Son aylar ölkədə uşaqlar üçün verilən müavinətin bərpa olunacağı ilə bağlı məlumatlar mütəmadi olaraq gündəmə gəlir. Uşaq pulunun yenidən veriləcəyi barədə xəbərlər rəsmi şəxslər tərəfindən səslənir. Məlumat üçün bildirək ki, 2006-cı il iyunun 1-dən Azərbaycanda "uşaq pulu" verilmir. Həmin dövrdə bu qərar uşaqlar üçün verilən pulun məbləğinin az olması ilə əsaslandırılıb və dövlətin ünvanlı sosial yardıma üstünlük verdiyi açıqlanıb.
Onu da qeyd edək ki, hazırda ölkədə 17 yaşadək olan uşaqların sayı təxminən 2 milyon 614 min nəfərdir. Uşaqların sosial qayğısının həll olunması istiqamətində onlar üçün müavinətin verilməsi fikri hər kəs tərəfindən müsbət qarşılanır. Hətta parlament təmsilçiləri də dəfələrlə öz çıxışlarında bildiriblər ki, Milli Məclisin payız sessiyasında bu məsələ müzakirəyə çıxarılacaq.
Vüqar Bayramov: “Sosial paketin də təqdim olunduğunu nəzərə alsaq, uşaq pulunun bərpası mümkündür”
Uşaq pulunun yenidən verilməsi barədə fikir bildirən iqtisadçı ekspert Vüqar Bayramov qeyd etdi ki, uşaq pulu məsələsi ilk olaraq gündəmə gələn ərəfədə beyin mərkəzi olaraq parlament üzvləri və bir sıra hökumət qurumları ilə məsələ müzakirə edilib:“Uşaq pulu”nun bərpası ilə bağlı təkliflər paketi İqtisadi və Sosial İnkişaf Mərkəzi tərəfindən hazırlanıb və Azərbaycan hökumətinə təqdim olunub. Biz bir neçə ay öncə uşaq pulunun bərpası ilə bağlı mexanizmi hökumətə təqdim etdikdə həm parlament üzvləri, həm digər dövlət qurumları ilə məsələ müzakirə edildi. Məsələ parlament üzvləri arasında da müzakirə olunub. Parlamentdə ilkin olaraq 3 yaşına qədər "uşaq pulu”nun verilməsi müzakirə edilib. Lakin nə parlamentdə, nə də hökumət qurumları tərəfindən “uşaq pulu”nun bərpası ilə bağlı vaxt göstərildi".
Iqtisadçının fikrincə, 3 yaş qrupuna aid olan uşaqlar üçün 2.6 milyard manat vəsait lazımdır. Bununla yanaşı, büdcədən həmin vəsaitə qənaət etmək də lazımdır: “Biz isə "uşaq pulu”nun bərpası ilə bağlı üç yaş qrupu müəyyənləşdirmişik. Birinci yaş qrupu 3 yaşına qədər olan uşaqlardır. Bu yaş qrupunda olan uşaqlara daha çox "uşaq pulu”nun verilməsinin tərəfdarıyıq. Bunun səbəbi də onunla bağlıdır ki, 3 yaşına qədər olan uşaqların xərcləri daha çoxdur. Uşaq qidaları bahadır, səhiyyə xərcləri var. İkinci qrupa 3-6 yaş arası uşaqlar daxildir. Üçüncü mərhələyə 7-17 yaş arası olan uşaqlar daxildir. Bizim hesablamalarımız göstərir ki, bütün 17 yaşına qədər uşaqlara "uşaq pulu”nu vermək üçün 2.6 milyard manat vəsait tələb olunur. Biz eyni zamanda büdcədə həmin vəsaitə necə qənaət edilməsinə və həmin vəsaitin maliyyələşdirilməsi yollarını da göstərmişik. Ona görə də düşünürəm ki, “uşaq pulu” bərpa oluna bilər. Onu da bildirim ki, inkişaf etmiş ölkələrin hamısında “uşaq pulu” verilir. Fərqli mexanizmlər var. Məsələn, İtaliyada "uşaq pulu” ailənin gəlir səviyyəsinə uyğun verilir, daha çox gəliri olan ailələrə "uşaq pulu” verilmir. Bəzi ölkələrdə uşaqların sayına görə verilir. Birinci uşağa vəsait verilmir, ikincidən başlayaraq uşaqların sayı artdıqca "uşaq pulu”nun da məbləği artır. Əksər ölkələrdə əhalinin gəlirlərindən və uşaqların sayından asılı olmayaraq "uşaq pulu” verilir. Azərbaycanda da bunun üçün kifayət qədər maliyyə var”.
Həmsöhbətimiz onu da vurğuladı ki, ölkədə “uşaq pulu”nun bərpası üçün imkanlar var, son qərarı hökumət verməlidir: "Sosial paketin də təqdim olunduğunu nəzərə alsaq, uşaq pulunun bərpası mümkündür. Amma bütün hallarda qərarı hökumət verir. Nəticəni bilmək üçün hökumətin rəsmi qərarı olmalıdır. Ümid edirik ki, yaxın vaxtlarda "uşaq pulu”nun bərpasını görə biləcəyik”.
Günel CƏLİLOVA
