Sosial şəbəkələrdə Nərgiz Həsənli adında şəxs Avstriyada oxumaq üçün müraciət etdiyi “Leveland” kursunun təmsilçisi olan İsgəndər Ağayev tərəfindən aldadıldığını deyib: “Gördüyünüz bu şəxs 6 ay əvvəl məndən 3500 manat alaraq Avstriyada təqaüdlü təhsil sözu verib.
Bu şəxsin adı İsgəndər Ağayevdir. “Leveland” adlı kursda işləyirdi. İki aydır kursu bağlayib, “İnstagram” və “Facebook” səhifələrini silib. Nə zənglərə cavab verir, nə mesajlara. Məndən başqa da onlarla adamın pulun alıb aradan cıxıb. Polisə ərizə yazmışam, dediklərinə görə, ölkəni tərk edib və onun barəsində 100-ə yaxın şikayət var. Bu qrupda başqa kimisə aldadıbsa, bura yazsın zəhmət olmasa”.
Qeyd edək ki, Nərgiz Həsənli bu fikirlərini sosial şəbəkədəki qruplardan birinə ünvanlayıb və həmin qrup da bunu yayıb. Nərgiz Həsənlinin şəxsən özü ilə əlaqə yaradıb məsələni ətraflı öyrənmək mümkün olmadı.
Ancaq internet üzərindən “Leveland” adlı kurs barədə bəzi araşdırmalar apardıq. Çox qəribədir ki, adı dələduzluqda hallanan təhsil mərkəzi barədə cəmi iki internet resursunda çox cüzi məlumat var. Ümumiyyətlə, bu kursun öz rəsmi internet ünvanı, saytı yoxdur. Məlum oldu ki, "Leveland" Təhsil İnkişaf Mərkəzi 2016-cı ilin 22 mayında fəaliyyətə başlayıb və mərkəzin direktoru həqiqətən də İsgəndər Ağayevdir.
İkinci məlumat isə 2016-cı il oktyabrın 27-də Xəzər Universiteti Karyera Mərkəzi ilə “Levelland” Təhsil İnkişaf Mərkəzinin görüşü barədədir. Xəzər Universitetinin tələbə və məzunlarının iştirak etdiyi görüşdə “Levelland” Təhsil İnkişaf Mərkəzinin drektoru İsgəndər Ağayev mərkəzin fəaliyyəti, eyni zamanda, ABŞ, İngiltərə və digər Avropa ölkələrində təqaüd və staj proqramları barədə məlumat verib. Bu məlumatlardan başqa, sözügedən təhsil mərkəzi barədə heç bir məlumata rast gəlmədik. Adətən belə mərkəzlərin konkret ünvanları olur.
Məsələ ilə əlaqədar Xəzər Universiteti ilə əlaqə saxladıq. Universitetdən adını cəkməyən bir şəxs bildirdi ki, onların “Levelland” Təhsil İnkişaf Mərkəzi ilə heç bir bağlılığı, yaxınlığı yoxdur. Sadəcə, 3 il əvvəl bir görüş keçirilib.
Məhərrəm Zülfüqarlı: “Gənclər xaricdə təhsil almaq məsələsində aldanmamaq üçün birbaşa həmin universitetlərin özləri ilə əlaqə saxlamalıdırlar”
Sözügedən məsələ ilə bağlı fikirlərini “Bakı-Xəbər”lə bölüşən təhsil sahəsi üzrə ekspert Məhərrəm Zülfüqarlının sözlərinə görə, xaricdə təhsil almaq istəyən gənclər dələduzluqla məşğul olan mərkəzlərin toruna düşməmək üçün ayıq-sayıq olmalıdırlar: “Belə kursların nə dərəcədə ciddi olması araşdırılmalıdır. Ondan sonra müraciət etməklə bağlı qərar verməlidirlər. Çünki Azərbaycan gənclərinin əksəriyyəti internet resurslarından istifadə etmək bacarığına malikdir. İndi elə dövrdə yaşayırıq ki, təyyarə biletindən tutmuş, digər xidmətləri belə, internet üzərindən almaq olur. Ona görə də gənclər xaricdə təhsil almaq məsələsində aldanmamaq üçün birbaşa həmin universitetlərin özləri ilə əlaqə saxlamalıdırlar. Hər bir universitetin saytı var. Həmin saytlara girib bütün məlumatları əldə etmək olar. Buna görə hansısa kursa müraciət etməyə ehtiyac yoxdur. Nəzərə almaq lazımdır ki, dələduzluqla məşğul olan kurslar əsasən bir az aşağı savadı olan gəncləri aldadırlar. Onların pulunu mənimsəyirlər. Ona görə də aldanmamaq üçün birbaşa həmin ali məktəblərlə əlaqə saxlamaq daha məqsədəuyğundur”.
Vidadi ORDAHALLI
