Son dövrlər bəzi populyar şəxslər, teleaparıcılar, KİV-şiklər, aktyorlar Azərbaycan polisinə qarşı həqiqətəuyğun olmayan fikirlər səsləndirir, bəziləri müxtəlif səhnəciklərdə polisin “neqativ” obrazını yaradırlar. Bu şəxslər öz məşhurluqlarından istifadə edərək polisə qarşı qaralayıcı təbliğat aparır, onların şəxsiyyətini, fəaliyyətini lağ obyektinə çevirməyə cəhd göstərirlər.
Yaratdıqları “polis obraz”larını bir qayda olaraq mənfi planda təqdim edənlər polisi hər yerdə “rüşət” alan, “pul yığan” kimi göstərməyə çalışırlar. Əksər hallarda polisləri “yekəqarın” kimi də səhnəyə gətirənlər tapılır. Hətta Azərbaycan cəmiyyətində sabitliyin qarantı olan, ölkənin sabitliyini qoruyan polisi Sovet dövrü milisinə də bənzətməyə çalışan KVN-şiklər, oyunbazlar var. Onlar polisi olduğu kimi deyil, uydurma, eyni zamanda da “neqativ” bir sima kimi göstərməyə cəhd edirlər.
Bildirdiyimiz kimi bəzi teleaparıcılar arasında da polisə qarşı qarayaxma kampaniyası aparanlar var. Nümunə üçün Tolik ləqəbli teleaparıcı Tarix Əliyevin polislə bağlı həqiqətə uyğun olmayan, şər-böhtan üzrində köklənən fikirlərini qeyd edə bilərik.
Qeyd edək ki, sosial şəbəkələrdə, eləcə də bəzi internet saytlarında teleaparıcı Tarix Əliyevin “Binəqədi rayon icra hakimiyyəti tərəfindən vətəndaşın mənzilinə göndərilən polislərin onlarla kobud rəftar etməsi” ilə bağlı iddialar səslənib.
Onu da bildirək ki, Bakı şəhər BPİ-nin Mətbuat Xidmətinin rəisi, polis mayoru Elşad Hacıyev T.Əliyevin iddiasının əsassız olduğunu bildirib:”Tərəfimizdən videomaterial araşdırılıb, orada əks olunan kadrlarda polis əməkdaşlarının iştirakı müşahidə olunmur: "Polisə qarşı irəli sürülən ittihamlar və səslənən iddialar yalandır, əsassızdır.
Azərbaycan polisinin fəaliyyətindən, onun gördüyü mühüm işlərdən xəbərsiz olan şəxslərin səsləndirdikləri həqiqətəuyğun olmayan fikirlərə şübhəsiz ki, dar günündə polisi yanında görən, onun dəstəyinə arxalanan vətəndaşlar qətiyyən əhəmiyyət vermir. Polis bütün sahələrdə vətəndaşların yanında olmağı bacarır və insanlar üzləşdikləri ən kiçik problemə görə birbaşa polisə üz tutur və ondan ciddi dəstək alır. Bir sözlə cinayət hadisələrindən tutmuş təbii fəlakətə, eləcə də gördükləri qorxulu varlıqlara qədər hər şey üçün polisə müraciət edən vətəndaşlar polis haqqında həqiqətəuyğun olmayan fikirlər yayan insanları qınayır.
Polisi “neqativ” istiqamətdə təqdim edən, sabitliyin, təhlükəsizliyin qarantı olan polisə qarşı qarayaxma kampaniyası aparan bəzi populyar şəxslərə, teleaparıcılara, KİV-şiklərə, aktyorlara qarşı nə kimi tədbirlər görülməlidir?
