Son vaxtlar Azərbaycanda fırıldaqçı turist şirkətləri peyda olub. Onlar müxtəlif vədlərlə turistləri cəlb edərək aldadırlar. “InTravel.Az” tur turizm şirkəti 20-dən çox ailəni Antalyaya səyahət adı ilə aldadaraq, pullarını mənimsəyib.
Turistlər aldadıldıqlarını hava limanında ikən başa düşüblər. Bu haqda məlumatı Leyla Məmmədova adlı zərərçəkən sosial şəbəkə vasitəsilə başına gələnləri ictimailəşdirib. Şikayətçi bildirib ki, “InTravel.Az” tur şirkətindən Türkiyənin Antalya şəhərinə tur-paket alıblar. Uçuş hansı gün üçün nəzərdə tutulsa da, səfər alınmayıb: “Qızım, yoldaşım, mən, qardaşım və anam bu gün səhər Antalyaya uçmalıydıq. “InTravel.Az” tur şirkətinə tam ödəniş edərək, möhürü, imzası və qəbzi olan sənəd almışdıq. Səhər hava limanında anlaşıldı ki, nə bilet var, nə də hotel. İş orasındadır ki, biz tək deyilik. Bizim kimi aldadılmış 20-dən çox ailə var və hamımız da aldadıldığımızı hava limanında öyrənmişik”.
Zərərçəkən bildirib ki, məsələ ilə bağlı aidiyyəti qurumlara müraciət ediblər: “Təbii ki, qanun qarşısında cavab verəcəklər, pulumuzu geri alacağıq. Amma mənim və ailəmin yaşadığı stressin bədəlini heç kəs ödəyə bilməyəcək. Belə turizm firmaları bağlanmalıdır. Bununla bağlı hüquq-mühafizə orqanlarının tədbir görəcəyinə inanıram”.
“Şirkətin əməkdaşı müştərilərdən pulu metro stansiyalarının çıxışlarında və müxtəlif ünvanlarda alıb”
Məsələni dəqiqləşdirmək üçün “İn.Travel.Az” turizm şirkəti ilə əlaqə saxladıq. Şirkətin satış meneceri Xalid Əsgərzadə bildirdi ki, aldatma faktı üzrə hazırda prokurorluq orqanı tərəfindən araşdırmaya başlanılıb: "Bizim turizm şirkəti illərdir ki, fəaliyyət göstərir. İndiyə qədər bizim şirkətlə bağlı narazılıq olmayıb. Çox təəssüf ki, bizim şirkətin bir əməkdaşı belə bir qanunsuzluğa yol verib. Həmin əməkdaşımız bir müddət idi ki, ailə vəziyyəti ilə bağlı rəhbərlikdən icazə alaraq evdən fəaliyyət göstərirdi. Bu dövrdə o, bizim sistem üzərindən başqa travel şirkətlərindən sifarişlər verib. Bu işi saxtakarlıq yolu ilə etdiyi üçün tur paket alan müştərilərin adları sistemdə qeyd edilməyib. Biz hadisədən ancaq müştərilər şikayət etdikdən sonra xəbərdar olmuşuq. Dərhal həmin xanım əməkdaşımızla bağlı hüquq-mühafizə orqanlarına məlumat verilib. Hazırda xanım əməkdaşımızın özünə qəsd təhlükəsi olduğundan xəstəxanaya yerləşdirilib. Amma prokurorluqda həmin şəxslə bağlı cinayət işi açılıb, araşdırmaya başlanılıb".
X.Əsgərzadə onu vurğuladı ki, şirkətin əməkdaşı müştərilərdən pulu metro stansiyalarının çıxışlarında və müxtəlif ünvanlarda alıb. Onun sözlərinə görə, müştərilərə dəyən zərərin ödənilməsi istiqamətində iş aparılır.
Günel CƏLİLOVA
