“Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında” Prezident fərmanının icrasına başlandığı gündən əhalinin bəzi banklardan narazılığı artmaqda davam edir.
Biz bu istiqamətdə apardığımız araşdırmalar zamanı müəyyən etmişik ki, vətəndaşlara dövlət tərəfindən müəyyən edilən kompensasiyaların ödənişində problemlərin yaşandığı banklardan biri də “Akcces Bank”dır. Daha əvvəl “Unibank”ın da belə saysız-hesabsız qanunsuzluqlara yol verdiyi barədə yazmışdıq. Redaksiyamıza müraciət edən Yardımlı rayon Solqard kənd sakini Valeh Hüseynli bildirir ki, "Access Bank"ın Bakıxanov filialı ona çatacaq 2400 manat kompensasiyanı ödəmir.
O bildirib ki, bank ölkə başçısının sərəncamına əməl etmir: "2015-ci ildə "Access Bank"ın Bakıxanov filialından 10000 dollar kredit götürmüşdüm. Təxminən krediti götürdüyümdən 1 ay sonra ölkədə devalvassiya oldu. Buna baxmayaraq, banka borcumu tam ödədim. Bu ilin əvvəlində prezident banklarda dollar fərqinə görə ödənilmiş pulların vətəndaşlara geri qaytarılması ilə bağlı fərman imzaladı. Bu fərmandan sonra “Access Bank” mənə çatan 2400 AZN kompensasiyanı ödəmir".
Valeh Hüseynli deyir ki, hazırda ölkədə olmadığı üçün vəkilinə etibarnamə verib, lakin bank Azərbaycan konsulluğunun verdiyi etibarnaməni saxta hesab edir: "Hazırda ölkədə olmadığım üçün öncə vəkilim Fuad Şirinova etibarnamə göndərdim. Bank o etibarnaməni qəbul etmədi. Bankın tövsiyə etdiyi etibarnaməni hazırlayıb Azərbaycan Respublikasının Berlindəki Konsulluğunda rəsmiləşdirib qardaşım Dadaşov Taleh Əlisalam oğlunun adına göndərdim. Bu dəfə isə bank etibarnaməni tanımadı və saxt olduğunu iddia edir. Etibarnaməni verən orqan Azərbaycan Respublikasının, Almaniya Federativ Respublikasındakı konsulluğudur. Necə ola bilər ki, konsulluğun verdiyi etibarnaməni bank saxta saysın? Dəfələrlə Banka rəsmi müraciət etsəm də, cavab verilmir". Şikayətçi qeyd edir ki, atıq yaranmış vəziyyətlə bağlı hüquq-mühafizə orqanlarına şikayət etmək məcburiyyətində qalıb.
Vətəndaşın şikayəti ilə bağlı "Access Bank"a gün ərzində etdiyimiz müraciətlərə lazımi cavab ala bilmədik. Bankdan bizə bildirdilər ki, belə məslələrlə bağlı şifahi məlumat vermirlər. Qeyd edildi ki, vətəndaşın konfidensial məlumatları ilə bağlı yalnız onun özünə informasiya verilə bilər. Xatırladaq ki, vətəndaş da məhz bankdan məlumat ala bilmədiyi üçün bizə müraciət edib. Bütün bunlara rəğmən biz vətəndaşın şikayətini sözügedən bankın elektron ünvanına da göndərdik. Veriləcək cavabı dərc etməyə hazırıq.
Məhəmmədəli QƏRİBLİ