Azər Həsrət: “Polisə qarşı həqiqətə uyğun olmayan fikirlər səsləndirən şəxslər islah olunmalıdır ki, bir də onlar belə hərəkətlərə yol verməsinlər”
Əməkdar jurnalist, tanınmış ekspert Azər Həsrət hesab edir ki, belə şəxslər polisin faydalı, əhəmiyyətli fəaliyyətini görmək istəməyən qüvvələrdir. O, hesab edir ki, öz məşhurluqlarından istifadə edərək polisə qarşı bu cür hərəkət edən şəxslərə qarşı cəmiyyət özü barışmaz mövqe sərgiləməlidir. “Polisin mənfi obrazını yaratmaq istəyənlər, onları neqativ şəkildə cəmiyyətə təqdim etməyə cəhd göstərənlər kimliyindən asılı olmayaraq savadsız və dünyagörüşü kasad olan adamlardır. Onların maarifləndirilməsinə ciddi ehtiyac var. Polisə qarşı həqiqətə uyğun olmayan fikirlər səsləndirən şəxslər islah olunmalıdır ki, bir də onlar belə hərəkətlərə yol verməsinlər. Azərbaycan polisi haqqında fikir bildirmək üçün bütövlükdə onun fəaliyyətini müşahidə və tədqiq etmək lazımdır. Ola bilsin ki, hansısa bir polis işçisi haradasa vətəndaşa qarşı nəzakətsiz davranıb, amma bunu bütövlükdə polisin ümumi obrazı kimi təqdim etmək yolverilməzdir. Bu hanısa bir fərdin hərəkətidir. Düşünrəm ki, qiymət verəndə də fərdin hərəkətinə qiymət vermək lazımdır. Bunu ümumiləşdirək Azərbaycan polisini gözdən salmaq birmənalı olaraq qəbuledilməzdir”.
Azərbaycan vətəndaşının həyatında, təhlükəsizliyinin təmin edilməsində polisin mühüm rol oynadığını deyən A.Həsrətin sözlərinə görə, polisin yuxusuz gecələri, gərgin əməyi olmasa cəmiyyətimizdə sabitlik olmazdı. “Əslinə qalanda bütün sahələrdə satira və yumorun olması vacibdir. Biz satira və yumora normal yanaşırıq. Ancaq konkret olaraq polisi hədəfə alıb onunla bağlı bu cür aşağılayıcı çıxışlar etmək, əsassız fikirlər söyləmək birmənalı olaraq yolverilməzdir. Yəni Azərbaycan polisi haqqında bir qayda olaraq daha çox müsbət fikirlər səsləndirə bilərik. Xüsusən də, Dağlıq Qarabağ müharibəsi zamanı Azərbaycan polisinin göstərdiyi şücaət, qəhrəmanlıq unudulmamalıdır. Hər kəs bilir ki, Ermənistan Azərbaycan torpaqlarına qarşı təcavüzə başlayarkən onların qarşısınıa ilk olaraq Azərbaycan polisi çıxdı, onlar arasında kifayət qədər şəhidlər də var. Bundan başqa da Azərbaycanın ümumi mənzərəsinə baxdıqda Azərbaycan polisi haqqında yalnız xoş sözlər demək olar. Çünki Azərbaycan dünyanın ən sabit, ən təhlükəsiz ölkəsidir. Bunu xarici turistlər də, qonaqlar da qeyd edirlər. Bu da Azərbaycan polisinin yorulmadan gecə-gündüz ölkəmizin sabitliyini və təhlükəsizliyini təmin etməsilə bağlıdır. Ola bilsin ki, haradasa neqativlər var, bu halların da aradan qaldırılması üçün daxili işlər naziri başda olmaqla polis orqanlarının rəhbərləri mühüm işlər görürlər. Bununla bərabər Azərbaycan vətəndaşları günün istənilən saatında, ölkənin istənilən yerində rahat gəzib dolaşırlar. Bu da polisin öz xidmətinə vicdanla, məsuliyyətlə yanaşmasının göstəricisidir. Ona görə də hesab edirəm ki, polisləri gözdən salmağa, onları qaralamağa, polis obrazını lağlağaya çevirməyə cəhd göstərmək istəyənlər kimliyindən asılı olmayaraq məsuliyyət daşımalıdır. Polisi rişxənd obyektinə çevirənlər, onları “neqativ” obrazda təqdim etmək mənfi haldır. Biz öz polisimizlə qürur duymalıyıq”-deyə A.Həsrət qeyd etdi.
Günel CƏLİLOVA
