Sosial şəbəkələrdə bütün peşə və sənət sahiblərinin fəaliyyətini yaxından izləmək mümkündür. Bu gün istənilən sahənin adamını Facebook, İnstaqram, Odnoklasnik və digər sosial şəbəkələrdə görə bilirik. Sosial şəbəkələrdə geniş meydan açan və burada müxtəlif qorxulu rituallar, ayinlər həyata keçirən cadugərlər, falçılar da kifayət qədər aktivdilər. Bu platformada cadugərlər, ekstrasenslər, falçılar müxtəlif səhifə və qruplar yaradaraq öz əməllərini icra edirlər.
Məsələn, Facebookda “Abra Cadabra” adlı bir qrup var və bu qrupun da əsas üzvləri müxtəlif yaş qrupunda olan qadınlardır. Qadınlar onları narahat edən məsələlərlə, xüsusən də ailədaxili problərinin həll edilməsi yolları ilə bağlı həmin qrupda təmsil olunan cadugərlərdən, falçılardan “mədət” umurlar. Qrupda açıq şəkildə bildirilir ki, burada təmsil olunan cadugərlər ən ağılagəlməz vasitələrlə müxtəlif qorxulu rituallar həyata keçirirlər. Hətta onlar qara magiya ilə məşğul olduqlarını, bu yolla istənilən adamı caduladıqlarını da qeyd edirlər. Bu ritualların həyata keçirilməsi prosesini əks etdirən foto və videolar da qrupda yerləşdirilir və elan edilir ki, psixoloji vəziyyəti normal olmayan insanlar bu ritualları izləməsin.
Burada ay bədrlənərkən insanda “üçüncü göz”ün (?) açılması üçün bir ritual haqqında məlumat verilir, sonra qara magiyanı tətbiq etmək üsulları öyrədilir və s.
Əlbəttə, bütün bunlar qara qüvvələrin təbliğinə, qara niyyətlərin yayılmasına yönəlib.
Qadınlar cadugərlərdən əsasən gənc və yaraşıqlı oğlanları, başqasının ərini onlara “bağla”ması üçün kömək istəyirlər. Qruplarda yazırlar ki, bir kişidən xoşum gəlir, amma o mənə baxmır, onu özümə cəlb etmək üçün cadu etdirmək istəyirəm. Başqa birisi qeyd edir ki, ərimi evə bağlaya bilmirəm, mənə əhəmiyyət vermir, bütün gününü dostları ilə çayxanalarda keçirir, evə səhərə yaxın gəlir, onu evə bağlamaq üçün mənə “şirinlik” duası yazın. Digər bir qadın isə qaynanasına, baldızına, ərinin qohumlarına cadu etdirmək istəyir. Cadugərlər də həmin xanımlara internet vasitəsilə “məsləhət”lər verir, cadu yazdırmaları üçün onları fəaliyyət göstərdiyi yerə dəvət edir. Bəziləri evini cadulardan təmizləmək üçün cadugərlərə üz tutur, bəziləri isə varlanmaq, var dövlətə çatmaq üçün. Onu da deyək ki, bu qruplarda cadugərlərə müraciət edənlər sırasında 15-18 yaşlı qızlar da az deyil. Bu qızlar “sevgili”ləri ilə barışığa nail olmaq üçün cadugərə üz tuturlar. Cadugərlər də onların arzularını “çin etmək” istiqamətində fəaliyyətə keçirlər. Cadugərlərin ağlasığmaz hərəkətləri, həyata keçirdikləri rituallar, qara qüvvələrlə “mistik” əlaqəyə girərək insanları cadulaması həqiqətən də dəhşətdir. Bir sözlə, cadugərlər sosial şəbəkələrdə əməlli-başlı dəm-dəstgah açıb insanların “dərdinə çarə” tapırlar.
Könül Vaqifqızı: “Cadugərlər sosial şəbəkələrdə “qara magiya”nın gücü ilə ailələri dağıdır, insanların psixikasına mənfi təsir edirlər”
Psixoloq Könül Vaqifqızı bizimlə söhbətində bildirdi ki, sosial şəbəkələrdə cadugər və falçıların aktivləşməsi olduqca mənfi tendensiyadır. Cadugərlərin etdiyi qara magiyanın onların bu xidmətindən istifadə edən insanlara faciələr yaşatdığını deyən K.Vaqifqızı hesab edir ki, qadınlar cadugərlərə, falçılara deyil, özlərinə güvənməlidir. Dinimizin də birmənalı olaraq qəbul etmədiyi cadugərliyin az qala bir “dini ayin” kimi təqdim edilməsinin də yolverilməz olduğunu bildirən ekspert hesab edir ki, falçı və cadugərlərin sosial şəbəkələrdəki profil, səhifə və qrupları ciddi nəzarət altına alınmalıdır. “XXI əsrdə yaşamağımıza baxmayaraq, hələ də qadınların, qızların xeyli bir qismi cadugərə, falçıya, ekstrasensə inanır. Bu da cadugərlərin qol-qanad açmasına, öz fəaliyyətlərini daha da geniş qurmasına imkan verir. Əvvəllər bir falçının, cadugərin yanına getmək üçün qadınlar “əziyyət” çəkirdilər, indi isə sosial şəbəkələr vasitəsilə onlar qadınların evlərinə, həyatlarına daxil olublar. Sosial şəbəkələrdə falçı və cadugərlərin yaratdıqları səhifə və qrupların bəzilərini təsadüfən izləmişəm və dəhşətə gəlmişəm. Burada elə qorxulu rituallar həyata keçirilir ki, adam vahimələnməyə bilmir. Cadugərlər sosial şəbəkələrdə “qara magiya”nın gücü ilə ailələri dağıdır, insanların psixikasına mənfi təsir edirlər. Burada onların insan şüurunda gərginlik yaratmasından, onlara psixoloji təsir etməsindən söhbət gedir. Bəli, qrup və səhifələrdə elə ritualların videogörüntüləri yayılır ki, həqiqətən də ona qorxusuz tamaşa edə bilmirsən”.
K.Vaqifqızının sözlərinə görə, hər hansı bir çətinliyi olan xanımlar cadugər və falçılara deyil, psixoloqlara müraciət etsələr, öz problemlərinin həllinə daha tez nail ola bilərlər. Onun dediyinə görə, qadınlar psixoloqlardan qaçıb falçılara, cadugərlərə “sığınır”lar. “Sosial şəbəkələrin azad olmasından istifadə edən cadugər və falçılar şirin vədlərlə qadınları özlərinə cəlb edərək onlara “məsləhət”lər verirlər. Əslində isə onların “məsləhət”lərinin o qadınlara heç bir faydası dəymir, həm pulları gedir, həm də əsəbləri korlanır. Problemi olan qadınlar falçıya, cadugərə yox, psixoloqa, mütəxəssisə müraciət etsə daha yaxşı olar. Amma onlar falçılardan “kömək” umurlar”-deyə o qeyd etdi.
Ülviyyə NAĞIYEVA
