belə olan halda, inzibati xarakterli addımların atılması zərurəti ortaya çıxır. Hansı ki, bununla bağlı ictimaiyyətdə çağırışlar səslənirdi. Ona görə də polisin sözügedən addımları atması həm də sosial və ictimai sifarişdən irəli gəlir. Cəmiyyətdə bununla bağlı sosial sifarişin olması ortadadır. Təsadüfi deyil ki, BŞBPİ-nin məlum qərarı sosial şəbəkələrdə böyük rəğbətlə qarşılanıb. Buna böyük dəstək var və hesab edirlər ki, belə bir addımın atılması mənəvi-əxlaqi baxımdan mühüm əhəmiyyət kəsb edir.
Seyid Camal Əzimbəyli: “Azərbaycanı yad təsirlərdən, ölkədə milli mənəviyyatı, mentaliteti qorumaq üçün inzibati metodların tətbiqi olduqca zəruridir”
Bununla bağlı fikirlərini “Bakı-Xəbər”lə bölüşən şərqşünas Seyd Camal Əzimbəyli məlum qərarı alqışladığını bildirdi: “Birmənalı olaraq bunu dəstəkləyirəm və hesab edirəm ki, bu, yerində verilən bir qərardır. Fikrimcə, Azərbaycanda milli-mənəvi dəyərlərə bağlı olan xalqın mütləq əksəriyyəti bunu dəstəkləyir. Çünki biz dəfələrlə bayan etmişik ki, ölkədə mill-mənəvi dəyərlərin təəssübkeşi Azərbaycan dövlətidir. Dünyəvi dövlət olsaq da, milli-mədəni irsimizin də təəssübkeşi Azərbaycan dövlətidir. Azərbaycanı yad təsirlərdən, ölkədə milli mənəviyyatı, mentaliteti qorumaq üçün inzibati metodların tətbiqi olduqca zəruridir. Zərurət yarandığı üçün belə addımların atılması məqsədəuyğundur. Bu kimi məsələlərdə hər zaman dövlətimizin yanındayam. Hesab edirəm ki, hər bir düşünən fkir adamı, övladının gələcəyini düşünən hər bir kəs ölkədə mənəvi dəyərlərin qorunması üçün dövlətin atdığı bütün zəruru addımlara dəstək verməlidir. Milli mentalitetə zidd olan hallara qarşı mübarizədə dövlətin yanında olmalıdır. Polisin bu yöndə gördüyü tədbirlərə hərtərəfli dəstək verilməlidir. Çünki bu kimi məsələlərə son dərəcə diqqət etmək günün tələbidir. Ona görə ki, bütün bunlar uşaqların, gənclərin tərbiyəsinə, əxlaqına, mənəviyyatına təsir edir”.
Vidadi ORDAHALLI
