Xəbər verildiyi kimi, Heydər Əliyev Fondunun dəstəyi ilə Azərbaycanda ilk dəfə Üzüm və Şərab Festivalı keçiriləcək. Sözügedən festival avqustun 30-31-də Şamaxı rayonunun Meysəri kəndində keçiriləcək.
Festival Heydər Əliyev Fondunun dəstəyi, Kənd Təssərüfatı Nazirliyi, Şamaxı Rayon İcra Hakimiyyəti, “Regional İnkişaf” İctimai Birliyi, Dövlət Turizm Agentliyi və Azərbaycan Milli Xalça Muzeyinin birgə təşkilatçılığı ilə keçirilir.
Layihənin məqsədi yerli üzüm və şərab istehsalının təşviqi, şərab məhsullarının ixrac potensialının artırılması, Azərbaycanda şərab istehsalı tarixinin geniş ictimaiyyətə çatdırılmasıdır.
Festival günlərində üzüm istehsalı və şərabçılıq, ölkənin turizm potensialı ilə bağlı müxtəlif maarifləndirici və əyləncəli tədbirlər olacaq. Üzüm, şərabçılıq və festivalın rəmzləri olan çeşidli dekorasiyalar, instalyasiyalar ilə bəzədiləcək ərazidə yerli şərab istehsalçılarının dequstasiya pavilyonları, həmçinin qastronomik və etno zonalar fəaliyyət göstərəcək. Tədbirdə iştirak edən şərab istehsalçıları öz müəssisələri barədə təqdimatlarla çıxış edəcək, məhsullarını dequstasiya üçün təqdim edəcəklər. İştirakçılar üçün, həmçinin Azərbaycanda şərabçılığın tarixinə dair mühazirə keçiriləcək.
Bununla belə, festival çərçivəsində ölkədə şərabçılıq sahəsində mövcud olan problemlər, inkişaf istiqamətləri və yerli şərab məhsullarının xarici bazarlara çıxışı mövzularında dəyirmi masa keçiriləcək. Tədbirdə yerli şərab istehsalçıları, müvafiq dövlət qurumlarının nümayəndələri və xarici ekspertlər iştirak edəcəklər.
Bütün bu deyilənlərin fonunda, Azərbaycanda ilk dəfə keçiriləcək Üzüm və Şərab Festivalı bu sahənin inkişafına nə kimi yeni stimullar verə bilər?
Tahir Mirkişili: “Belə bir festival çox vacib əhəmiyyət kəsb edir”
Məsələyə münasibət bildirən millət vəkili Tahir Mirkişilinin sözlərinə görə, sözügedən tədbirin keçirilməsi üzümçülüyün və şərabçılığın inkişafına müsbət təsir edəcək: “Əvvəla, Azərbaycanda üzümçülüyün inkişafı ilə bağlı xeyli işlər görülüb. Bununla bağlı həm dövlət dəstəyi, həm də ayrıca xüsusi proqram var. Təbii ki, üzümçülüyün inkişafının mühüm istiqamətlərindən biri də bu sahənin daha da populyarlaşması və marketinq tədbirləridir. Eyni zamanda, xaricdə çox uğurla tətbiq olunan festivallardır. Çünki, məhz festivallar vasitəsi ilə bu sahədə başverənlər, yeni məhsullar, yeni texnologiyalar təqdim olunur. Bununla yanaşı, festival vasitəsi ilə bütövlükdə bu ideyanın və istiqamətin insanlar arasında daha da məşhurlaşdırılması, bu sahəyə diqqətin cəlb olunması mümkün olur. Ona görə də belə bir festival çox vacib əhəmiyyət kəsb edir. Birinci dəfədir Azərbaycanda belə tədbir keçirilir. Bu festivalın keçirilməsinə iştirakçıların sayına baxsaq görərik ki, cəmiyyətdə buna diqqət çox böyükdür. Ona görə də hesab edirəm ki, belə festivallar bu sahənin inkişafına, üzüm və şərabçılığa daha çox investisiyanın cəlb olunmasına və istehsal olunan məhsulların daha uğurla satışına xidmət edəcək”.
Vidadi ORDAHALLI
