Zərif cinsin nümayəndələri bəzən taleyin acı üzü ilə rastlaşır. Elə qadınlar var ki, müəyyən səbəblərdən günlərini isti yuvasında keçirməklə deyil, tinlərdə, küçələrdə müştəri gözləməklə həyat sürürlər.
Acınacaqlı məqam ondan ibarətdir ki, fahişəliyə cəlb olunanlar arasında yetkinlik yaşında olan qızlar da var. Açıqlanan statistik rəqəmlərə əsasən, yetkinlik yaşında fahişəliyə cəlb olunanların sayı artıb.
Könül Vaqifqızı: “Yeniyetmə qızların pis yola düşməsinin səbəbi onlara ailələri tərəfindən lazımi diqqətin göstərilməməsidir”
Yetkinlik yaşında olan qızların fahişəliyə cəlb olunması barədə danışan psixoloq Könül Vaqifqızı “Bakı-Xəbər”ə açıqlamasında qeyd etdi ki, fahişəliyə cəlb edilənlər arasında gənclərin sayı çoxluq təşkil edir: “İnsan alverinin qurbanı olan yeniyetmə qızların əksəriyyəti uğursuz ailələrdən çıxan, savadsız, dünyagörüşü az olanlardır. Qadın alveri ilə məşğul olan şəxslər onları asılı vəziyyətə salmaq üçün müxtəlif yollardan istifadə edirlər. Aldatma və ya güc tətbiq edərək oğurlama, öz gənc ailə üzvlərini satmaq üçün valideynlərə, qohumlara və himayədarlara sövqedici təkliflər, məsələn, yaxşı işlə təmin olunma, həyat səviyyəsinin yaxşılaşdırılması, inkişaf etmiş ölkələrdə yaşamaq imkanı, nəhayət, dostluq, məhəbbət və ya evlənmə kimi yalançı vədlər bu sıradadır”.
Psixoloq hesab edir ki, yeniyetmə qızların pis yola düşməsinin səbəbi onlara ailələri tərəfindən lazımi diqqətin göstərilməməsidir: “Bəzən o qızlar özlərindən çox böyük şəxslə evlənməyə məcbur edilir. Və ya ailəsi tərəfindən şiddətə məruz qaldığı üşün yaşadığı evi tərk etməli olur. Çarəsiz vəziyyətdə qalan məktəbli qız yaşamaq üçün ilk əvvəl ona isti münasibət göstərən şəxsə və ya şəxslərə sığınır. Təbii ki, o qızların sonrakı taleyi heç də yaxşı olmur”.
K.Vaqifqızı onu da əlavə etdi ki, Azərbaycanda qadınların insan alverçilərinin toruna düşmələrinin bir sıra səbəbləri var: “Bunlardan ən çox istifadə ediləni təhsil almaq, nikaha girmək adı ilə də xaricə aparılmaqdır. İlk baxışdan qanuna uyğun şəkildə qeydiyyata alınıb xaricə göndərilən qadını isə iş əvəzinə gizli bordellər gözləyir. Beləliklə, dil bilməyən, qanun və beynəlxalq hüquq normalarından baş çıxarmayanlar insan alverçilərinin əlində alətə çevrilir. Faktlar onu da göstərir ki, qurbana çevrilmiş azərbaycanlı qadınların əksəriyyəti rayonlardandır. Səbəb isə həmin bölgə sakinlərinin məlumatsız olmasıdır”.
Psixoloq qeyd etdi ki, 14-16 yaşlı qızlara bu şəkildə tələbatın olması böyük bəladır: “Birincisi, bu uşaqlar həmyaşıdları kimi məktəbdə olmalıdırlar. İkincisi, azyaşlı qızların fahişəliklə məşğul olmaları ciddi sağlamlıq problemləri ortaya çıxara bilər. Digər tərəfdən, bu tendensiya onların həmyaşıdlarının da buna meyllənməsinə səbəb olar. Əgər bunun qarşısı alınmasa, bir müddət sonra azyaşlı qızlar düşünəcəklər ki, yaxşı geyinib-kecinmək üçük fahişəliklə məşğul olmaq lazımdır. Günel CƏLİLOVA
